Sàh tiah kơh bơnơm Khánh Sơn, càr Khánh Hoà geh mờr 12 rơbô nă làng bol, den geh rlau 8 rơbô 500 nă làng bol kòn cau Raglai. Ồng Cao Minh Khánh, Phó Ƀí thư Đảng ủy sàh Khánh Sơn, pà gĭt, 5 nam do hìu bơnhă rƀah tàm do gơmù uă ngan, mơya kung gam rlau 20% sơl, priă lơh geh kờp bal tơl nă cau mìng lơh geh 30 tơlak đong dùl nam. Mờ uă broă lơh di pal gam geh lam lơh, cồng nha lơh sa bơh làng bol dê gam geh bơta tam gơl niam:“Ală broă lơh lơh sa tiah kơh bơnơm pa do neh geh lam lơh uă ngan tàm ù tiah do dê, làng bol geh dờp geh bơta dong kờl tơl làm. Mơya, lòt jrô tàm làng bol kung gŏ bàr pe hìu bơnhă làng bol ờ hềt lơh jat geh cồng nha broă lơh dê sơl. Gam wơl là uă ngan neh lơh jat niam ală broă lơh dong kờl mờ neh lik klàs rƀah kơ̆ kơl jăp jŏ jòng”.

Kờp bal jơh gùt càr Khánh Hoà, khà hìu bơnhă rƀah tàm làng bol jơi bơtiàn dồ ết nă cau gơmù kờp bal rlau 5% pah nam; tus tŭ do gam rlau 6 rơbô 400 hìu bơnhă, geh tus 10,7%. Rlau 3 rơbô 500 nơm hìu lơh ing, hìu ồm sèt ñhăt dà mìu neh geh ala mờ hìu ơm kơ̆ kơnhăp. Gùng lòt rê, hìu bơsram, hìu sơnơm, gùng che ồs đèng mờ dà ngui sa neh tus mờ jơh ală hìu bơnhă làng bol. Tàm uă tiah tơnơ̆ tơmŭt bal, bă ù ơnàng, khà kờp làng bol gơguh, geh tai uă ală bơta bơtàu tơnguh, lơh sa bơh sơn rờp geh gùng lòt pa. Bè tàm Trung Khánh Vĩnh gam rề ơnàng broă lơh tam tờm chi sa plai. Gơnoar atbồ dong kờl tờm sơntìl, càn priă dong kờl, pơlam tàp bơta chài, lơh geh bơta gơn kơnờm nàng làng bol in khin cha tam gơl. Mò Cao Thị Ngọc Thanh, Củ tịc Anih duh broă Làng bol sàh Trung Khánh Vĩnh pà gĭt:“ Tiah do bơt bơtàu broă rơndăp lơh bơtàu tơnguh ală broă lơh tam phan tờm, rơ wah phan tam di pal mờ ù tiah, trồ tiah, lơh geh jơnau kờñ bơtàu tơnguh sa mơkung tam gơl broă lơh sa suơn sre jat gùng dà geh cồng nha. Uă phan bơna neh geh tăc tàm drà kă bro, gàr niam khà lơh geh, bơta bơkah niam, cèng wơl bơta kwơ lơh sa uă mờ priă lơh geh sùm ai làng bol in”.

Jat jơnau yal bơh càr dê, tiah Ƀắc Khánh Hoà neh lơh sir 29 tàm 30 broă jàu Broă lơh jơnau kờñ Dà lơgar bơtàu tơnguh tiah làng bol jơi bơtiàn dồ ết nă cau mờ tiah kơh bơnơm; priă lơh geh kờp bal tiah làng bol jơi bơtiàn dồ ết nă cau gơguh mờr 2,14 dơ̆ pơndrờm mờ nam 2020. Tàm Nam Khánh Hoà, 19 tàm 22 broă jàu lơh geh mờ sơrlèt broă jàu, tàm hơ̆ pơn rơ ngan là 100% hìu bơnhă rƀah jơi bơtiàn geh dong kờl lơh hìu ơm. Bulah, kung gam geh ală jơnau kờñ ờ hềt lơh geh bè tơrmù khà sàh kal ke uă, tơnguh khà kơnòm bơsram jơi bơtiàn dồ ết nă cau bơsram tus kấp 3, halà bơta jơm glòm chi che  tàm brê.

Jat ồng Nguyễn Ngọc Sơn, Phó Kwang Lam bồ Sờh Jơi bơtiàn mờ Gah pin dờn jat Yàng càr Khánh Hoà, tiah làng bol jơi bơtiàn dồ ết nă cau mờ tiah kơh bơnơm bơh càr dê gam uă kal ke, mơya kung geh ală bơta pràn, ngan là bè broă lơh sa suơn sre. Lơh sa mpồl bơtiàn tàm do rơ̆p tam gơl bè ală bơta tŭ càr hòi jà mpồl lơh sa kă bro lòt bal, bơt bơtàu ală anih lơh bal. Ồng Nguyễn Ngọc Sơn ai pơn yơu tàm sàh Khánh Sơn:“Tàm tiah kơh bơnơm Khánh Sơn, tŭ do tờm sầu riêng neh gơ gơs phan tam tờm. Lơh geh mat kă bro mờ geh broă lơh bơcri priă lơh gơlik phan, kơldung ơn, pơ àr, den sầu riêng tàm Khánh Sơn rơ̆p ngan ngồn brồ guh. Mơya nàng lơh geh bơta hơ̆, pal geh ală broă lơh is ồn, lơh lài ai mpồl lơh sa kă bro gah broă hơ̆ in. Bơh hơ̆, lơh geh bơta gơn kơnờm ai ală tiah làng bol jơi bơtiàn dồ ết nă cau in bơtàu tơnguh”.

 Broă lơh tơrmù rƀah, tơnguh uă rài kis tàm tiah làng bol jơi bơtiàn dồ ết nă cau tàm Khánh Hoà neh lơh geh uă cồng nha loh làng, ngai sơlơ kơnhăp jŏ tŭ pơgồp bal mờ phan bơna bơt bơtàu, bơto bơtê mờ broă lơh sa. Mpồl lơh sa kă bro kung gam lòt bal nàng lơh kah wơl bơta ƀuơn bơta pràn. Yal jơnau cíñ trị bơh càr Khánh Hoà dê đơs sùm nùs nhơm “Ờ lời dồ nă cau lơi gơtìp lời wơl bơh ngkời”, ai jơnau kờñ tơrmù rƀah uă gah bơh 1 tus 1,5% pah nam, đơs nền nùs nhơm lơh ngan cèng wơl tŭ tơngai niam bơtàu tơnguh tơl làm, kơ̆ kơl jăp jŏ jòng ai làng bol tiah jơi bơtiàn dồ ết nă cau mờ tiah kơh bơnơm in.