Ngai òr (17/07), Mpồl Kwang bàng jăt sền tơngu me broă lơh (Mpồl lơh broă sồ 02) geh dơ̆ lơh broă mờ UɃÑZ càr Sóc Trăng bè “Broă lơh jăt ală Nghị quyết bơh Quốk hội bè ală Broă lơh jơnau kờñ dà lơgar bè bơ̆t bơtàu ƀòn lơgar pa, tơngai bơh nam 2021 tus 2025, tơmù rơƀah kơl jăp tơngai bơh nam 2021 tus 2025, bơtàu tơnguh lơh sa mpồl bơtiàn tiah làng bol kòn cau mờ tiah kơh bơnơm tơngai bơh nam 2021 tus 2030”.

Kờp tus lồi nam lài, càr Sóc Trăng neh geh 64 tàm 80 xã neh geh khà ƀòn lơgar pa, 16 xã geh khà ƀòn lơgar pa tơnguh uă, geh 3 mpồl lơh broă kấp kơnhoàl geh khà lơh gơs kơnòl bơ̆t bơtàu ƀòn lơgar pa. Priă geh tơl nă cau tàm tiah ƀòn lơgar gơguh 43 tơlăk 400 rơbô đong tàm 1 nă (gơguh 1,1 dơ̆ pơn drờm mờ tŭ do nam 2020). Đơs pơn dŭt tàm dơ̆ jăt sền, mpồl kwang bàng đơs niam cồng nha lơh jăt ală broă lơh jơnau kờñ dà lơgar mờ càr Sóc Trăng neh lơh ngan mờ lơh geh. Mờ sồr càr Sóc Trăng pơn jăt tai lơh gơs ală jơnau yal, iăt tơl jơnau đơs bơh Mpồl Kwang bàng lơh broă, gơwèt mờ ală jơnau đơs ờ geh iăt pal geh jơnau yal mblàng nàng bơtơl tàm jơnau yal mờ pơyoa tus Mpồl Kwang bàng Jăt sền. Tàm hơ̆, lơh khà măt ală tơngu me gam kal ke, gơkòl, ală jơnau đơs mùl màl gơwèt mờ Cíñ phủ, ală ƀộ, gah lơh broă dà lơgar bè tơl broă lơh, ală rơndăp broă, rơndăp broă dềt.