Làng bol sùm lời ai nùs nhơm niam bơnĕ ngan rlau jơh mờ ngai sơlơ tam klăc bal mờ mpồl ling sền gàr tiah nhàr lơgar ngai sơlơ đềt mềr.

Ồng Trần Văn Hòa, cau tờm ơhò BTh 95032TS, ơm tàm xã Phước Thể, kơnhoàl  Tuy Phong, càr Bình Thuận lài do là cau neh lơh tìs lơh broă lơh ka ờ geh sră ai gơnoar; ờ cih, ờ tong sră cih lơh ka; ờ yal tŭ lik mut tàm anih ơhò ơm. Tŭ do, ală bơta lơh tìs hơ̆ ờ gam geh tai. Hơ̆ là kơnờm Mpồl ling sền gàr tiah nhàr lơgar neh mblàng yal, yal tơngĭt adat boh lam, tam cah gơl gùng, tam cah gùng tàm dà lềng nền nòn ai ồng Hòa mờ làng bol lơh ka tàm tiah do in gĭt. Mờ Mpồl ling sền gàr tiah nhàr lơgar gam bơto pơlam làng bol lơh jat broă lơh lơh ka bè lơi gơ in di mờ adat boh lam, ờ lơh gơrềng tus tiah dà lềng bơh lơgar ndai dê mờ dong kờl bơsong ală jơnau gơlik geh tàm dà lềng.

Ồng Trần Văn Hòa đơs: “Kơnờm bơta mblàng yal bơh Mpồl ling sền gàr tiah nhàr lơgar dê bơh hơ̆ añ gĭt wă geh, den añ mblàng yal wơl ai ală cau tàm ơhò plung, ală gơ̆p bơyô tàm plung in là bañ lơh tìs. Dilah làng bol lơh ka kờñ dong kờl den mpồl ling sền gàr tiah nhàr lơgar dong kờl mờ sơñio pơlam tơn. Pơn yơu bè, tŭ geh bơta gơlik geh tam lơh tàm dà lềng, halà ală plung lơh ka tìs mờ adat boh lam den he yal ai mpồl ling sền gàr tiah nhàr lơgar in, den khi ai plung, rơkì lòt tus nàng bơsong, pleh gơlik geh tam lơh tàm dà lềng”.

Tus tŭ do, uă ngan làng bol lơh ka càr Bình Thuận neh gĭt wă bơta dờng màng bơh broă cih, tong sră cih tơnhào phan tàm dà, lơh jat niam broă crăp măi jat sền gùng lòt (VMS). 100% cau tờm ơhò, cau tờm măi ơhò lòt lơh ka tàm tiah ngài hơ pơr gon ờ gŏ lơh tìs tàm tiah dà lềng lơgar ndai dê. Ồng Huỳnh Hương, cau lơh broă tàm plung 84025TS lơh broă ơn jàl hoài tàm thị trấn Liên Hương, kơnhoàl Tuy Phong, càr Bình Thuận pà gĭt tai:“Pôs đồng ling sền gàr tiah nhàr lơgar mpồng tiah nhàr lơgar Liên Hương sùm tìp mat làng bol lơh ka nàng cribơyai ală jơnau yal tàm dà lềng. Trồ tiah halà tŭ lơh ka gơtìp broă lơi pơnyơu bè gơtìp ală ơhò, plung bơh lơgar ndai den he kung yal ai Pôs đồng ling sền gàr tiah nhàr lơgar in gĭt jơnau yal. Đơs bal oh mi mpồl ling sền gàr tiah nhàr lơgar sền gròi ngan tus mờ làng bol lơh ka”.

Ờ mìng mblàng yal, yal tơngĭt adat boh lam, pơndờm pơnđiang làng bol lòt lơh ka tàm dà lềng, sền gàr gơnoar tờm bồt bơlào dà lềng, mpồl ling sền gàr tiah nhàr lơgar lơh pôs đồng tàm tiah dà lềng Bình Thuận gam pơgồp bal mờ kấp ủy, gơnoar atbồ tiah do sền gròi rài kis làng bol tàm bồt bơlào dà lềng. Pah nam, Mpồl ling sền gàr tiah nhàr lơgar lam lơh ală broă lơh bè: Kes priă tài cau rƀah, Yăng phe nùs nhơm, Dong kờl oh lòt bơsram... dong kờl di tŭ ai làng bol kal ke in.

 Mìng is nam 2022, broă lơh dong kờl oh lòt bơsram neh dong kờl ai 42 nă kơnòm bơsram mờ khà priă 189 tơlak đong; broă lơh Kòn ròng pôs đồng ling sền gàr tiah nhàr lơgar neh dong kờl ai 42 nă kơnòm bơsram mờ khà priă rlau 100 tơlak đong. Mpồl ling sền gàr tiah nhàr lơgar gam lơh ală tiah jat kềng gah dà lềng bơh càr Bình Thuận dê 3 nơm hìu ơm nùs nhơm, pà 9 tấn phe ai ală hìu bơnhă kal ke in... Ồng Huỳnh Đình Dũng, Phó Củ tịc Ủy ƀan Ñân zân xã Phước Thể, kơnhoàl Tuy Phong, càr Bình Thuận pà gĭt: “Tàm ù tiah ală xã geh pôs đồng ling sền gàr tiah nhàr lơgar lơh pôs đồng den pal pơgồp bal đah gơnoar atbồ ală tiah, ală ƀan, ngàñ, mpồl cau tàm ală tiah bal mờ làng bol, ngan là làng bol lơh ka niam ngan. Nùs nhơm đah làng bol lơh ka mờ mpồl ling sền gàr tiah nhàr lơgar đềt mềr ngan”.

Đại tá ồng Đinh Văn Sáu, Ƀí thư Đảng uỷ, Cíñ uỷ Gah đơng lam Mpồl ling sền gàr tiah nhàr lơgar càr Bình Thuận pà gĭt, mblàng yal gùng dà broă lơh, adat boh lam mờ sền gròi rài kis ai làng bol in đơs bal, tàm hơ̆ geh làng bol lơh ka là kơnòl broă bơh Mpồl ling sền gàr tiah nhàr lơgar dê. Kơnòl broă do sùm geh lơh jat tus tơl nă kwang bàng, cau ling nàng nam tơnơ̆ lơh jat niam rlau tai, geh cồng nha rlau tai mờ nam lài.  Đại tá ồng Đinh Văn Sáu, đơs: “Lơh  bè lơi tơrgùm geh bơta pràn tơrgùm bal bơh jơh bal ală anih lơh broă cíñ trị mờ ală rơnàng làng bol nàng bơt bơtàu rài gùt làng bol sền gàr tiah nhàr lơgar pràn kơl dang, kơ̆ kơljap, bơh hơ̆ lơh sir niam ngan kơnòl broă sền gàr gơnoar tờm, lơngap lơngai tiah nhàr lơgar bơh Dà lơgar dê. Bơdìh hơ̆, bol añ tơrgùm sồr lơh niam broă lơh bơt bơtàu Đảng, lơh jat niam gơnoar broă, kơnòl broă bơh kwang bàng, đảng viên dê. Tài bơh do là mpồl tờm ngan nàng đơng lam mpồl ling lơh sir jak ngan kơnòl broă tàm tơngai tus”.

Càr Bình Thuận geh dà lềng jòng 192 kơi sồ, geh rlau 5 rơbô 700 nơm ơhò lơh ka geh bơta jòng bơh 6 thơk rlau hơđang, tàm hơ̆ geh 1 rơbô 946 nơm ơhò lơh ka geh bơta jòng bơh 15 thơk rlau hơđang lơh broă tơnhào phan tàm dà tàm tiah ngài dà lềng. Gah tơnhào phan tàm dà neh lơh geh broă lơh ai rlau 46 rơbô nă cau lơh broă, tàm hơ̆ geh pơgap 15 rơbô nă cau lơh broă tơn tàm ală ơhò lòt lơh ka tiah ngài dà lềng. Broă tơnhào phan tàm dà lềng bulah gơtìp uă ngan kal ke, ngòt rngơ̆t, mơya mờ bơta sền gròi, dong kờl bơh Cíñ phủ, gơnoar atbồ ală tiah mờ mpồl ling sền gàr tiah nhàr lơgar dê, làng bol lơh ka càr Bình Thuận geh tai bơta gơn kơnờm lòt lơh ka tàm dà lềng, đơs nền gơnoar tờm bồt bơlào dà lềng dờng màng bơh Dà lơgar dê.