Lơh geh cồng nha do, bal mờ bơta sền gròi bơcri priă bơh Đảng mờ Dà lơgar dê, gam kơnờm nùs nhơm lơh krơh lam lài bơh tơl nă đảng viên tàm tiah do dê.

02 nam do, sươn zơu tây ơnàng ờ hềt tus dùl sàu bơh hìu bơnhă đảng viên mò Cil Pal Ka Duyên dê ơm tàm thôn Dà Tro, xã Dà Nhim, kơnhoàl Lạc Dương, càr Lâm Đồng neh gơ gơs là anih lơh tơrlòng lài pơlam lơh broă lơh sa pa geh cồng nha ai làng bol tàm tiah do in tus lùp bơsram. Đảng viên mò Cil Pam Ka Duyên pà gĭt, geh cau ngan, broă ngan den broă lơh mblàng yal, hòi jà lơh jăt ală jơnau sồr, gùng dà bơh Đảng dê, adat boh lam bơh Dà lơgar dê hơ̆ sồng gơ cèng wơl cồng nha niam, làng bol hơ̆ sồng đòm jăt mờ lơh jăt. Mò Cil Pam Ka Duyên, đơs: Tŭ gơ gơs là dùl nă đảng viên, añ geh tai tŭ niam nàng gĭt wă loh làng rlau bè ală gùng dà, jơnau sồr bơh Đảng dê, adat boh lam Dà lơgar dê. Kơnờm bơh hơ̆, añ hơ̆ sồng gơtùi lơh niam broă lơh geh Đảng ủy, gơnoar ătbồ dê jàu. Mờ kung bơh hơ̆, añ dong kờl làng bol he geh uă rlau. Mùl màl là hòi jà làng bol tam gơl chi tam, lơh ngan tam tai chi tam lơyah ngai nàng bơtàu tơnguh lơh sa hìu bơnhă. Tŭ do, rài kis làng bol jơi bơtiàn dùl êt nă cau dê tàm tiah do neh ờ huan đau kal ke ir pơndrờm mờ lài.

Ờ mìng đảng viên mò Cil Pam Ka Duyên lơm, uă đảng viên ndai là cau jơi bơtiàn dùl êt nă cau bơh xã Dà Nhim dê kung gĭt wă geh gơnoar broă mờ kơnòl bơh he dê tàm broă lam lơh lòt lài tàm jơh broă. Tàm hơ̆, pal đơs ală srơh tam gơl rơndăp tăp sèng chi tam, dong gơ̆p bơtàu tơnguh lơh sa, dong kờl ngai lơh broă, chi sơntìl, bơta chài tam phan...Kơnờm bơh hơ̆, lơh sa sươn sre bơh Dà Nhim dê neh geh uă chi tam, rơhời lơh gơlik phan lơh geh bơh sươn sre jăt sră dan blơi phan mờ tơnguh uă priă jền phan kă bro. Bơh tŭ tam mìng tờm kơphê lơm, tus tŭ do, Dà Nhim neh rề ơnàng tam uă geh 16 lồ tờm chi lơh sơnơm atiso, 6 lồ zơu tây, 40 lồ bơkàu koh ntê, 300 lồ biăp khoah rbài ală bơta mờ rlau 330 lồ chi sa plai. Khà hìu rƀah kung gơmù uă ngan sơl, tŭ do mìng gam 7% jăt broă jàu pa. Đảng viên mò Cil Pam Ka Phương, Kwang ătbồ thôn Dàrahoa, xã Dà Nhim, pà gĭt: Bol añ mblàng yal, hòi jà ală hìu bơnhă cau jơi bơtiàn dùl êt nă cau tàm thôn kơlôi rơcăng bơtàu tơnguh lơh sa mpồl bơtiàn. Bơh lài tus tŭ do, tờm chi tam tờm ngan bơh làng bol dê là kơphê, ai tŭ do den tam gơl rơndăp tăp sèng chi tam jăt gùng dà broă kă bro, bè biăp sa blơn, khuah ală bơta nàng bơtàu tơnguh rlau tai.

Đảng ƀộ xã Dà Nhim geh jơh ală 122 nă đảng viên, pơrjum tàm 10 ci ƀộ gơwèt bal, tàm hơ̆, đảng viên là cau jơi bơtiàn dùl êt nă cau geh tus 52%. Jăt ồng Kon Sơ Ha Vương, Củ tịc Ủy ƀan Mặt trận dà lơgar Việt Nam xã Dà Nhim yal, bal mờ lơh sa lơh gơlik phan kă bro, gơnoar broă lam lài, lơh krơh bơh tơl nă đảng viên dê neh geh ngui niam tàm uă broă, ngan là ală srơh tàm sơm băt tê bal bơ̆t bơtàu ƀòn lơgar pa, tơrmù rƀah kơ̆ kơl jăp, tam klăc jơi bơtiàn, bơ̆t bơtàu ală anih lơh broă cíñ trị pràn kơldang kơ̆ kơl jăp. Ồng Kon Sơ Ha Vương, đơs: Lơh jăt gùng dà bơh Đảng dê mờ adat boh lam bơh Dà lơgar dê, tơngai lài, Đảng ủy, gơnoar ătbồ neh mblàng yal hòi jà làng bol lơh jăt niam broă lơh bơ̆t bơtàu ƀòn lơgar pa. Mờ jơnau đơs dà lơgar mờ làng bol lơh bal, uă broă lơh gùng lòt, rbàng, brong dà geh bơcri priă lơh kơnhăp ngan. Bal mờ lơh sa bơtàu tơnguh sùm, rài kis phan bơna mờ nùs bơh làng bol dê geh tơnguh uă ngan.

Ngui niam gơnoar broă đảng viên dê tàm tiah jơi bơtiàn dùl êt nă cau, lơh jăt geh cồng nha ală broă lơh bơh xã dê lam lơh, lơh sa- mpồl bơtiàn bơh xã Dà Nhim dê neh geh bơta tam gơl loh làng ngan mờ gam sùm bơtàu tơnguh pah ngai.