Cribơyai tơrgùm tàm 3 mpồl broă tờm bè: ală đoàn viên Kông đoàn tơngŏ nùs nhơm, bơta kơ̆p kờñ, đơs ală kơlôi sơnơng, broă lơh mờ đơs nền nùs nhơm lơh ngan sơr lèt gan tơl bơta kal ke tềng đăp mat, sơlơ bơtàu tơnguh lơh sa- mpồl bơtiàn, lơh tus bơt bơtàu Dà lơgar Việt Nam khin cha, dờng pràn jat jơnau sồr tàm Nghị quyết bơh Pơrjum dờng dơ̆ XIII bơh Đảng dê.

Đơs pơndŭt cribơyai, Củ tịc Quôk hội ồng Vương Đình Huệ đơs nền lơh geh cồng nha bơh Cribơyai dê tơngŏ nùs nhơm sùm tam gơl pa, lơh broă kràñ cê jơh nùs bơh Quôk hội dê tài bơta kwơ bơh làng bol, mờ bơh rơnàng cau lơh phan dê. Pin dờn là, bơh bơta đơng lam di gùng di dà, di pal ngan bơh Đảng dê, bơta pơgồp bal niam ngan, di pal ngan mờ bơta mŭt lơh ngan, rcang lài bơh ală kấp, ală ngàñ mờ jơh bal ală anih lơh broă cíñ trị, bơta dong kờl, dùl nùs bal, pơnđơl pràn lơh ngan mờ jơh nùs ngan bơh làng bol dê, cau lơh broă, ală mpồl lơh sa kă bro, ngan ngồn bol he rơ̆p sơr lèt gan bơta kal ke, bơta lòng, gĭt loh geh tŭ tơngai niam, lơh jat geh cồng nha kơnòl broă bơtàu tơnguh lơh sa- mpồl bơtiàn nam 2023 mờ tơngai bơh nam 2021-2025.