Broă lơh là dùl broă lơh geh kwơ ngan, tơnggŏ bơta sền gròi jrô ơnàng làm uă bơh Mpồl Đơng lam Cau ling Sền gàr tiah nhàr lơgar càr; kâp ủy, gơnoar ătbồ, ală mpồl gah, mpồl cau ƀòn lơgar mờ ală cau geh nùs nhơm niam gơ wèt mờ broă lơh sền gàr, bơto bơtê kơnòm dềt, is ồn là ală oh dềt tàm kơnhoàl ù tiah nhàr lơgar, bơh hơ̆ geh tai gơn kơnờm nàng bơsram, pơlam tàp mờ pơnđơl gơgơs ală làng bol geh kwơ ai mpồl bơtiàn in.

Tàm broă lơh, Mpồl Đơng lam Cau ling Sền gàr tiah nhàr lơgar càr Lâm Đồng, gơnoar ătbồ ƀòn lơgar mờ ală cau geh nùs nhơm niam neh jàu pà 450 bơnah phan pà kờp priă pơgăp 200 tơlak đong.

 Mpồl cau bal tàm càr Dăk Lăk neh jơh nùs hòi jà tă pơgồp bal priă jền nàng bơyai lơh broă lơh nhơl chờ hờp, pà phan ai gĭt nđờ rơbô nă kơnòm dềt rƀah, kơnòm dềt kuĕt kơl tê tàm càr in, dong ală kơnòm dềt sền gĭt wil tơl bơta chờ hờp tàm kàl àng nhai ndar me. Mờ tơngume “Hô hơng săp ñiŏ- tam pà bơta kờñ gơboh” bơh ơdŭ Trung kấp lý luận cíñ trị A55A, Hìu bơsram Cíñ trị càr Dăk Lăk dê bơyai lơh, neh jàu 210 bơnah phan pà ai kơnòm bơsram hìu bơsram in.

Tàm sàh Ea Mdroh, 300 bơnah phan pà neh geh jàu ai kơnòm dềt ƀòn pôs đồng kăc màng in bơh broă lơh Đèng gŭ sòl àng bơta kơ̆p kờñ. Ai tàm ƀòn Cư Kŏ Êmông, Mpồl Ơruh pơnu sàh Dang Kang pơgồp bal mờ ală mpồl geh nùs nhơm dong kờl is bơyai lơh tam ya đăng grài, gơm bung riêu, siăt sŏ ờ sa priă mờ pà ào mpha, phan ngui bơsram sră, phan pà trung thu ai mờr 700 nă kơnòm dềt bơh 2 ƀòn Cư Păm mờ Cư Kŏ Êmông. Ală bơnah phan pà do neh dong kơnòm dềt kal ke, geh rài kis kal ke uă tàm càr Dăk Lăk sền gĭt geh nùs nhơm kờñ gơboh mờ tam pà bal tàm kàl Trung thu nam do.