Do là broă lơh geh kwơ tàm ală bơta bè tŭ do tŭ Mpồl ling klàng lam lơh jat kràñ cê jơh nùs Nghị quyết bơh Quân ủy Dà lơgar dê bè đòm jat nùs nhơm Cau ling Wa Hồ dê, kràñ cê jơh nùs sơndră wơl mờ nùs nhơm is tàm bơta pa.

Ală jơnau cih đơs tàm dơ̆ cribơyai đơs nền nùs nhơm “Cau ling Wa Hồ dê” cih dờp nùs nhơm ală rơnàng, nùs nhơm dòn song uă ngan mờ Đảng, Dà lơgar bơh Mpồl ling klàng he dê, là bơta kwơ tờm ngan bơh Mpồl ling klàng làng bol Việt Nam dê. Nùs nhơm “Cau ling Wa Hồ dê” là dùl broă lơh tơl jơnau kờñ, bơta kwơ nùs nhơm bơh cau ling geh griăt kăc màng dê, hơ̆ là khat dùl tàm bơta lơi, mpồl ling klàng kung jơh nùs jơh tồr gơwèt mờ Đảng, jơh nùs kờñ gơboh gơ wèt mờ làng bol, rcang lài tam lơh chơ̆t phi să tài bơta lơngap lơngai khat gơboh bơh Dà lơgar dê, tài củ nghĩa xã hội. Ală bơta kwơ hơ̆ geh lơh geh mờ bơtàu tơnguh tàm ală tŭ tơngai bơt bơtàu, tam lơh mờ dờng pràn bơh Mpồl ling klàng làng bol Việt Nam dê.

Jat Giáo sư- Tiến sĩ ồng Hoàng Chí Bảo, Ủy viên Hội đồng Lý Luận Dà lơgar lài do mblàng lơh loh mat sơnđan “Cau ling wa Hồ dê”: “Cau ling Wa Hồ” neh gơ gơs cau ờ mìng bơh bơta kơlôi sơnơng khoa họk  lơm, mờ gam là cau bơh bơta bơceh jơnau cih, ràng tơlik, bơta gơ kờñ uă ngan bơh gah jơnau cih, đơs crih tam ya gùt dar tơngume dờng màng do ờ hoan geh tiah lơi geh ờ. Cau ling Wa Hồ tơrgùm tàm jơh ală bơta hơ̆ là nùs nhơm, să jan, khin cha bơh mpồl ling bol he dê. Đơs tus dùl bơta niam ngan bè bơta niam chài lơgar Việt Nam dê rài Hồ Chí Minh, mờ tàm hơ̆ geh bơta niam chài ling klàng, niam chài Mpồl ling klàng bol he dê”.

Đơs tàm dơ̆ cribơyai, Trung tướng ồng Trịnh Văn Quyết, Phó Củ ñiệm Tổng kụk Cíñ trị, Mpồl ling klàng làng bol Việt Nam đơs nền: mat sơnđan dờng màng ngan“Cau ling Wa Hồ dê” geh làng bol pin dờn, kờñ gơboh jàu pà ai mpồl ling klàng he in bơh tàm rài tam lơh mờ bol sò tơm lơgar Tây. Tàm khat dùl bơta lơi, bulah kal ke bè lơi, bulah pal phi să he dê, mơya kwang bàng, cau ling gùt mpồl ling tơngai pa do kung sùm lơh niam rlau tai rùp hin Cau ling Wa Hồ dê, sơlơ tàm bơta kal ke, sơlơ àng niam rlau tai. Tềng đap ală bơta lòng bè tŭ do nùs nhơm do sơlơ kờñ pal geh đòm jat niam.

Trung tướng ồng Trịnh Văn Quyết, đơs: “Tàm bơta pa, kơnòl broă bơt bơtàu Mpồl ling klàng, sơlơ sền gàr dà lơgar, sền gàr kơ̆ kơl jap Dà lơgar mờ ală jơnau sồr ngai sơlơ kal ke. Tàm tŭ hơ̆, ală mpồl cau tam dră gam pơn jat tai lơh pràn “lơh tam gơl bơta ring lơngai”, lơh“ tam gơl is”, lơh “gơlik is” tàm dơlam is, “ngui ling klàng lơh broă cíñ trị” mpồl ling klàng, đơs bu ba gùng dà broă lơh bơh Đảng, adat boh lam bơh Dà lơgar mờ bơhiàn bơh Mpồl ling klàng làng bol Việt Nam khin cha jak chài dê, nùs nhơm niam bơnĕ “Cau ling Wa Hồ dê”. Rlau mờ tŭ lơi jơh, bơta kwơ dờng màng bơh nùs nhơm “Cau ling Wa Hồ dê” pal sùm geh sền gàr mờ đòm jat pràn kơl dang rlau jơh, nàng di pal mờ jơnau sồr, kơnòl broă tàm tơngai pa dê”.

Tềng đap ală bơta lòng “lơh tam gơl ring lơngai” tŭ do, uă jơnau đơs sồr geh ală broă lơh nàng kờñ lơh kah wơl bơta kơ̆p kờñ tă pơgồp dà kơl hề, bơto bơtê, pơlam tàp, đòm jat nùs nhơm “Cau ling Wa Hồ dê” tàm bơta pa. Tàm hơ̆, geh bơta lơh ngan đơng lam uă ngan, đơng lam tơn bè tơl ală bơta bơh Đảng dê, lơh pràn bơt bơtàu tiah ơm kis niam chài tàm Mpồl ling klàng; gàr kơ̆ mờ đòm jat nùs nhơm dờng màng Cau ling Wa Hồ dê, jơh nùs lơh ngan tam dră mờ nùs nhơm is.

Cribơyai mờ uă jơnau cih đơs tă pơgồp bal lơh loh ală tơngume mùl gŏ kwơ màng bơh nùs nhơm “Cau ling Wa Hồ dê” là bơnàng jă nàng Quân ủy Dà lơgar, Ƀộ Quôk phòng, Tổng kụk Cíñ trị mờ kấp ủy, đơng lam ală kấp sền gĭt gùng dà broă lơh, broă lơh đơng lam, sồr lơh jơh gùt mpồl ling sền gàr, đòm jat niam bơta kwơ niam chài “Cau ling Wa Hồ dê’ tàm bơta pa; lơh jat geh cồng nha kơnòl broă bơt bơtàu Mpồl ling klàng, bơt bơtàu mờ sền gàr Dà lơgar. Mơkung là jơnau kờñ nùs nhơm kăc màng nàng kwang bàng, đảng viên tàm Mpồl ling klàng in sền is, lơh niam is, pơnđơl pràn lơh ngan bơto bơtê, pơlam tàp, tơnguh uă nùs nhơm kăc màng, lơh gơ rề uă bơta kwơ niam chài “Cau ling Wa Hồ dê” tàm tơngai pa.

Bơta kwơ niam chài “Cau ling Wa Hồ dê” là bơta tơrgùm bal ală bơta kwơ niam ngan bơh bơta niam chài ling klàng Việt Nam dê, geh ală rơnàng kwang bàng, cau ling bơh Mpồl ling klàng làng bol Việt Nam dờp mờ tàm đòm jat, lơh ngan bơt bơtàu bơh bơta đơng lam, lam lơh, bơto bơtê, pơlam tàp bơh Đảng he mờ Củ tịc Hồ Chí Minh dê. Đòm jat mờ lơh geh bơta kwơ niam chài “Cau ling Wa Hồ dê” geh gàr kơ̆ mờ sùm lơh niam, pơgồp bơnah bơt bơtàu Mpồl ling klàng làng bol Việt Nam pràn kơl dang, kơ̆ kơl jap bè cíñ trị, lơh bơnàng jă tơnguh uă bơta niam tơrgùm bal, bơta pràn tam lơh, lơh sir niam ngan kơnòl broă mờ Đảng, Dà lơgar mờ làng bol dê jàu.