Geh ù tiah ơm rềp tiah tờm ƀòn dờng Gia Nghĩa, xã Dăk Nia geh càr Dăk Nông bơ̆t bơtàu là tiah lòt nhơl mpồl bơtiàn bơh làng bol kòn cau M’Nông, Mạ dê; sền gàr, ngui niam bơhiàn niam chài ờs mờng bơh yau bè dròng cing jañ mồng, lơh wơl ală dơ̆ lơh chờ lơh yàng. Xã neh bơ̆t bơtàu geh ƀòn tàñ ồi yau mờ tàñ phan, mpồl lơh broă bal ƀĕ tơrnờm..., lơh geh ală phan bơna pơnrơ mùl gŏ is drơng lòt nhơl in. Pơgồp bơnah tàm cồng nha lơh geh hơ̆ geh gơnoar broă bơh đoàn viên ơruh pơnu dê bal mờ ală srơh lam lài tài rài kis mpồl bơtiàn, tus bal lơh ală broă lơh sền gàr bơhiàn niam chài krơi is, lơh sàng goh tiah ơm kis, gàr ai ƀòn lơgar in tơlir- goh- niam. Bơh ală broă lơh đoàn, uă ơruh pơnu jơi bơtiàn dùl êt nă cau neh chờ hờp geh tơmŭt Đảng. Đảng viên kơnòm să là bi H’Don, Phó Ƀí thư Đoàn xã Dăk Nia, pà gĭt: Mờ gơnoar broă là Phó Ƀí thư Đoàn xã den añ kung sùm yờ tơnguh nùs nhơm jơh nùs jơh tồr, bơsram mờ lơh jăt nùs nhơm bồ tơngoh mờ broă lơh Hồ Chí Minh dê tàm broă lơh. Añ kung pơn jăt tai mblàng yal ai ală đoàn viên ơruh pơnu ndai in lơh ngan pơđơl pràn ngan nàng gơ gơs là đảng viên ndrờm bè añ sơl.

Ai đảng viên kơnòm să bi Đỗ Thị Hạnh, là kwang bàng cơldŭ lơh broă dùl mpồng xã Dăk Nia, yal: Đòm jăt nùs nhơm “đảng viên lòt lài, làng bol jăt tơnơ̆”, añ kung sùm lơh ngan pơđơl pràn ngan lơh krơh is, lơh jăt niam ngan jơnau sồr bơh anih lơh broă dê, jơnau sồr bơh adat boh lam dê mờ tàm rài kis pah ngai. Bal mờ hơ̆ den tàm ală dơ̆ pơrjum Ci ƀộ, añ kung sùm dan mờ tă pơgồp jơnau đơs tàm ală sră cih jơnau rơcăng cih kơrnoăt nàng kờñ ai tơlik geh gùng dà, kơnòl broă mờ broă lơh nàng bơ̆t bơtàu broă lơh ai nhai tus in geh niam rlau.

Ồng Lê Đình Cường, Ƀí thư Đảng ủy xã Dăk Nia pà gĭt, Đảng ƀộ xã geh 217 nă đảng viên pơrjum tàm 20 Ci ƀộ. Gĭt nền gơnoar broă lam lài bơh đảng viên dê tàm ală broă lơh sa- mpồl bơtiàn, xã sùm sền gròi broă lơh tơmŭt đảng ai uă cau in, ngan là tàm tiah jơi bơtiàn dùl êt nă cau. Prao nhai bồ nam do, Đảng ƀộ xã neh tơmŭt đảng pa ai 3 nă cau in, tàm hơ̆ geh 2 nă cau jơi bơtiàn dùl êt nă cau. Tŭ do, Đảng ủy gam lơh ală sră nggal rơcăng tơmŭt đảng tai ai dùl nă cau in là kòn cau Mạ. Ồng Lê Đình Cường, Ƀí thư Đảng ủy xã Dăk Nia, đơs: Ală đảng viên kơnòm să den geh bơto bơtê wil tơl bơh ală hìu bơsram đại họk mờ tŭ do den Đảng ủy kung ai tơl bơta ai lòt bơsram ală ơdŭ cribơyai jơnau tàm sră pơ àr cíñ trị, bơh hơ̆ ală oh mi đòm jăt nùs nhơm geh kơnòl lơh jăt niam ală kơnòl broă geh jàu. Den Đảng ủy kung sền gròi sơl broă lơh tơmŭt đảng ai uă cau in, ngan là tơmŭt đảng ai uă cau in tàm tiah jơi bơtiàn dùl êt nă cau in. Mờ tàm tơngai tus, den bol añ kung neh geh ală broă lơh, broă jàu broă tơmŭt đảng ai uă cau in gơ wèt mờ ală ci ƀộ mờ gơ jăt bal mờ kơnòl bơh tơl nă oh mi Ƀí thư Ci ƀộ kung bè là gơ wèt mờ ală đảng viên drơng kơnòl broă ƀòn lơgar in.

Lơh jăt niam gơnoar broă lam bồ bơh Đảng dê, sền gròi tơmŭt đảng ai uă cau in tàm tiah jơi bơtiàn dùl êt nă cau, neh pơgồp bơnah dong xã Dăk Nia lơh sir broă lơh bơ̆t bơtàu ƀòn lơgar pa bơh nam 2018. Đảng ƀộ, gơnoar ătbồ xã bal mờ làng bol gam lơh ngan bơtàu tơnguh lơh sa- mpồl bơtiàn nàng tơnguh priă lơh geh kờp bal dùl nă cau tàm dùl nam geh rlau 60 tơlak đong mờ tus nam 2025 xã rơ̆p ờ gam tai hìu mờr ndrờm bè hìu rƀah.