Mho jơla, tơnơ̆ tŭ jơh bơssram, oh Nguyễn Thùy Dương – kơnòm bơsram ơdŭ 6, Hìu bơsram kấp 2 Cát Khánh (sàh Đề Gi, càr Gia Lai), mhar tê ngan tơrgùm wơl sră măi, sră cih, sing ồs gơm piang, dong bèp gơtìp lơng jơh 2 nơm jơng. Tàm hìu ơm rƀah rơƀừp, rài kis bơh 2 nă bèp mờ kòn mìng kơnờm tàm broă lơh niam wơl rơndeh coh mờ priă lơh geh dồ ết ngan. Gĭt loh rài kis hơ̆, bơh nam 2024, Pôs đồng ling sền gàr tiah nhàr lơgar Cát Khánh (Gơwèt Mpồl đơng lam Mpồl ling sền gàr tiah nhàr lơgar Gia Lai) neh dờp dong kờl oh Dương tàm broă lơh “Dong kờl oh lòt bơsram”. Pah nhai, oh geh dong kờl 500 rơbô đông, bal mờ phe, bung mi mờ sră cih, sră măi. Bơta lơh kòn mờ bèp Dương sơlơ ngoh rơngăc là bơta sền gròi, lùp còp, pơndờm pơnđiang, dong 2 nă bèp mờ kòn kơ̆ kơnhăp rlau tai:“Kòn ki ngàm ală wa ngan, tài bơh ală wa ai priă jền mờ ai phan ngui bơsram sră nàng oh kòn in bơsram sră. Ală wa lùp ờ tơl bơta lơi den blơi bơta hơ̆, oh đơs là phan ngui nam lài ală wa ai kòn in tơl ngui rao, tŭ lơi guh ơdŭ kòn hơ̆ sồng mai phan pa”.

Kung bơh nam 2024 tus tŭ do, tàm sơnah ƀòn Quy Nhơn Đông, oh Trần Huỳnh Thùy Trang, kơnòm bơsram ơdŭ 8, là dùl tàm ală kơnòm geh Pôs đồng ling sền gàr tiah nhàr lơgar Nhơn Lý dờp dong kờl. Bèp chơ̆t gờñ tài bơh rềs àr gùng lòt rê, mè bơh oh Trang dê là bi Huỳnh Thị Mỹ Hoa ơm bè hơ̆, lơh apah gùt nam nàng ròng 2 nă oh kòn bơsram sră. Kơnờm geh bơta dong kờl bơh ală cau ling sền gàr tiah nhàr lơgar, pah nhai oh Trang geh dờp 500 rơbô đông bal mờ ào mpha, sră cih, sră măi mờ phan ngui bơsram sră. Bơta sền gròi hơ̆ ờ mìng dong oh sơr lèt gan kal ke lơm mờ gam dong kờl tai oh geh bơta gơn kơnờm bơsram sră, uă nam sùm lơh geh kơnòm bơsram jak. Bi Hoa- mè oh Trang dê ngoh rơngăc đơs: “Hìu bơnhă chờ hờp ngan, geh bơta sền gròi bơh ală wa dê sùm lùp còp broă bơsram sră. Añ pơndờm pơđiang kòn là pal bơsram sră nàng di pal mờ bơta dong kờl bơh ală wa dê, gĭt sền sră geh gơtha là tơnơ̆ do lơh bơta lơi kung ờ hoan kal ke sơl. Pa do sau kung lơh geh sră jờng rơ kơnòm bơsram jak, añ geh yal mờ ală wa sơl, ală wa chờ hờp ngan”.

Broă lơh “Dong kờl oh lòt bơsram” geh Mpồl ling sền gàr tiah nhàr lơgar càr Gia Lai lam lơh bơh nam 2016 tus tŭ do, neh gơ gơs dùl tiah kơldìng kơnhăp kơ̆ ai kơnòm bơsram rƀah tàm tiah nhàr lơgar in. 77 nă kơnòm bơsram geh rài kis kal ke uă neh geh dong kờl mờ ală priă jền dong kờl geh gàr sùm tus di tŭ bơsram jơh ơdŭ 12. bal mờ dong kờl phan bơna, ală pôs đồng ling sền gàr tiah nhàr lơgar gam sùm jat sền, pơndờm pơnđiang, bơto pơlam ală kơnòm tàm broă bơsram sră mờ rài kis. Trung tá Nguyễn Hữu Nghị, Cíñ trị viên Pôs đồng ling sền gàr tiah nhàr lơgar Cát Khánh, Mpồl đơng lam Mpồl ling sền gàr tiah nhàr lơgar càr Gia Lai pà gĭt:“Mpồl ling pơgồp bal mờ gơnoar atbồ ƀòn lơgar, hìu bơsram, hìu bơnhă nàng gĭt loh bơta bơsram sră bơh ală kơnòm dê bơh cau pơgru at bồ ơdŭ bơsram mờ hìu bơnhă nàng geh broă lơh dong kờl, dong kờl ală oh geh tơl ală bơta nàng bơsram sră. Di dơ̆ lơh chờ Dà lơgar, sa tềp dà lơgar mờ sơnđờm mut nam bơsram pa, mpồl ling tơnguh pà phan bơsram sră, sră cih, sră măi ai ală kơnòm in. Bồ nam bơsram 2024-2025, mpồl ling hòi jà dong kờl geh 12 nơm rơndeh coh. Geh uă kơnòm lik klờng neh wơl rê wơl lùp còp mờ ưn ngài mpồl lơh broă”.

Tŭ do, tàm khà 77 nă kơnòm bơsram geh dong kờl, neh geh 25 nă kơnòm neh pơrlòng gơ kờn tàm ală hìu bơsram đại họk, kao đẳng tàm ƀòn dờng Hồ Chí Minh, Đà Nẵng, Huế. Ồng Nguyễn Thanh Danh, Phó Củ tịc Anih duh broă Làng bol sơnah ƀòn Quy Nhơn Đông, càr Gia Lai pà gĭt: broă lơh ờ mìng pơgồp bơnah gàr tơl niam rài kis mpồl bơtiàn tàm tiah do dê lơm, mờ gam lơh kơ̆ rlau tai nùs nhơm tam klăc ling klàng- làng bol, lơh gơ rề uă rùp hin niam bơnĕ bơh “Cau ling Wa Hồ dê” tàm rài kis bè ờs: “Bơta lơh bol añ in sền dờng màng là broă lơh niam ngan, song dơ pă mờ kơnhăp jŏ bơh mpồl ling sền gàr tiah nhàr lơgar dê. Ală bi ờ mìng dong kờl bè phan bơna lơm mờ gam sền gròi, pơlam gùng dà, lòt bal jŏ jòng mờ kơnòm bơsram. Tàm tơngai pa do, mpồl ling sền gàr tiah nhàr lơgar jơh nùs ngan pơgồp bal mờ gơnoar atbồ ƀòn lơgar hòi jà kwang bàng, cau ling tă pơgồp ngai priă nhai, dong ală kơnòm- ngan là ală oh kòn đời, geh rài kis kal ke- geh ală bơta nàng pơn jat tai bơsram sră”.

Tàm tiah nhàr lơgar càr Gia Lai, broă lơh “Dong kờl oh lòt bơsram” bơh Mpồl ling sền gàr tiah nhàr lơgar sùm tàm tơngai pa do neh ngềt ngơ̆t dong kờl ală kơnòm bơsram rƀah pơn jat tai gùng lòt tus ơdŭ bơsram. Bơh bơta kờñ gơboh mờ geh kơnòl, ală cau ling tiah nhàr lơgar gam bal mờ ală oh cih tai bơta kơ̆p kờñ bè dùl rài tơnơ̆ do àng niam rlau tai.