Nàng hơ̆ sồng tŭ do, làng bol rƀah La Hủ tiah brê bơnơm dờng bồ tô dà dờng Đà, gơwèt xã tiah nhàr lơgar Pa Ủ, kơnhoàl Mường Tè, càr Lai Châu neh lơh pràn lơh sa nàng brồ guh klàs bơh rƀah.

Tìp bi Pờ Lò Hừ tàm bă ù lời gời tềng hơđang bơnơm. Bi ờ ru mờ broă ròng rơpu kơnrồ. Bơh săp hòi mpong ntas làm gùt brê bơnơm dờng ơning ơnàng bơh bi Pờ Lò Hừ dê, rơpu kơnrồ ur ar jòi rê tus bă ù lời gời tềng hơđang bơnơm. Tơl sơmbăt boh rơsìh tàm ù là rơpu kơnrồ rê tus gal rlau. Deh mờ dờng tàm bă ù kal ke rƀah lơ ời tàm ƀòn Chà Kế, rlau 10 nam rài kis lòt jòi sa ntrờn làm bă tiah neh jun hìu bơnhă bi Hừ tus mờ bă ù Pha Bu ơm ngài mờ ƀòn lơgar tờm rlau 60 kơi sồ. Sơnam kơnòm dềt bơh Hừ dê kung bè gĭt nđờ nă làng bol kòn cau La Hủ ndai tàm tiah do ndrờm pal sơrlèt gan ală ngai nhai lòt jăt mè bèp, ồng mò ngai do ơm tiah do, ngai ne ơm tiah ndai lòt gan ală bă brê nàng jòi sa. Pơgăp tŭ tơngai ờ kis ờ kơ̆ dùl bă tiah là jơnau tờm gơlam tus khà jơgloh rƀah bơh làng bol kòn cau La Hủ uă khà dùl khà bàr tàm 54 jơi bơtiàn kòn cau tàm gùt lơgar. Bi Pờ Lò Hừ, yal: Ală ồng mò kra den chơ̆t gờñ, hơ̆ sồng bèp là kòn pŭt tai tŭ hơ̆ kung gam dềt sơl, ờ gŏ ơm dùl anih mờ ơm kis rah rài tai den tàng kal ke uă ngan. Lòt ntrờn ơm kis lơh sa làm bă tiah, ờ gŏ ơm kis kơ̆ dùl bă tiah rài kis bòl glar kal ke ngan, lơh sa kung kal ke sơl mờ phan sa kung ờ tơl uă ngan sơl. Ai tŭ do neh tam gơl uă rao, ơm dùl anih mờ ơm kơ̆. Lơh ngan pơđơl pràn lơh sa nàng bơtàu tơnguh lơh sa, mờ tŭ do Dà lơgar kung neh dong kờl làng bol ƀòn lơgar gùng lòt rê kung neh niam hơ̆ sồng lơh sa broă lơh kung ƀươn ƀoài rlau. 

Tềng đăp ală kal ke bè ù tiah, trồ tiah, rài kis hìu bơnhă rƀah lơ ời ngan kung bè jơi bơtiàn he dê sơl, là đảng viên, Ƀí thư Ci ƀộ mơkung là Kwang ătbồ ƀòn, bi Pờ Lò Hừ neh jòi lùp bơsram is nàng bơtàu tơnguh lơh sa hìu bơnhă. Tơnơ̆ uă nam tơryăng tơryồng, tus tŭ do neh 43 sơnam, bi Hừ neh geh tàm tê jơtài gĭt nđờ tơmàn đong, mờ rơpu kơnrồ rlau 100 nơm, gĭt nđờ jơ̆t lồ tờm quế, sa ñân, thảo quả, kơnuh sơnơm...Bi Pờ Lò Hừ, yal: Mŭt Đảng ngai sơlơ gĭt wă rlau, mờ pơrjum tai pah nhai den mblàng yal, cribơyai, lùp bơsram dong kờl làng bol sơlơ ngai sơlơ chờ hờp. Là Ƀí thư Ci ƀộ, lài ngan là pal lơh krơh lam lài ai làng bol in gĭt lơh sa bè ròng phan, tam ală bơta chi sa plai, tờm chi lơh geh priă jền uă. He ờ lơh krơh ai làng bol in den làng bol sơlơ kal ke. Ờ gĭt lơh sa, làng bol ờ chài kơlôi sơnơng, bồ tơngoh ờ gŏ àng sơrdah ngăc ngar.

Ờ gŏ di mìng kơlôi rơcăng is ai să tờm mờ oh mi jơi nòi in lơm, mờ kơnòl broă bơh cau đảng viên dê, uă nam do, bi Pờ Lò Hừ gam dong kờl gĭt nđờ rhiang hìu làng bol tàm ƀòn tàm xã. Ờ mìng lơh geh broă lơh sùm ai 5 nă cau lơh broă in mờ broă lơh jăt tơngai kàl ai rlau 30 nă cau in, pah nam ală hìu bơnhă jơgloh tàm nhai puh pah den bi Hừ pà kòi, pà phe sa; hìu bơnhă ờ geh priă mờ mờng chài lơh sa den bi ai càn priă ờ sa priă cồng, hơ̆ sồng bơto pơlam tai broă chài lơh sa. Cau lơi ờ geh phan lơi, kờñ broă lơi den bi dong chi hơ̆, tŭ do bi Hừ neh ai geh jơh bơta pin dờn bơh làng bol ƀòn tờm he dê; Bi Lỳ Mò Nu là làng bol kis tàm ƀòn Pha Bu, xã Pa Ủ chờ hờp ngan yal: Kơnờm Ƀí thư Ci ƀộ bi Hừ dong kờl lơh sa, tơnơ̆ uă nam jơgloh bòl glar kal ke, tŭ do hìu bơnhă añ neh jơh rƀah. Rài kis ờ gam kal ke bè lài tai den tàng ală kòn añ dê kung geh ai lòt bơsram sră niam rlau. Ờ mìng geh hìu bơnhă añ dê lơm gời ờ mờ uă hìu bơnhă tàm ƀòn tàm tiah do kung geh dong kờl sơl, den tàng rài kis wil tơl rlau mờ lài. Làng bol tàm ƀòn gam chờ hờp ngan.

Ngềt ngơ̆t lam lài tàm bơtàu tơnguh lơh sa sươn, grồi, brê tàm ƀòn lơgar, uă nam do ờ huan ngan geh cau lơi gĭt là tàm làng bol kòn cau La Hủ tàm xã tiah nhàr lơgar Pa Ủ geh wơl dùl nă cau geh priă tơmàn là cau lơh broă jơng tê. Bơh broă lơh lơh sa sươn dờng bơh Ƀí thư Ci ƀộ, Kwang ătbồ ƀòn Pha Bu là bi Pờ Lò Hừ dê, tus tŭ do, tàm xã Pa Ủ neh geh uă broă lơh ndai tàm ală ƀòn: Thăm Pa, Nhú Ma, Ứ Ma, Xà Hồ, Mu Chi...Đơs bè gơnoar broă Đảng viên bi Pờ Lò Hừ dê tàm ƀòn lơgar, ồng Phạm Hồng Bình, Phó Ƀí thư Đảng ủy xã Pa Ủ, kơnhoàl Mường Tè, pà gĭt: Gơwèt mờ ală ƀòn lơgar kal ke, rài kis làng bol gam ờ hềt wă wờng ngan tàm bơta gĭt wă kung bè bồ tơngoh bơtàu tơnguh, ală krơh lam lài pơnrơ bè do dipal ngan nàng sền dờng màng. Ală bi hơ̆ là cau să tờm tơn tàm ƀòn lơgar mờ là cau tàm làng bol jơi bơtiàn dùl êt nă cau neh geh bơngă pin dờn mờ làng bol. Bơh broă lơh ngan ngồn tàm rài kis bơh bi hơ̆ dê neh lơh geh bơta pràn lơh gơrề mờ là krơh nàng pơndờm pơnđiang mờ dong kờl, hòi jà làng bol tàm ƀòn lơgar bơsram mờ lơh jăt, kung dong ai lơh sa- mpồl bơtiàn bơh xã dê rơhời bơtàu tơnguh rlau tai.

Pa Ủ neh gĭt pơneh là tiah rƀah ngan bơh càr Lai Châu dê, tŭ geh tơngai khà hìu rƀah geh tus 95%. Bè hơ̆ mơya, kơnờm ală đảng viên lam lài pờ gùng klàs rƀah bè bi Pờ Lò Hừ, tŭ do khà jơgloh rƀah bơh xã dê neh gơmù mìng gam rlau 77%. Ală broă lơh tài làng bol hơ̆ neh geh cih dờp, tŭ hìu bơnhă bi là 01 tàm 08 hìu bơnhă lơh geh cồng nha pơnrơ ngan tàm Bơsram mờ lơh jăt bồ tơngoh, nùs nhơm, broă lơh mờ rài kis Hồ Chí Minh dê nam 2023, geh Ƀan Tuyên záo Tỉñ ủy Lai Châu dan Củ tịc Ủy ƀan Ñân zân càr pà Sră jờng rơ.