Tàm hơ̆ broă lơh “Dong kờl oh lòt bơsram” mờ “Kòn ròng Pôs đồng ling sền gàr tiah nhàr lơgar” neh dong kờl uă kơnòm bơsram geh rài kis kal ke ngan tàm tiah nhàr lơgar dà lềng geh pơn jat tai lòt bơsram.

Oh Trần Quốc Thịnh mờ Trần Hoàng Duy, ơm tàm ƀòn Nhì, xã Mỹ Long Nam, kơnhoàl Cầu Ngang, càr Trà Vinh bơh dềt neh kòn đời bèp. Mè 2 nă oh dê tơnơ̆ dùl tơngai lòt lơh broă tàm tiah ngài, neh bau mờ cau ndai nàng jòi tiah kơldìng, mơya rài kis pa kung gam pơn jat tai kal ke, lời tĕ 2 nă oh dềt ơm kis mờ mò đah mè neh kra ờ pràn. Mò mờ sau kis tàm bơta ờ geh tơl phan sa, ngai hờm ngai jơgloh kung ờ tơl pràn nàng ai sau in lòt bơsram sơl. Bơtoah ngan ai 2 nă oh in, nam 2019 mpồl ling sền gàr tiah nhàr lơgar càr Trà Vinh neh lam lơh jat broă lơh “Kòn ròng pôs đồng ling sền gàr tiah nhàr lơgar” den neh rò ală oh rê kis bal tàm Pôs đồng ling sền gàr tiah nhàr lơgar Mỹ Long mờ geh bơta tă pơgồp dong kờl bơh gơnoar atbồ ƀòn lơgar dê.

Trung úy Nguyễn Quốc Việt, cau ling geh jàu kơnòl broă sền gàr, bơto bơtê tai 2 nă oh in pà gĭt, tơnơ̆ tŭ geh mpồl ling rò rê tàm do, rài kis 2 nă oh dê neh tam gơl jơh lơm. Mìng tơnơ̆ dùl nam lơh kòn ròng Pôs đồng ling sền gàr tiah nhàr lơgar, bơh dùl nă kơnòm bơsram ờ jak neh brồ guh bơsram jak, pràn kơl dang să jan, să jan kung dờng niam rlau tai. Trung úy Nguyễn Quốc Việt, đơs: “Gơwèt mờ să tờm den gŏ là sau Duy geh ơm kis bal tàm mpồl ling, sau gơlòng sồr ngan, lòt dan rê yal, tơm bơh bơr niam ngan, tìp cau dờng gĭt lùp còp să... Bè tŭ jiơ, drim 5 jiơ àng ală mpồl ling guh bĭc, sau Duy kung guh bal sơl. Sau Duy geh bơta kơ̆p kờñ geh drơng broă tàm mpồl ling, bol añ pơnđơl pràn lơh ngan nàng dong kờl, bơto bơtê tai nàng sau in geh tơl ală bơta geh mut bal tàm mpồl ling klàng”.

Oh Trần Hoàng Duy nam do bơsram ơdŭ 6, rơ̆p kis bal mờ cau ling sền gàr tiah nhàr lơgar tus dì tŭ bơsram jơh ơdŭ 09 bè bi klau sơl. Oh đơs là, mut kis tàm pôs đồng ling sền gàr tiah nhàr lơgar, broă sào sa, bơsram sră, bĭc, rơlô jat tŭ jiơ niam ngan, geh ală wa bơto bơtê, sơñio tơngkah niam ngan den cồng nha bơsram sră neh jak rlau mờ lài do. Kòn kơ̆p kờñ tơnơ̆ do gơ gơs dùl nă kwang bàng mpồl ling sền gàr tiah nhàr lơgar bè ală wa sơl: “Ơm tàm do drim 5 jiơ àng guh bĭc rcang lòt bơsram, mờ drim lơi ală wa kung pà 15 rơbô đông, ai bơsram trồ mho den pà tai 10 rơbô đong. Mho sào piang, nhơl tàp pràn să jan mờ ală wa. Kòn kờñ ngan ală wa. Kòn pơnđơl pràn lơh ngan bơsram jak ngan nàng tơnơ̆ do dan mut bal tàm mpồl ling klàng, geh drơng broă tàm mpồl ling klàng”.

Mìng is oh Trần Quốc Thịnh, nam lài neh bơsram jơh broă bơsram kấp bàr mờ geh rê kis bal mờ hìu bơnhă, geh tơmŭt tàm broă lơh “Dong kờl oh lòt bơsram” mờ khà priă dong kờl 500 rơbô đong dùl nhai. Bơdìh mờ hơ̆, nàng lơh geh ală bơta niam ngan rlau tai tơnơ̆ tŭ geh rê wơl mờ hìu bơnhă, ală kwang bàng, cau ling Pôs đồng ling sền gàr tiah nhàr lơgar Mỹ Long gam hòi jà, tềm tềr geh sră tềm pềr priă jền 27 tơlak đong nàng jàu pà oh in, bal mờ uă sră giáo khoa, sră cih mờ phan ngui bơsram sră. Trung tá Phan Thanh Sang, Cíñ trị viên Pôs đồng ling sền gàr tiah nhàr lơgar Mỹ Long pà gĭt, tơnơ̆ tŭ jơh tơngai lơh kòn ròng, ală oh geh tơmut tàm broă lơh “Dong kờl oh lòt bơsram” nàng pơn jat tai dong kờl mờ pơn jat tai lơh jat broă bơsram sră bal mờ sră tềm pềr priă jền. Den tàng bè hơ̆, bol añ rơ̆p pơnđơl pràn lơh ngan ai jơh bơta pràn, pơndờm pơnđiang bal, sơm bat tê bal dong kờl jơh ală bơta dilah gơtùi: “Pôs đồng lơh jat broă lơh do bơh nam 2019. Mìng is nàng ròng 02 nă sau den hòi jà ală cau geh nùs nhơm niam, ală kwang bàng, cau ling bơh mpồl ling mờ ală mpồl lơh broă ndai. Dơ̆ 3 tai là bơh Kes priă bơtàu tơnguh lơh sa, lơh bè lơi nàng bơtơl, lơh ală bơta ai ală sau in niam ngan rlau jơh”.

Bơdìh mờ broă lơh “Kòn ròng Pôs đồng ling sền gàr tiah nhàr lơgar”, ală kwang bàng, cau ling Pôs đồng ling sền gàr tiah nhàr lơgar Mỹ Long, càr Trà Vinh gam dờp dong kờl 19 nă kơnòm bơsram geh rài kis kal ke tàm ù tiah  càr dê drơng broă jat broă lơh “Dong kờl oh lòt bơsram”. Jat hơ̆, tơl nă oh geh dong kờl 500 rơbô đong dùl nhai priă jền ngui tàm broă bơsram sră jŏ jòng tus tŭ bơsram jơh ơdŭ 12. Bơh broă lơh do neh dong uă kơnòm bơh dùl nă kơnòm bơsram ờ jak gơ gơs kơnòm bơsram jak, mờ jak ngan.

Bơh nam 2016 tus tŭ do, Mpồl ling sền gàr tiah nhàr lơgar càr Trà Vinh lơh sùm dong kờl ai 34 nă kơnòm bơsram geh rài kis kal ke in mờ kờp jơh khà priă rlau 1 tơmàn 400 tơlak đong. Priă jền do bơh ală mpồl ling dong kờl, bơta dong kờl tă pơgồp bal bơh kwang bàng, cau ling tàm jơh gùt mpồl ling mờ Kes priă bơtàu tơnguh lơh sa bơh ală mpồl ling dê. Bơh broă lơh do, ală pôs đồng ling sền gàr tiah nhàr lơgar tàm jơh gùt lơgar neh dong kờl, bơto bơtê nàng gĭt nđờ rơhiang nă kơnòm bơsram geh rài kis kal ke tiah nhàr lơgar kơ̆p kờñ bơsram sră, nàng tơnơ̆ do gơ gơs cau geh kwơ.