Bơh hơ̆, broă lơh tơmŭt đảng viên tàm càr geh bơta tam gơl uă ngan, pơgồp bơnah tơnguh uă pràn jak đơng lam bồ bơh Đảng dê tàm bơtàu tơnguh lơh sa- mpồl bơtiàn, sền gàr niam dà lơgar mờ bơta lơngăp lơngai tàm tiah do.

Yal bè ală tŭ lơh ngan pơđơl pràn ngan nàng geh ơm tàm mpồl bơh Đảng viên dê, đảng viên kơnòm să H’Lăic Niê, gơwèt Ci ƀộ thôn Tân Thịnh, xã Tân Lập, kơnhoàl Krông Buk, càr Dăk Lăk pà gĭt, geh kâp ủy, ci ƀộ thôn pin dờn, dòn kơnờm, đoàn viên, ơruh pơnu pin dờn jàu kơnòl dờp lơh gơnoar broă Phó Kwang ătbồ thôn Tân Thịnh, ală nam do, bi sùm lơh ngan lơh sir niam ală kơnòl broă geh jàu. Ngan là ală broă lơh đoàn mờ srơh ơruh pơnu, kơnòm pa tàu, kơnòm dềt tàm thôn. Lồi nam 2022, bi H’Lăic Niê chờ hờp geh tơmŭt tàm Đảng. Do là bơta gơn kơnờm uă ngan nàng pơn jăt tai tơnguh uă nùs nhơm kơnòl broă, tă pơgồp dà kơlhề bơta pràn kơnòm să pơgồp bơnah bơ̆t bơtàu Đảng pràn kơldang kơ̆ kơl jăp, ƀòn lơgar pas sơm niam bơnĕ. Bi H’Lăic Niê, đơs: Tơnơ̆ pơgăp dùl tŭ tơngai sùm lơh ngan pơnđơl pràn ngan, añ neh geh ngan ngồn ơm tàm mpồl Đảng dê, añ chờ hờp ngan mờ hơ is rơ̆p lơh ngan bơsram, pơnđơl pràn pơlam tàp, lùp bơsram nàng gơ gơs là dùl nă đảng viên lơh krơh, bal mờ ci ƀộ mblàng yal, hòi jà bơ̆t bơtàu ƀòn lơgar tờm ngai sơlơ bơtàu tơnguh.

Bi H’Lăic Niê là dùl tàm pram nă đảng viên kơnòm să tàm ală thôn, ƀòn geh Đảng ủy xã Tân Lập, kơnhoàl Krông Buk tơmŭt đảng tàm nam 2022. Do là dùl bơta pơnđơl pràn lơh ngan bơh tiah do dê tàm broă bơto pơlam, tơmŭt uă cau đảng viên pa tŭ uă ngan ơruh pơnu tàm ală thôn, ƀòn lòt lơh broă ngài, làng bol tàm tiah do ờ huan bài kờñ tus bal lơh ală broă lơh mpồl, ờ huan geh bồ tơngoh kơ̆p kờñ pơnđơl pràn lơh ngan. Bulah bè hơ̆, nàng lơh geh mpồl cau tàm pơndờn ai Đảng in, Ƀan Thường vụ Đảng ủy xã Tân Lập, kơnhoàl Krông Buk neh tơrgùm đơng lam, sồr lơh broă sền swì, tơmŭt Đảng pal yal loh làng, song dơ pă, ờ ndơ̆p mpồn, jơh nùs lơh ngan ờ sac rwah tơmŭt đảng jăt nùs nhơm halà ntoăt jăt cồng nha đah bơdìh gời. Kwơmàng sền gròi tus mpồl đoàn viên, cau tàm mpồl, geh bồ tơngoh pơnđơl pràn lơh ngan, geh nùs nhơm geh kơnòl bơ̆t bơtàu mpồl mờ sồr jơh ală mpồl cau, ală ci ƀộ pal sùm tề lam ai tơmŭt tàm cau tơmŭt đảng. Ồng Trần Ngọc Sơn, Phó Ƀí thư Đoàn ơruh pơnu xã Tân Lập, pà gĭt: Bè đah đoàn xã kung hòi jà sơl ală đoàn viên ơruh pơnu jak chài, ngui niam uă ngan rlau jơh bơta pràn bơh đoàn viên dê nàng ai tơmŭt tàm mpồl đảng dê mờ geh uă broă lơh nàng ai ală ơruh pơnu, đoàn viên tus bal lơh ală broă lơh cíñ trị kung bè broă lơh mpồl bơtiàn.

Đảng ủy xã Tân Lập, kơnhoàl Krông Buk kung gĭt nền broă lơh tơmŭt đảng viên tàm mpồl đảng thôn, ƀòn là kơnòl broă tờm, kwơmàng, pơgồp bơnah tơnguh uă pràn jak đơng lam bồ, pràn tam lơh bơh mpồl đảng dê. Rlau mờ hơ̆ tai, ală đảng viên gam là mpồl cau lơh kòn gùng tàm bơtàu tơnguh lơh sa- mpồl bơtiàn, sền gàr niam dà lơgar, sền gàr niam bơta lơngăp lơngai tàm tiah he dê. Den tàng bè hơ̆, gơwèt mờ ală ƀòn lơgar geh bơta mùl gŏ is, bè: tiah geh gal làng bol jơi bơtiàn dùl êt nă cau ơm kis dùl bă tiah, ală ci ƀộ uă nam sùm ờ tơmŭt geh đảng viên pa, Đảng ủy xã neh geh broă rơndăp lơh tơmŭt đảng viên, jàu broă loh làng ai ci ƀộ, ală mpồl cau in, sền do là dùl tàm ală broă jàu kwơmàng nàng sền swì, săp khà pah nam. Bal mờ hơ̆, Đảng ủy xã jàu kơnòl ală oh mi tàm đảng ủy in tus bal pơrjum tàm ci ƀộ ƀòn lơgar, bơh hơ̆ gĭt geh broă gơlik geh, di tŭ tă bơsong ală kal ke tàm broă lơh tơmŭt đảng viên pa đơs is kung bè broă lơh bơ̆t bơtàu Đảng đơs bal. Mò Cao Thị Thúy Nga, Ƀí thư Đảng ủy xã Tân Lập, kơnhoàl Krông Buk, pà gĭt: Bơh bồ nam 2023 đảng ủy xã neh jàu kơnòl ai ală oh mi tàm đảng ủy in tàm broă lơh là bal mờ broă tơmŭt đảng viên, bơ̆t bơtàu ală mpồl đảng den rơ̆p jăt sền ală ƀòn lơgar nền nòn ngan jơh ală bơta bè bơtàu tơnguh lơh sa- mpồl bơtiàn tàm ƀòn lơgar mờ cồng nha lồi nam bơh ală thôn dê rơ̆p là cơng tàng nàng sền swì kwang bàng bơh xã jàu kơnòl broă tàm ală ƀòn lơgar.

Tàm tơngai tus, Đảng ủy xã Tân Lập, kơnhoàl Krông Buk rơ̆p pơn jăt tai sơlơ đơng lam, sồr lơh nàng lơh jăt geh cồng nha rlau tai broă lơh tơmŭt Đảng tàm ală ci ƀộ gơwèt bal tàm xã, gàr geh bơta tàm pơdờn mờ bơta bơtàu tơnguh sùm bơh Đảng dê. Mơkung pơgồp bơnah tơnguh uă pràn jak đơng lam mờ pràn tam lơh bơh Mpồl Đảng mờ đảng viên dê lơh geh jơnau sồr kơnòl broă tàm bơta pa.