Tơn jơh mpồl broă lùp mờ hơ jơnau lùp gơwèt mờ gah broă jơi bơtiàn kòn cau, Củ tịc Quôk hội ồng Vương Đình Huệ cih dờp dơ̆ pơrjum lùp mờ hơ jơnau lùp geh bơyai lơh duh hồl, geh kơnòl, song dơ pă mờ bơt bơtàu. Sơñio loh uă bơta gam gơ kòl, ờ hềt lơh niam, ngan là broă lơyài lam lơh ală broă lơh jơnau kờñ dà lơgar.

Bàr pe sră nggal bơto pơlam ai lơh jat lơyài halà ờ tơl bơta dùl ròt bal, ờ hềt loh làng, ờ hềt geh khà dơ̆ ngan ngồn, Củ tịc Quôk hội sồr tàm tơngai tus kràñ cê jơh nùs lam lơh ală broă lơh nàng lơh ngan ngồn kơrnoat boh lam tơl làm, di tŭ ală gùng dà broă lơh, pơlam gùng dà kwơ màng bè broă lơh jơi bơtiàn kòn cau ai tơngai bơh nam 2021-2030. Hòi  tơrgùm tơl bơta pràn nàng bơcri priă bơtàu tơnguh lơh sa- mpồl bơtiàn tiah làng bol kòn cau dùl ết nă cau mờ tiah kơh bơnơm in; tàm hơ̆, tơrgùm tàm ù tiah kal ke uă, mpồl jơi bơtiàn kòn cau gam uă kal ke mờ geh kal ke krơi is.