Bal mờ nùs nhơm jơh nùs ki ngàm mờ gĭt ưn ngài uă ngan gơ wèt mờ ală cau khin cha jak chài, cau ling kăc màng, làng bol kờñ gơboh dà lơgar neh chơ̆t phi să tàm Côn Đảo, tàm nùs nhơm ki ngàm mờ ngoh rơngăc ngan, Củ tịc lơgar ồng Võ Văn Thưởng bal mờ mpồl kwang bàng ala măt neh pơdơng bơkàu chu ñàng kah kơlôi tềng bơtô ƀồc Tổng Ƀí thư lài do ồng Lê Hồng Phong, cau kờñ gơboh dà lơgar ồng Nguyễn An Ninh, Cau khin cha jak chài chơ̆t màng Võ Thị Sáu..., kun bồ jơh nùs ki ngàm kah rơngal wơl ală cau kòn jak chài ngan bơh jơi bơtiàn dê neh chơ̆t phi să ai Dà lơgar in.

Củ tịc lơgar ồng Võ Văn Thưởng neh tam chi lời kir sơnrai tàm sươn ƀlàng tơ̆p ƀồc cau ling chơ̆t màng Hàng Dương. Tơnơ̆ dơ̆ bơyai lơh chu ñàng, Củ tịc lơgar ồng Võ Văn Thưởng mờ ală kwang bàng ala măt neh tus bal Dơ̆ duh kah ală cau ling kăc màng mờ làng bol kờñ gơboh dà lơgar neh chơ̆t phi să tàm Côn Đảo, chu ñàng tềng tơrñăng lŭ cih mat 2 rbô 284 nă cau chơ̆t màng tàm Hìu duh kah Côn Đảo.