Lơh jăt broă lơh Mè dong kờl bơh Mpồl lam lơh Dà lơgar dê, tàm 2 nam do, Mpồl tam klăc cau ùr càr Dăk Lăk neh pơgồp bal mờ ală mpồl cau, cau dùl nă să, cau geh nùs nhơm niam mờ ală kấp Mpồl cau ùr dờp dong kờl ai 685 nă kơnòm dềt kòn đời tàm gùt càr mờ kờp jơh khà priă dong kờl rlau 7 tơmàn 800 tơlak đong.

Mờ bơta dong kờl bơh ală Mè dong kờl dê, ală kơnòm dềt geh dong kờl jơh bal bè nùs nhơm mờ phan bơna, bơta sền gròi, kờñ gơboh, dong ală kơnòm dềt hời rơ hờp bơtơl wơl ală bơta sươ̆i siar bè nùs nhơm, bơta kờñ gơboh. Di dơ̆ do, Mpồl bơyai lơh neh jàu priă bơsram ai 14 nă kơnòm bơsram kòn đời sơr lèt gan kal ke bơsram jăk, jàu 120 phan pà ai ală kơnòm dềt kòn đời geh rài kis kal ke in; jờng rơ 31 nă cau dùl nă să mờ mpồl cau pơn rơ jak tàm broă lơh Mè dong kờl tàm 2 nam do.