Jơh dùl poh do, pah tŭ àng drim gờñ, mờr 400 nă làng bol tàm sàh tiah nhàr lơgar Ia O, càr Gia Lai geh mat wil tơl tàm anih tờm sàh dê nàng bơsram pơrlòng măi rơndeh moto khà A1. Là sàh geh mờr 70% làng bol jơi bơtiàn dồ êt nă cau, rài kis gam uă kal ke, den tàng broă geh bơto bơtê mờ pơrlòng nàng lơh sră măi rơndeh ờ sa priă den tàng làng bol chờ hờp ngan. Bi Ksor Thí ơm tàm ƀòn O, sàh Ia O pà git: “Añ git măi rơndeh neh bơh jŏ rau mơya ờ hềt geh sră măi rơndeh. Tơnơ̆ tŭ geh mblàng yal, añ neh cih mat dan bơsram nàng git loh jơnau git wă, adat boh lam bè rơndap tap sèng lơngăp lơngai lòt rê tàm gùng. Ngan là tŭ jơh bơsram, pơrlòng geh sră măi rơndeh den să tờm he măi rơndeh rơndồ lòt rê rơp lơngăp lơngai rlau”.

Nàng dong làng bol ƀuơn git, ală mpồl lơh broă geh gơnoar neh pơgồp bal pờ ơdŭ bơsram tàm sàh tơn. Bơdìh mờ bơto pơlam jơnau git wă bè Adat gùng lòt ù gờl, làng bol gam geh pơlam lơh ngan ngồn ală jơnau pơrlòng ai lơh pơn yơu bè: lòt dar sồ 8, lòt tàm creh gùng song, sơrlèt gan phan bơkang. Mò Võ Thị Hà, Phó Kwang Lam bồ Anih tờm bơto bơtê mờ pơrlòng lơh sră măi rơndeh sơnah ƀòn Pleiku, càr Gia Lai pà git, broă pờ ơdŭ bơsram tàm tiah ngài neh geh kờp dŭ nền nòn nàng gơ di mờ làng bol mơya kung gam gàr bơta niam: “Lam lơh bàr pe tơngume bè cùp rùp, lơh sră pơ àr dan bơsram làng bol in. Tàm anih tờm bơto măi rơndeh kung gam geh broă lơh ờ sa priă bơsram jơh tơn, ngan là ai làng bol hìu bơnhă rƀah, ndrờm bè cau rƀah in”.

Bơh kòp sền, tàm càr Gia Lai gam git nđờ rbô nă làng bol ờ hềt geh sră măi rơndeh khà A1, tơrgùm uă tàm ală sàh tiah ngài, tiah jơi bơtiàn dồ êt nă cau. Thượng tá mò Ksor H’Bơ Khắp, Phó Kwang Lam bồ Kwang àng càr Gia Lai pà git, nàng bơsong bơta do, bơh bồ nam 2025 tus tŭ do, Kwang àng càr Gia Lai neh sồr mpồl lơh broă geh gơnoar pơgồp bal mờ ală anih tờm bơto bơtê – pơrlòng lơh sră măi rơndeh, gơnoar atbồ ƀòn lơgar, ală anih lơh sơnơm tàm càr mờ ală cau, ală mpồl dong kờl bơyai lơh kham pràn kơldang să jan, bơto bơtê, pơrlòng ờ sa priă, lơh sră măi rơndeh khà A1 ai làng bol tàm jơh ală sàh, sơnah ƀòn geh jơnau kờñ in: “Ờ mìng lơh tàm tiah sar lơgar ngài, tiah nhàr lơgar mờ kờp bal tàm ală sàh, sơnah ƀòn tiah tờm bulah geh priă jền, mơya rài kis kal ke kung kờñ geh dà lơgar dong kờl. Pơn jat hơ̆, bol hi pơgồp bal tàm broă geh gơ rềng tus lam lơh kơnòl lơh sră măi rơndeh. Bơyai lơh pơrjum mờ lơh broă mờ ală mpồl lơh sa kă bro, ală cau geh nùs nhơm niam dong kờl cih mat nàng lam lơh ală broă dong làng bol gơtùi lơh jat broă pơrlòng mờ geh sră măi rơndeh”.

Jat broă rơndap lơh, bơh tŭ do tus jơh nam 2025, Kwang àng càr Gia Lai bal mờ ală mpồl geh gơ rềng tơlik jơnau kờñ lam lơh bơto bơtê, pơrlòng mờ lơh sră măi rơndeh khà A1 ai mờr 47 rbô nă cau bơsram in, uă ngan là làng bol jơi bơtiàn dồ êt nă cau. Broă lơh do gam là broă lơh kuơmàng nàng tơnguh jơnau git wă adat boh lam, pơgồp bơnah tơrmù ƀà rềs àr gùng lòt dồ bă kơnhăp jŏ tàm mpồl bơtiàn làng bol jơi bơtiàn dồ êt nă cau tàm càr.