Mờr 1 rbô nă làng bol tàm tiah đah mat tơngai lik càr Gia Lai neh tus bal broă lơh kham sac rơ wah kòp plai nùs ờ sa priă bơh Mpồl sền gàr mờ dong kờl cau kòp rƀah càr pơgồp bal mờ Hìu sơnơm dà lơgar Huế mờ ală mpồl bơyai lơh.

Bơh kham sền, ală ƀák sìh git gŏ geh 39 nă cau pal reh plai nùs, tàm hơ̆ geh 16 nă kơnòm dềt rơp geh dong kờl reh ờ sa priă. Bơdìh mờ broă kham mờ sồr reh, ală ƀák sì kung pơlam sền gàr pràn kơldang să jan, sàu sa dipal nàng kờñ dong kơnòm dềt geh să jan pràn kơldang lài mờ tŭ, tơnơ̆ tŭ sơm. Broă lơh kham sac rơ wah kòp plai nùs ờ sa priă geh gàr sùm uă nam do neh cèng wơl tŭ niam git gŏ gờñ mờ sơm di tŭ ai git nđờ rbô nă cau kòp in tàm càr Gia Lai, pơgồp bơnah tơrmù khà chơt să tài kòp plai nùs mờ cèng wơl tơnơ̆ do niam bơnĕ rlau ai kơnòm dềt rƀah in.