Lam lơh jăt Jơnau sồr sồ 05 bơh Ƀộ Cíñ trị dê bè “Lơh pràn bơsram mờ lơh jăt bồ tơngoh, nùs nhơm, broă lơh mờ rài kis Hồ Chí Minh dê”, Thàñ ủy Buôn Ma Thuột, càr Dăk Lăk neh hòi jà đảng viên lơh jăt tềm pềr nàng lơh “Kes priă Đảng viên tềm pềr lơh jăt krơh nùs nhơm Hồ Chí Minh dê”, bơh hơ̆ neh pơgồp bơnah bơtơl tai bơta pin dờn mờ bơta pràn dong uă hìu bơnhă sơrlèt gan kal ke, kơ̆ kơl jăp rài kis.

Tàm hìu bơta nđàc pa geh lơh ơnàng 70 thơk vuông, kờp priă 200 tơlak đong, bi Nguyễn Thị Tặng là đảng viên gơwèt Đảng ƀộ sơnah ƀòn Thành Công, ƀòn dờng Buôn Ma Thuột chờ hờp ngan. Mờ kờp jơh priă lơh geh bơh 2 nă ùr bơklau bi dê là rlau 10 tơlak đong pah nhai, hìu bơnhă bi Tặng mìng gơtùi tơl ngui sa tàm rài kis, ròng bàr nă kòn in lòt bơsram lơm. Kơnờm bơta dong kờl di tŭ 70 tơlak đong bơh Kes priă “Đảng viên tềm pềr lơh jăt krơh nùs nhơm Hồ Chí Minh dê” bơh ƀòn dờng Buôn Ma Thuột dê, mờ bơta dong kờl bơh cau pròc mhàm tàm hìu bơnhă dê, tŭ do jơnau kơ̆p kờñ lơh hìu kơnhăp bơh bi Tặng dê hơ̆ rồng gơ gơs ngan ngồn. Bi Nguyễn Thị Tặng, đơs: Ờ tŭ lơi kơlôi geh tus ngai do geh hìu do, añ kơlôi sùm añ mìng blơi geh ù lơm, ai hìu den kung ờ hềt tŭ lơi kơlôi tus sơl tài bơh priă gơ dờng ir gơwèt mờ priă lơh geh bơh 2 nă ùr bơklau dê ròng 2 nă kòn tài bơh hìu gam mè kra tai. Geh hìu do chờ hờp ngan mờ ngoh rơngăc ngan, ala măt hìu bơnhă kung ưn ngài ală oh mi đảng viên tàm jơh gùt đảng ƀộ geh bơta sền gròi dong kờl ai hìu bơnhă in.

Tài bơh sơnam dờng, să jan lơbơn ñâm ñô, lơh sa kal ke den tàng ồng Nguyễn Văn Châu, 62 sơnam, mŭt đảng neh 30 nam do ơm tàm Mpồl ƀòn drà 5, sơnah ƀòn Tự An, ƀòn dờng Buôn Ma Thuột kung gam ờ hềt gơtùi lơh kơnhăp wơl hìu neh lơh pơgăp mờ do 30 nam bulah neh ờ gam niam tai uă nam do. Tềng đăp bơta hơ̆, nhai 04 nam 2021, geh dong kờl 25 tơlak đong bơh priă jền Kes priă “Đảng viên tềm pềr lơh jăt krơh nùs nhơm Hồ Chí Minh dê” bơh ƀòn dờng Buôn Ma Thuột dê bal mờ priă tềm pềr tai, hìu bơnhă ồng Châu neh lơh kơnhăp wơl hìu niam rlau mờ lài. Ồng Nguyễn Văn Châu, đơs: Lài do hìu kung ờ gam kơnhăp tai bờh, ñhăt dà mìu, tơngai jroh tơngai sa, kơnờm geh bơta sền gròi bơh Thàñ ủy dê neh dong kờl, 2 nam do añ kung di đau dùl bơnah lơi ờ gơtìp mìu càl rbŭt dờng lơh aniai tai tài bơh să jan añ kung neh lơbơn rao. Kung dan ưn ngài ngan sơl.

Geh lam lơh bơh nam 2013 tus tŭ do, Kes priă Đảng viên tềm pềr lơh jăt krơh nùs nhơm Hồ Chí Minh dê bơh ƀòn dờng Buôn Ma Thuột dê neh lơh geh bơta gơrề niam ngan, gơhòi gơ jà gal ngan kwang bàng, đảng viên mờ làng bol lơh bal. Nàng lơh geh kes priă, ală Đảng ủy, Ci ủy, Ci ƀộ gơwèt bal mblàng yal, hòi jà kwang bàng, kông cưk, viên cưk là đảng viên bơh anih lơh broă, mpồl lơh broă he dê tus bal tă pơgồp bal mờ khà loh làng: Cau dơ̆ dùl tă pơgồp bơh 30 rbô đong dùl nhai, cau dơ̆ bàr tă pơgồp bơh 15 rbô đong dùl nhai, cau dơ̆ pe tă pơgồp bơh 6 rbô đong rlau hơđang dùl nhai mờ cau dơ̆ puan hòi jà tă pơgồp jăt nùs nhơm dong kờl is. Kờp bơh nam 2013 tus tŭ do, Kes priă Đảng viên tềm pềr lơh jăt krơh nùs nhơm Hồ Chí Minh dê lơh geh rlau 8 tơmàn 600 tơlak đong. Bơh hơ̆, dong kờl lơh pa mờ lơh niam wơl 15 nơm hìu ơm, dong kờl bơtàu tơnguh lơh sa 11 nă cau, dong kờl sơm kòp 697 nă mờ bàr pe bơta dong kờl ndai. Ồng Trần Văn Châu, Phó Kwang ătbồ Ƀan Tuyên giáo Thàñ ủy Buôn Ma Thuột, càr Dăk Lăk, pà gĭt: Kes priă do añ gŏ là geh kwơ mờ niam chài kòn bơnus ngan. Lài ngan là dong kờl ai ală đảng viên tìp kal ke, gơtŭ gơtơl in, rềs àr gơ aniai nisơna hơ̆ sồng bàr pe nă đảng viên rƀah kờñ lơh sa mơya ờ huan geh priă jền den bol añ kung neh dong kờl den khi bơtàu tơnguh niam ngan, hơ̆ sồng đảng viên geh hìu neh ờ gam niam tai, ờ kơnhăp tai, đảng viên ờ geh priă jền lơh hìu den kung geh mpồl đơng lam kes priă sền swì mờ dong kờl di tŭ, khi gŏ gơlơh geh mpồl Đảng sùm ơm bal mờ khi.

Gơtùi sền gŏ, bơh ală bơnah priă tềm pềr dềt rơhền neh gơ gơs priă dờng. Do là broă lơh gơcèng bơta niam chài kòn bơnus uă ngan, geh bơta kwơ ngan ngồn tàm rài kis, nàng kờñ lơh jăt ngan ngồn broă bơsram mờ lơh jăt krơh Wa Hồ dê bơh Đảng ƀộ mờ làng bol ƀòn dờng Buôn Ma Thuột, pơgồp bơnah dong cau cíñ săc, đảng viên sơrlèt gan kal ke, brồ guh tàm rài kis.