Tàm dơ̆ tìp măt, uă broă gơrềng tus broă sền gàr niam rài kis mpồl bơtiàn neh geh cau tĕ khà đơs. Tàm kơnhoàl Ea Kar, cau tĕ khà neh geh uă jơnau đơs pơyua tus Mpồl Kwang bàng Quôk hội càr Dăk Lăk in, tàm hơ̆, đơs uă tàm ală broă, bè: bơta gơkòl broă lơh sră ngui ù ai ală hìu làng bol in, bơta dong kờl priă jền ai kwang bàng thôn in dùl êt ir, ală broă dong kờl jăt broă lơh jơnau kờñ dà lơgar dê bè tơrmù rƀah kơ̆ kơl jăp jŏ jòng tiah làng bol jơi bơtiàn dùl êt nă cau in gam ờ hềt dipal, ờ hềt niam. Cih dờp mờ jờng rơ ngan ală jơnau đơs bơh cau tĕ khà dê, mpồl Kwang bàng Quôk hội càr Dăk Lăk neh sồr ală anih lơh broă geh gơnăp gơnoar mờ tiah do mblàng yal lơh loh. Mờ ală broă ndai, mpồl rơ̆p tơrgùm wơl, yal mờ Quôk hội, Cíñ phủ mờ ală ƀộ, ngàñ in tàm dơ̆ pơrjum tus.