Mơkung tơrgùm tơl priă jền, lơh pràn lơh broă mờ lơgar ndai làng bol, hòi jà tă pơgồp dong kờl làng bol tiah nhàr lơgar lơh gơs broă lơh bơt bơtàu ƀòn lơgar pa, lơh muh mat ƀòn lơgar tiah nhàr ngai sơlơ kơ̆ kơljăp mờ bơtàu tơnguh, lơh đềt mềr rlau tai bơta tam klăc bal đah ling klàng mờ làng bol, bơt bơtàu tiah nhàr lơgar ngai sơlơ pas niam bơnĕ.

 Lòt gùng jòng rlau 400 kơi sồ tus càr Hà Tĩnh, lòt tai 20 kơi sồ gùng brê rơlŭ rơlùn, rơ kuĕt rơkue, Mpồl geh nùs nhơm niam dong kờl is Cau bơsram lài do Hìu bơsram kấp pe nam bơsram 1993-1996 Hà Nội neh tus ƀòn Phú Lâm, xã Phú Gia, kơnhoàl Hương Khê, ƀòn tiah kơh bơnơm tiah nhàr lơgar gam uă kal ke bơh càr Hà Tĩnh dê.  Bơh bơta pơgồp bal mờ Pôs đồng ling sền gàr tiah nhàr lơgar Phú Gia, mpồl neh cèng jăt bal uă ngan phan ngui bơsram sră bè: tùh sră, tivi bal mờ gĭt nđờ rơhiang nơm sră giáo khoa, sră yal jơnau mờ phan ngui kwơ màng pà 2 tiah bơsram là  Hìu bơsram Mầm non Phú Gia, tiah bơsram Phú Lâm mờ Hìu bơsram kấp dùl Phú Gia, tiah bơsram Phú Lâm dê. Bi Nguyễn Phan Giang, Kwang atbồ mpồl lơh broă mpồl bơtiàn, cau bơsram lài do Hìu bơsram kấp pe nam bơsram 1993- 1996 Hà Nội pà gĭt:“Geh bơta at tê bal tàm pơgồp bal bơh Pôs đồng ling sền gàr tiah nhàr lơgar Phú Gia dê, bol añ neh geh ală broă lơh geh kwơ ngan. Nam lơi kung bè hơ̆ lơm, broă lơh bol añ hòi jà sùm mhar ngan, tàm pơgap bơh 10 tus 15 ngai là tơl priă jền nàng lơh broă lơh. Bơh broă lơh bơh bol añ dê, bol añ kung lơh gơrề uă bơta kwơ dong kờl kòn bơnus kung bè lơh gơ rề uă bơta kwơ geh ngan tàm rài kis. Jà khi tus dờp phan pà ờ gŏ di là bơta kwơ phan bơna mờ là bơta kwơ bè nùs nhơm”.

Lài hơ̆, Mpồl lơh broă mpồl bơtiàn Cau bơsram lài do khoá bơsram 1993-1996 kung neh dờp priă jền mờr 60 tơlak đong dong tiah hìu bơsram Mầm non Phú Gia lơh rơkàng hìu sơndră wơl mờ trồ duh mờ lơh pa mpồng mut dờng niam, sàng goh, niam bơnĕ, ală sau dềt tus tàm ơdŭ bơsram ờ pal kong mờ bơta duh tơr ồl ngan bơh kàl prang dê. Ală phan pà geh ngan do neh cèng tus bơta chờ hờp dờng ngan ai cau pơgru mờ kơnòm bơsram tàm tiah kơh bơnơm gam uă bơta sươ̆i siar bè phan bơna nàng drơng broă bơto bơtê. Klau pơgru Trần Đình Chung, cau pơgru hìu bơsram kấp dùl Phú Gia, tiah Phú Lâm đơs: “Mpồl ling sền gàr tiah nhàr lơgar là tiah dong kờl uă ngan rlau jơh ai mpồl lơh broă thôn mờ xã in. Bơdìh mờ kơnòl broă sền gàr tiah nhàr lơgar, sền gàr lơngăp lơngai rơndăp tăp sèng tiah nhàr lơgar mpồl ling sền gàr tiah nhàr lơgar gam là ală cau lơh broă geh cồng nha ngan rlau jơh tàm broă dong kờl lơh niam bơnĕ ai ƀòn lơgar in. Ală mpồl mpồl bơtiàn geh uă ală phan bơna bè ồi tơ̆, kơmung, rơndeh coh, phan puh đèng mờ uă phan ngui geh ngan bè dơngi, phe.., ngan là ală dơ̆ sa tềp dà lơgar, di ngai 27/07 dong bơnah lơi rài kis bơh ală hìu bơnhă dê geh bơtàu tơnguh rlau”.

Bơdìh mờ broă tàm pơgồp bal mờ ală mpồl geh nùs nhơm niam dong kờl is, Pôs đồng ling sền gàr tiah nhàr lơgar Phú Gia kung hòi jà geh uă phan dong kờl dong làng bol xã Phú Gia in bơtàu tơnguh lơh sa, bơt bơtàu ƀòn lơgar pa mờ ƀòn lơgar tơnguh uă, dong rài kis làng bol dê geh bơtàu tơnguh loh làng. Ồng Lê Văn Hòe, Kwang atbồ thôn Phú Lâm chờ hờp đơs, kwang bàng, cau ling Pôs đồng ling sền gàr tiah nhàr lơgar Phú Gia sùm sền gròi tus mờ làng bol, ngan là ală hìu bơnhă kal ke, kơnòm bơsram rƀah, kơnòm kòn đời.

Mờ uă broă lơh bơtàu tơnguh lơh sa, Pôs đồng ling sền gàr tiah nhàr lơgar Phú Gia neh lơh broă rơndăp lơh geh ngan, dong kờl ală hìu bơnhă làng bol gam kal ke bè broă lơh ròng iar, ròng kơnrồ, ròng sur, tam ală bơta tờm chi sa plai ai geh cồng nha lơh sa uă bè, kruăt, plai bung... Mơkung ai kwang bàng, cau ling bơto pơlam làng bol  bơta chài ròng phan mờ tam phan. Nàng dong cau ùr rƀah bơtàu tơnguh lơh sa, pa do, Pôs đồng ling sền gàr tiah nhàr lơgar Phú Gia neh tơlik mat Kâu lạc ƀộ Cau ùr mờ cau ling geh grăt tơlir. Bi Trần Thị Hợi, Củ tịc Mpồl cau ùr xã Phú Gia, Atbồ Kâu lạc ƀộ cau ùr mờ cau ling geh grăt tơlir đơs: “Broă lơh bơh Mpồl cau ùr Phú Gia kung bè Kâu lạc ƀộ cau ùr mờ cau ling geh grăt tơlir dê gơwèt mờ Pôs đồng ling sền gàr tiah nhàr lơgar den ngan ngồn ngan mờ geh cồng nha ngan, bềng bơta niam kòn bơnus dê. Ală broă lơh do dong kờl tơn ală cau tàm mpồl tàm Kâu lạc bộ, ală cau tàm mpồl in bơtàu tơnguh lơh sa. Bơdìh mờ hơ̆, Pôs đồng ling sền gàr tiah nhàr lơgar dong kờl broă lơh “Mè dong kờl” bơh Mpồl cau ùr xã dê, dờp dong kờl ròng siam dùl nă kơnòm dềt kòn đời geh rài kis kal ke tàm pơgap 3 nam pah nhai 300 rơbô đông".

Bơdìh mờ broă atbồ rlau 23 kơi sồ gùng tiah nhàr lơgar mờ 7 nơm jrong sơntơ̆p tiah nhàr lơgar bơh dà lơgar tiah nhàr lơgar đah lơgar Việt Nam mờ Lào dê, Pôs đồng ling sền gàr tiah nhàr lơgar Phú Gia gam pơgồp bal mờ kấp ủy, gơnoar atbồ, mpồl cau ală tiah lơh geh cồng nha ală broă lơh, rơndăp broă lơh bơtàu tơnguh lơh sa- mpồl bơtiàn, bơt bơtàu, sơlơ sền gàr dà lơgar, lơngăp lơngai tàm tiah nhàr lơgar, bè: “Lòt bal mờ cau ùr tiah nhàr lơgar”, “Kòn ròng Pôs đồng ling sền gàr tiah nhàr lơgar”, “Dong kờl oh lòt bơsram”, “Kâu lạc ƀộ cau ùr mờ cau ling geh griăt tơlir”... Mpồl ling neh rcang lài lơh rơndăp lơh broă, sền gĭt loh làng tŭ tơngai, jơnau kờñ, kơnòl broă, di tŭ gĭt loh ală bơta, nùs nhơm bơta kơ̆p kờñ bơh làng bol dê, hời rơ hời lik klàs rƀah, kơ̆ kơl jăp rài kis. Trung tá Nguyễn Đình Chuẩn, Cíñ trị viên phó Pôs đồng ling sền gàr tiah nhàr lơgar Phú Gia pà gĭt, mpồl ling neh tă pơgồp gĭt nđờ rơbô ngai lơh broă, pơgồp bơnah ai xã Phú Gia in lơh sir broă lơh ƀòn lơgar pa nam 2018 mờ ƀòn lơgar pa bơtàu tơnguh uă nam 2022.

Trung tá Nguyễn Đình Chuẩn, đơs: “Bơh ală broă lơh geh ngan bè do, Pôs đồng ling sền gàr tiah nhàr lơgar Phú Gia neh lơh geh bơta gĭt gơ̆p tam klăc bal, rềp mềl bal đah mpồl ling mờ kấp ủy gơnoar atbồ ală tiah, lơh geh bơta pin dờn kờñ gơboh bơh làng bol tiah nhàr lơgar, hòi jà geh bơta pràn jơh gùt làng bol tàm broă tus bal sền gàr gơnoar tờm lơngăp lơngai tiah nhàr lơgar bơh dà lơgar dê, bơt bơtàu tiah nhàr lơgar ring lơngai, pràn kơl dang kơ̆ kơl jăp”.

 Rùp hin ală cau ling geh grăt tơlir “bơr đơs, tê lơh”, mblàng yal, hòi jà tus bal lơh broă lơh sa tơn mờ làng bol, bơt bơtàu, lơh niam wơl hìu đam ai làng bol in... neh gơ gơs đềt mềr ngan, tam klăc bal mờ là tiah kơldìng pin dờn ngan bơh ală kấp ủy Đảng, gơnoar atbồ mờ làng bol ală jơi bơtiàn tàm tiah do dê. Làng bol kung bè hơ̆ mờ sơlơ pin dờn kờñ gơ boh uă rlau tai, đềt mềr mờ là ală “jrong skis” bal mờ mpồl ling tiah nhàr lơgar sền gàr kơ̆ kơl jăp gơnoar tờm ù tiah lơngăp lơngai tiah nhàr lơgar bơh  Dà lơgar dê.