Mè Việt Nam khin cha jăk chài Nguyễn Thị Khả kis tàm thôn La Bông, xã Hoà Tiến, kơnhoàl Hoà Vang, ƀòn dờng Đà Nẵng geh bơklao mờ kòn klao ndrờm là cau ling chơ̆t màng. Nam 1968, bơklao mè là Võ Văn Cảnh, phi să tàm tŭ lơh kơnòl tàm kơnhoàl Nông Sơn, càr Quảng Nam. Tus nam 1978, kòn klao Võ Văn Bình tŭ lơh kơnòl dunia neh chơ̆t phi să tàm lơgar Campuchia. Nam do, neh 84 sơnam, mè Nguyễn Thị Khả geh tŭ kah, geh tŭ ờ kah. Rơcang tơnkah ngai Cau ling sồt să – Cau ling chơ̆t màng (27/07) geh kấp ủy, gơnoar atbồ tus còp, mè Khả ram nùs: “Bơklao mờ kòn neh chơ̆t jơh kung moăt, mơya kung kơnờm Dà lơgar sền gròi, hìu nhă añ den tàng kung ờ hoan moăt sơl. Ngai 27 nhai 7 pah nam geh Mpồl Cau ùr mờ gơnoar atbồ ƀòn lơgar tus còp. Gŏ Dà lơgar sền gròi tus mờ hìu nhă añ den tàng chờ hờp ngan”.

Tàm ală ngai do, hìu nhă ồng Ngô Văn Hồng, kis tàm xã Hoà Bắc, kơnhoàl Hoà Vang, ƀòn dờng Đà Nẵng chờ hờp tŭ rê tàm hìu pa. Nam 1966, ồng Hồng tus bal mờ mpồl ling gàr ƀòn gơtìp cau ling sò tơm cuh sồt să. Tŭ do, ồng là cau ling sồt să khà 4 bơnah 4. Rài kis gơtìp kal ke, hìu nhă ờ hềt kơlôi tus mờ broă geh lơh hìu ơm. Bồ nam do, ồng Ngô Văn Hồng geh gơnoar atbồ ƀòn dờng Đà Nẵng dong kờl 60 tơlăk đong, ồng càn tai priă nàng lơh hìu: “Añ là cau ling sồt să, Dà lơgar kung dong kờl priă pah nhai. Pa do Dà lơgar sền gròi dong kờl priă lơh hìu, rài kis añ gơboh gơbài ngan, bơh tŭ do ờ ngòt tŭ trồ mìu càl pràn tai”.

Ƀòn dờng Đà Nẵng tŭ do geh rơlao 100 rơbô nă cau geh màng mờ dà lơgar. Bơh khà priă Dà lơgar, kes priă ƀòn dờng, ală cau geh nùs nhơm niam, mpồl lơh sa kă bro tă pơgồp, tus tŭ do, ƀòn dờng do neh lơh pa mờ lơh niam wơl 10 rơbô nơm hìu ai cau geh màng mờ dà lơgar in, kờp jơh khà priă geh mờr 330 tơmàn đong. Ồng Lê Văn Minh, Phó Kwang atbồ Sở Lao động, Thương biñ mờ Xã hội ƀòn dờng Đà Nẵng pà git: lài do, khà priă dong kờl lơh hìu nùs nhơm geh bơh 30 tus 40 tơlăk đong den tŭ do neh gơguh tus 60 tơlăk đong tàm 1 hìu, geh hìu geh dong kờl tus 100 tơlăk đong, lơh hìu kơl jăp, sơndră mờ mìu càl pràn: “Broă dong kờl hìu nhă cau geh màng mờ dà lơgar gơtìp kal ke, tàm hơ̆ uă ngan là hìu rơƀah, ƀòn dờng sùm sền gròi mờ đơng lam ai ală tiah in lài ngan. Lơh bè lơi khà kis bơh ală hìu cau geh màng pal ndrờm bal ha là uă rơlao mờ rài kis bè ờs tàm ƀòn. Ƀòn dờng ai jăt jơnau bơo sồr bơh Dà lơgar tơnguh khà priă dong kờl lơh hìu pa. Broă drơng gàr lơh hìu pa kung bè lơh niam wơl hìu ai cau geh màng mờ dà lơgar in pal đơs là kwơ màng ngan, ai geh bơta niam nàng cau geh màng mờ dà lơgar geh hìu ơm kloh niam”.