Tàm sàh Ia Krel, càr Gia Lai, Ling mpồl 15 (Ƀộ Ling klàng) pa bơyai lơh sơnđờm mut ngui mờ tàm jàu Hìu bơsram Mần non Sao Mai pà ùr pơgru mờ kơnòm bơsram sàh Ia Krel, càr Gia Lai. Do là dùl tàm ală broă lơh bơt bơtàu hìu bơsram geh Ƀộ Ling klàng mờ ală mpồl lơh sa kă bro mpồl ling klàng lam lơh tàm tiah nhàr lơgar. Tàm càr Gia Lai, broă lơh bơt bơtàu geh jàu ai Ling mpồl 15 in lam lơh jat tàm pơgăp 5 nhai. Broă lơh bơt bơtàu geh uă bơta, bè: Anih tờm đơng lam lơh broă hìu bơsram dê ơnàng 231 thơk vuông; 2 mpồl cơldŭ bơsram kờp jơh bă ù ơnàng 800 thơk vuông, geh 5 cơldŭ bơsram lời is: Hìu bềp, tiah tàp pràn să jan, ƀlàng nhơl, gara... lơh geh jơnau kờñ bơsram sră ai rlau 300 nă kơnòm dềt mầm non in tàm 24 ƀòn gơwèt ală sàh tiah nhàr lơgar đah mat tơngai mut càr Gia Lai dê.

Đại tá ồng Khuất Bá Cao, Ƀí thư Đảng ủy, Phó Tư lệñ Ling mpồl 15, pà gĭt: broă sơnđờm ai mut ngui Hìu bơsram Mầm non Sao Mai pơgồp bơnah lơh geh jơnau kờñ bơto bơtê bơh oh kòn kwang bàng, cau ling, cau lơh broă mờ làng bol dê, bơt bơtàu tàm bơta bơtàu tơnguh kơnhăp jŏ bơh tiah nhàr lơgar dê. Ling mpồl 15 kơ̆p kờñ ală tiah, hìu bơsram rơ̆p bal mờ Ling mpồl lơh jat niam bơta kơnhăp kơ̆ bơta kwơ bơh hìu bơsram dê:“Tàm tơngai tus, Ling mpồl 15 rơ̆p pơn jat tai pơgồp bal mờ gơnoar atbồ ală tiah mờ Mpồl lơh sa- Sền gàr Dà lơgar 75 tàm atbồ ngui broă lơh bơt bơtàu di jơnau kờñ, geh cồng nha, kơnhăp jŏ; dong kờl lơh niam wơl, lơh kơnhăp wơl tŭ kờñ pal geh; tàm sơmbat tê bal sền gàr ƀlàng hìu bơsram tơlir- sàng goh- niam, lơh geh tơl ală bơta nàng ală sau in geh bơsram, bơsram tàp tàm tiah bơsram niam ngan rlau jơh”.

Tus bal dơ̆ sơnđờm mut ngui, kra ƀòn ồng Rah Lan Vọng – ơm tàm ƀòn Ngol Le, sàh Ia Krel, càr Gia Lai chờ hờp pà gĭt, Hìu bơsram Mầm non Sao Mai dong sền gàr, ròng siam kơnòm dềt tàm tiah nhàr lơgar niam rlau tai, nàng làng bol in iang nùs lơh broă sa, gàr kơ̆ kơl jăp tiah ơm kis: “Hìu bơsram dờng, sàng goh, niam, oh kòn kòn sau bol añ geh sa, bơsram niam tus gùng tus dà, tơnơ̆ do tào dờng gơ gơs cau drơng broă Dà lơgar. Bol añ brơn brài ngan mờ pin dờn tàm Đảng mờ Dà lơgar."

Tàm sàh tiah nhàr lơgar Đức Cơ, càr Gia Lai, Hìu bơsram Mầm non 18-4 (gơwèt  Kông ty 72, Ling mpồl 15) geh bơta ơnàng mờ 18 hìu bơsram lă jat kềng gah tàm 5 sàh. Tŭ do hìu bơsram geh rlau 1 rơbô nă sau tàm sơnam hìu bơsram  kơnòm dềt mờ mầm non tus tàm ơdŭ, tàm hơ̆ 1 bơnah 3 là oh kòn làng bol jơi bơtiàn dồ ết nă cau. Jơh ală sau ndrờm ơm sa klo ngai tàm hìu bơsram. Mìng is ală sau là làng bol jơi bơtiàn dồ ết nă cau ờ pal tong khat dùl bơta priă lơi. Bơdìh hơ̆, Kông ty 72 gam dong kờl tơl nă sau 8 rơbô đồng priă sa pah ngai. Kông ty kung apah is rơndeh jun mờ rò ală sau lòt bơsram pah ngai.

Tàm sàh tiah nhàr lơgar Mô Rai, càr Quảng Ngãi, Kông ty 78 (Mpồl ling 15) kung bơcri priă lơh hìu bơsram mầm non dờng niam, phan bơna, phan ngui bơto bơsram tơl làm. Nàng kờñ lơh geh ală bơta ai ală hìu bơnhă cau lơh phan, cau lơh broă geh kòn dềt in lòt tàm bơnah tiah còr bơsơ̆t kao su, jơh ală 11 tiah hìu bơsram bơh kông ty dê lơh ndrờm bơyai lơh rò ală sau bơh àng drim gờñ. Tàm tơl tiah bơsram, Mpồl lam bồ hìu bơsram ndrờm ai 2 nă ùr pơgru tàm pơdar lơh broă nàng wă ală sau tus tàm hìu bơsram.

 Đại tá  ồng Khuất Bá Cao, Ƀí thư Đảng ủy, Phó tư lệñ Ling mpồl 15 pà gĭt: mờ nùs nhơm tơrgùm bơta pràn bơt bơtàu tiah bơsram sră niam ngan rlau jơh ai ală sau in tus tàm ơdŭ bơsram, Ling mpồl 15 neh lơh 9 nơm hìu bơsram mầm non, 2 hìu bơsram sền gàr kơnòm dềt, mờ 130 tiah hìu bơsram tàm ù tiah nhàr lơgar Tây Nguyên dê. Kờp bal pah nam ală hìu bơsram dờp, ròng siam, sền gàr rlau 4 rơbô 500 nă sau, tàm hơ̆ geh rlau 2 bơnah 3 là oh kòn làng bol jơi bơtiàn dồ ết nă cau. Bal mờ broă tơrgùm tơnguh uă cồng nha bơto bơtê, mpồl kwang bàng atbồ, cau pơgru, cau lơh broă tàm ală tiah hìu bơsram mầm non bơh Ling mpồl 15 dê gam jơh nùs mblàng yal, hòi jà oh kòn làng bol jơi bơtiàn dồ ết nă cau tus bơsram tàm hìu bơsram. Bơta kơ̆ nùs, jơh nùs jơh tồr, geh kơnòl bơh kwang bàng Ling mpồl 15 dê neh tă bơsong ală bơta kơryan, kòl yan nàng sền gàr ai oh kòn làng bol ală jơi bơtiàn dồ ết nă cau tàm tiah nhàr lơgar dê in.