Nam do, 62 nă cau bơsram dờng jơi bơtiàn dùl êt nă cau càr Dăk Lăk dê geh cồng nha bơsram jak, jak ngan gam bơsram tàm ală hìu bơsram Kao đẳng, Đại họk tàm jơh gùt lơgar geh jờng rơ mờ pà phan ƀàn.

Đơs tàm dơ̆ bơyai lơh, ồng Y Biêr Niê, Phó Ƀí thư Tỉñ ủy càr Dăk Lăk neh chờ hờp jờng rơ mờ tơlik nùs nhơm tơngŏ bơta chờ hờp ngan bè cồng nha lơh geh bơh broă bơsram sră mờ bơsram tàp bơh ală cau bơsram dờng dê. Mơkung kơ̆p kờñ, ơruh pơnu jơi bơtiàn dùl êt nă cau tàm ù tiah càr dê pơn jăt tai lơh ngan pơđơl pràn bơsram sră, bơsram tàp nùs nhơm bồ tơngoh mờ rài kis, pal dòn kơnờm jơh tàm gùng dà lam bồ bơh Đảng dê, gùng dà broă lơh mờ adat boh lam bơh Dà lơgar dê, đòm jăt bơhiàn tam klăc bal jơh gùt jơi bơtiàn, jơh nùs tă pơgồp bơ̆t bơtàu ƀòn lơgar, dà lơgar pas sơm niam bơnĕ. Mờ ală kâp ủy Đảng, Gơnoar ătbồ, Mặt trận Dà lơgar mờ ală mpồl cíñ trị- mpồl bơtiàn lơh jăt niam mờ geh cồng nha ală gùng dà broă lơh bơh Đảng mờ Dà lơgar dê gơ wèt mờ tiah làng bol jơi bơtiàn dùl êt nă cau mờ tiah kơh bơnơm, ngan là ală broă dong kờl bè bơcri bơtàu tơnguh bơto bơtê mờ tơnguh uă cồng nha mpồl cau lơh broă tàm càr.