Pa do, Mpồl tam klac cau ùr Việt Nam neh bơyai lơh “Ngai chờ cau ùr sơn đờm mut lơh broă’ mờ tơngume “Cau ùr Dăk Lăk sơn đờm mut lơh broă, tam gơl pa bơceh lơh mờ tàm tơrbŏ bal mpồl lơh sa kă bro”. Ngai chờ geh lơh uă broă lơh bè: yal tơnggit phan bơna sơn đờm mut lơh broă bơh cau ùr dê, tơn jơh dơ̆ pơrlòng jơnau bơceh lơh sơn đờm mut lơh broă kă bro nam 2023; cribơyai broă rơndap lơh kă bro rài 4.0; jàu priă dong kờl ai càn cau ùr sơn đờm mut broă in.

Do là tŭ nàng oh mi cau ùr tàm càr geh tìp mat lơh kwèng, tam pà mờng chài tàm broă lơh sơn đờm mut lơh broă, sơn đờm kă bro, bơtàu tơnguh lơh sa; jờng rơ ală krơh niam cau ùr pơn rơ gơguh jak tàm lơh sa, kă bro. Tus bal ngai chờ, bi H’Chi Mlô ơm tàm xã Ea Đar, kơnhoàl Ea Kar, càr Dăl Lăk đơs: “Añ tus ndo tus bal Ngai chờ cau ùr sơn đờm mut lơh broă mờ gơnoar broă là cau tàm tơrbŏ jơh ală phan bơna sơn đờm mut lơh broă bơh oh mi cau ùr tàm kâp hơ đơm dê cèng tus, tài do kung là tŭ niam nàng ală cau tàm mpồl cau ùr in geh cèng phan he lơh is nàng yal tơnggit, tàm tơrbŏ, lơh gơlik drà kă bro pa, ai geh broă lơh oh mi cau ùr in, ngan là oh mi cau ùr jơi bơtiàn dùl êt nă cau”.

Tàm tơngume broă lơh Ngai chờ cau ùr sơn đờm mut lơh broă càr Dăk Lăk nam 2023, Mpồl tam klac cau ùr Việt Nam càr Dăk Lăk bơyai lơh Cribơyai Broă rơndap lơh kă bro rài 4.0 nàng kờñ bơto jơnau git wă, mờng chài mờ ală broă lơh dong kờl cau ùr sơn đờm mut lơh broă, sơn đờm kă bro.

Tàm cribơyai, ală kwang bàng neh geh iat ală cau jak chài yal bè ală tơngume mìng dùl lơm bè: Ală bơta bal bè broă rơndap lơh kă bro gơ hòi gơ jà cau blơi rài 4.0; broă lơh hòi jà kă bro tàm Dăk Lăk tŭ do- ală tŭ niam mờ bơta lòng gơ wèt mờ cau ùr tàm sơn đờm mut lơh broă, kă bro; lơh niam broă rơndap lơh, tơnguh priă jền lơh geh- mờng chài bơh ală mpồl lơh sa kă bro khà dùl dê. Uă oh mi cau ùr kung tơlik jơnau lùp cribơyai mờ cau jak chài bè ală broă mờ he sền gròi tàm tŭ bơt bơtàu măt kă bro, lơh gơlik phan bơna mờ jòi anih blơi ai phan lơh gơs in. Bi Nguyễn Thị Ngọc Thắng ơm tàm sơnah ƀòn Tân Lập, ƀòn dờng Buôn Ma Thuột pà git: “Tơngume mờ añ kờñ hơ̆ là lơh broă rơndap lơh kă bro ngan ngồn lài mờ tŭ đơng lam dùl mpồl lơh sa kă bro. Do là bơta mờ mpồl lơh sa kă bro añ kung gam ờ tơl tài añ kung là dùl nă cau lơh broă mpồl bơtiàn, añ sơn đờm mut lơh broă jat gùng dà bơsong broă ai mpồl bơtiàn in den tàng ờ hềt geh jơnau bơceh lơh lơi ai broă lơh mpồl lơh sa kă bro añ dê. Den tàng, ală tơngume bè do ngan ngồn là pal geh nàng añ gơtùi git mpồl lơh sa kă bro he dê pal lơh bè lơi”.

Mờ ală jơnau tơnggit ngan ngồn, cribơyai neh dong ală oh mi cau ùr geh tai ală jơnau git wă, mờng chài mờ broă lơh dipal nàng khin cha sơn đờm mut lơh broă, sơn đờm kă bro; ngui ală măi mok nàng tơnguh bơta niam phan lơh gơs, bơt bơtàu mat kă bro, pràn jak tàm pơrlòng. Kung di dơ̆ do, Mpồl tam klac cau ùr Việt Nam neh bơyai lơh dar dut ndơl dơ̆ pơrlòng jơnau bơceh lơh sơn đờm mut lơh broă kă bro nam 2023. Dơ̆ pơrlòng neh dờp geh 84 sră nggal bơh ală cau tàm mpồl cau ùr tàm càr tus bal. Ală rơndap broă tus bal pơrlòng tàm jơh ală gah, tơrgùm uă ngan rlau jơh tàm gah lơh sa suơn sre mờ ală phan tiơng pơn rơ càr dê bè kơphe, ka kau, tàñ ồi kòn cau, ƀĕ tơrnờm. Tàm hơ̆, “Phan bơkah geh kuơ să jan in bơh gar kơnia” neh jak ngan ai geh khà dùl. Mò Tô Thị Tâm, Củ tịc Mpồl tam klac cau ùr Việt Nam càr Dăk Lăk, kwang atbồ mpồl bơyai lơh dơ̆ pơrlòng pà git: “Khà cau tus bal pơrlòng nam do gal ngan mờ rơndap broă rơcang lài niam ngan, mblàng loh làng, ngui ală phan bơh jŏ tàm ƀòn lơgar nàng lơh gơs phan bơna kă bro. Mpồl ai điểm kung neh pơyua cau pơrlòng in pơn jat tai bơto pơlam, bơ tơl tai tàm rơndap lơh he dê nàng gơ gơs ngan ngồn, geh bơta niam, kuơmàng sền gròi tus bơta marketing mờ bơta niam phan lơh gơs, kơldung ơn phan nàng yal tơnggit tus tiah ndai nàng cau git phan he dê”.

Sền gŏ cau ùr sơn đờm mut lơh broă ờ ơm bơdìh gùng dà tam gơl sồ bal bơh gùt lơgar dê, ală nam do, mpồl tam klac cau ùr Việt Nam neh geh uă broă lơh nàng cau ùr sơn đờm mut lơh broă git rài lơh sa sồ. Bơdìh mờ ală ơdŭ bơto pơlam nàng oh mi cau ùr lơh kwèng mờ bơta chài pal geh, Mpồl gam dong kờl ală anih kă bro điện tử, tàm tơrbŏ ală mpồl pơlam tàm Hiệp hội kă bro điện tử, bơh hơ̆, oh mi cau ùr bơsram bơta chài kă bro, yal tơnggit ală phan lơh gơs tàm anih kă bro điện tử. Mò Nguyễn Thị Minh Hương, Phó Củ tịc Mpồl tam klac cau ùr Việt Nam pà git: “Bơta gŏ loh làng ngan rlau jơh hơ̆ là tàm ală càr, ƀòn dờng, tŭ ală broă lơh drà, ngai sơn đờm mut lơh broă den sùm geh bơta pơgồp bal đah ală gah broă lơh mờ Mpồl tam klac cau ùr Việt Nam nàng dong kờl oh mi cau ùr tus bal ală broă lơh hơ̆. Tơngai tus, mpồl kung rơp pơn jat tai dong kờl cau ùr sơn đờm mut lơh broă mut tàm drà kă bro mơya tơrgùm uă tàm lơh sa mpồl bal mờ cau ùr sơn đờm mut lơh broă tàm gah ngui kông nghệ kao, dong kờl bơtàu tơnguh gah lơh sa suơn sre tơlir mờ sàng goh nàng dipal mờ gùng dà bơtàu tơnguh tơlir mờ kơ̆ kơljap tŭ do”.