Rê wơl tàm hìu tơnơ̆ 5 ngai lòt ơm rlô să tàm Anih tờm ròng siam cau geh màng mờ dà lơgar bơh càr Dăk Lăk dê, cau ling kòp tê jê să ồng Y Siêng Niê ơm tàm ƀòn Chiêng Kao, xã Dăk Phơi, kơnhoàl Lăk kung gam bềng lìu bơta ngoh rơngac: “Lòt chờ hờp ngan, ñô sa wil tơl ngan, gròi sền ală bơta niam ngan. Càr Nghệ An kung geh, càr Sóc Trăng kung geh sơl, kơnhoàl Ea Kar, Buôn Đôn, Ea Súp, Cư Kuiñ bal mờ gơp đơs jơnau đơs crih “5 nă oh mi tàm dùl nơm rơndeh sơtang”, hơ̆ sồng “sing ồs tĕ oh”, chờ hờp ngan, mang lơi kung đơs crih lơm, yal jơnau rài yau, tềng do añ tam lơh, tềng ne añ lơh. Klo ngai den lòt nhơl gùt dar ƀòn dờng Buôn Ma Thuột”.

Tàm hìu pa lơh, bi Y Mực Liêng, kòn klau bơh cau ling kòp tê jê să ồng Y Hiên Ông dê ơm tàm ƀòn Sruông, xã Bông Krang, kơnhoàl Lăk pà git, ờ duh gam pal kơlôi rơcang trồ tơngai, trồ mìu tai den tàng nùs nhơm mờ pràn kơldang să jan bèp bi dê neh tam gơl niam rlau, hìu bơnhă kung iang nùs lơh broă, bơtàu tơnguh lơh sa: “Bèp añ dê geh màng mờ dà lơgar mờ ồng geh dong kờl 1 nhai 3 tơlak đông mờ dà lơgar dong kờl tai 50 tơlak đông, hìu bơnhă càn tai nàng lơh hìu bèp añ in. Kơnờm geh dà lơgar dong kờl priă jền nàng kơlôi rơcang bèp añ in mờ rài kis pah ngai kung geh dong kờl sền gàr pràn kơldang să jan niam rlau. Añ dan ưn ngài gơnoar atbồ tàm ƀòn lơgar neh lòt lùp còp mờ pà phan bèp añ in”.

Jat mò Phạm Thị Lệ Vân, lơh broă tàm Cơldŭ Lao động- Thương ƀiñ mờ Xã hội kơnhoàl Lăk pà git, ndrờm bè 1 rbô 489 nă cau geh sră dong kờl bơh dà lơgar, cau geh màng mờ dà lơgar tàm kơnhoàl ndrờm neh geh gròi sền wil tơl mờ geh rài kis ndrờm halà jơnhua rlau mờ khà kờp bal. Tŭ do, kơnhoàl gam tơrgùm dong kờl nàng ờ gam hìu lơi pal kis kal ke: “Gơ wèt mờ kơnhoàl Lăk den broă lơh mblàng yal mờ tă priă dong kờl ai ală cau do in den geh lơh wil tơl, di tŭ, mơya kung gam 12 hìu bơnhă gơ wèt hìu bơnhă rƀah. Nàng pơn đơl dong 12 hìu bơnhă hơ̆ lik klàs rƀah den kung yal mờ Sở Lao động in nàng geh broă rơndap lơh gơ jat tàm tơl bơta geh ngan bơh tơl hìu bơnhă dê den dong kờl hìu ơm, dilah neh geh hìu den dong kờl kơnrồ halà sơntìl phan tam halà dong kờl sră tềm pềr priă”.

Jat Sở Lao động- Thuơng ƀiñ mờ Xã hội càr Dăk Lăk pà git, tŭ do gùt càr geh rlau 45 rbô nă cau geh màng mờ dà lơgar, tàm hơ̆ rlau 10 rbô nă cau gam dờp priă dong kờl pah nhai. Tàm ală nam do, ală broă lơh gròi sền ai cau geh màng mờ dà lơgar mờ hìu bơnhă geh sră dong kờl bơh dà lơgar in sùm geh càr Dăk Lăk sền gròi dipal. Mìng is tàm nam do, càr neh lam lơh uă dơ̆ mờ mờr 400 nă cau geh màng mờ dà lơgar lòt ơm rlô să tơrgùm bal, lòt nhơl ñŏ; lam lơh lòt còp, pà phan ai ală cau geh màng mờ dà lơgar in mờ kờp jơh priă tă lơh rlau 15 tơmàn đông. Di ngai 27/7 nam do, càr kung tă rlau 6 tơmàn đông nàng gròi sền ai cau geh màng mờ dà lơgar mờ hìu bơnhă geh sră dong kờl bơh dà lơgar.

Bulah bè hơ̆, ồng Nguyễn Quang Thuân, Phó Kwang atbồ Sở Lao động- Thương ƀiñ mờ Xã hội càr Dăk Lăk pà git, kờp tus lồi nam 2022, càr kung gamr lau 900 hìu bơnhă geh sră dong kờl bơh dà lơgar gơ wèt hìu bơnhă rƀah jat tơl khà uă gah, rlau 600 hìu bơnhă gam kal ke bè hìu ơm. Tơngai tus, càr rơp tơrgùm tơl priă jền nàng ờ gam hìu bơnhă rƀah tàm hìu bơnhă geh sră dong kờl bơh dà lơgar mờ cau geh màng mờ dà lơgar: “Pơn đơl pràn tus jơh nam 2024 rơp gơtùi bơsong gơ wèt mờ ală hìu bơnhă geh sră dong kờl bơh dà lơgar tŭ do gam gơtìp kal ke bè hìu ơm, dơ̆ 2 là dong lik klàs rƀah. Jơh rƀah tàm do den geh uă jơnau, jơnau bè uă bơta den geh uă broă digơlan là rơp pơgồp bal mờ ală sở, mpồl, gah broă lơh tàm tơl gah bơh Sở hơ̆ dê drơng lơh nàng geh kơnòl bơsong mờ gơ wèt mờ ală hìu bơnhă neh jơh sơnam lơh broă halà ờ geh phan bơna nàng lơh broă lơh sa den sồr tơmut tàm mpồl cau dong kờl mpồl bơtiàn pah nhai mờ creh mat lik bơh mat hìu bơnhă rƀah. Càr rơp geh ală broă lơh kuơmàng ngan rlau jơh nàng bơsong, dong kờl ală hìu bơnhă geh sră dong kờl bơh dà lơgar”.