Gùt càr tŭ do geh 424 nơm ơhò lơh ka ờ geh tơl ală bơta jat jơnau sồr nàng lơh broă tài ơhò lơh ka ờ lơh jat jơnau sồr cih mat, sền swì bơta kơ̆ kơnhăp, lơh sră ai gơnoar kup phan halà lơh broă tìs broă geh ai. Bơh hơ̆, rlau 2 rbô 100 nă cau là cau tờm ơhò mờ cau tàm ơhò lơh ka gơtìp gơ rềng. 

Jat Jơnau lơh nền tàm pơrjum bơh Mpồl duh broă Làng bol càr Gia Lai dê, tơl nă cau tờm ơhò geh dong kờl 3 tơlak đong dùl nhai mờ 30 kĭ phe dùl nă cau dùl nhai ai ală cau lơh broă gơtìp gơ rềng in, tàm tơngai 4 nhai. Kờp jơh priă tă dong kờl kờp dŭ rlau 8 tơmàn 840 tơlak đong bơh kes priă càr dê. Broă dong kờl do nàng kờñ dong cau kup ka geh tai priă jền gàr kơ̆ rài kis, tam gơl broă lơh dipal, mờ kung pơgồp bơnah sang tĕ jơnau tơngkah “sră rơmit” bơh Anih duh broă câu Âu dê bè kup phan tàm dà lềng tìs mờ jơnau sồr IUU, wèt tus bơtàu tơnguh broă kup ka kơnhăp jŏ mờ lơh jat jơnau sồr bơh ală lơgar dê.