Ală nam do, bơh bơta lam bồ bơh Đảng dê, làng bol ală jơi bơtiàn bơh kơnhoàl Buôn Đôn dê neh sùm tam klăc bal sơrlèt gan jơh ală kal ke, lơh ngan pơđơl pràn bơtàu tơnguh lơh sa bơtàu tơnguh rài kis, bơ̆t bơtàu tiah nhàr lơgar ring lơngai, pràn kơldang kơ̆ kơl jăp. Uă kơrnoăt geh bơta bơtàu tơnguh pràn bơh Đảng ƀộ kơnhoàl dê neh gơlòt mŭt ngan ngồn tàm rài kis. Pơnrơ ngan là kơrnoăt bè tam gơl rơndăp tăp sèng chi tam phan ròng lơh pràn sơngka sền gàr phan tam mờ ngui bơta jak chài măy mok dê tàm broă lơh sa neh geh lam lơh loh làng tus tơl thôn, ƀòn.

Tân Hoà là xã mìng lơh broă sa sươn sre lơm, geh pơlam gùng bơtàu tơnguh lơh tờm là tam chi jŏ nam, tờm phan sa lơyah ngai pơgồp bal mờ tam tàm bơrlŭ bal chi sa plai. Tus tŭ do, pơlam gùng do neh geh lơh jăt loh làng bơh ală anih lơh sa sươn dờng tam tờm plai kruăc, kwêt, bung kơmhò tơlir, pơ ò jăt jơnau sồr bơh VietGap dê, tơl jơnau sồr tăc mờ lơgar ndai; mơkung lơh pràn ngui bơta jak chài măy mok tàm broă tam phan. Ală nam lài, bơta ƀươn tam chi sa plai tàm xã Tân Hoà gơtìp kơryan uă ngan tài bơh ờ tơl dà tuh tàm kàl prang, mơya broă do neh geh bơsong. Ồng Ngô Xuân Nam, Phó Củ tịc Ủy ƀan Ñân zân xã Tân Hoà, kơnhoàl Buôn Đôn, pà gĭt: Lơh sa sươn sre geh bơcri priă sền gròi bơh ală kâp dê tàm tơngai lài gàr tơl dà tuh den tàng cồng nha lơh geh mờ bă ù tam gơ wèt mờ ală bơta chi tam do geh uă sơl.

Kung jăt kwang đơng lam bồ xã Tân Hoà yal sơl, kơnờm broă tam gơl rơndăp tăp sèng chi tam bơh sơnrờp gơ ai cồng nha uă ngan den tàng priă lơh geh kờp bal dùl nă cau bơh xã dê gơguh mhar đau, geh 36 tơlak đong tàm nam 2022 sơrlèt broă rơndăp lơh ai tơlik là 11%, gơguh 13,8% pơndrờm mờ nam 2021. Do kung là cơng tàng nàng Đảng ƀộ, gơnoar ătbồ mờ làng bol xã Tân Hoà lơh pràn bơtàu tơnguh lơh sa tàm tơngai tus.

Bal mờ xã Tân Hoà, ală nam rềp ndo broă lơh sa tàm xã Ea Wer, kơnhoàl Buôn Đôn kung ngai sơlơ tam gơl pa. Nàng rài kis làng bol tàm ù tiah xã dê bơtàu tơnguh, Đảng ƀộ gơnoar ătbồ xã neh sền gròi dong kờl ai làng bol in mìng là hìu rƀah, hìu mờr ndrờm bè hìu rƀah, hìu geh rài kis kal ke càn ală priă jền bơh ngân hàng cíñ săc xã hội mờ ală priă pơgồp bal bơh ală broă lơh jơnau kờñ dà lơgar dê. Tàm hơ̆ geh priă bơh broă lơh tơrmù rƀah kơ̆ kơl jăp nàng bơcri priă tam gơl gùng dà lơh sa, rề ơnàng bă ù tam uă ală tờm chi tam mờ ròng uă phan ròng dipal nàng tơnguh uă priă lơh geh mờ rơhời klàs bơh rƀah. Bi H’In Dy Niê, ơm tàm xã Ea Wer, kơnhoàl Buôn Đôn pà gĭt: Añ bơh tŭ càn priă hìu rƀah den añ ngui priă hơ̆ nàng tam kơphê, blơi phơng sih, blơi kơnrồ nàng ròng siam tŭ do rài kis ờ huan bòl glar rlau mờ tơl ngui tơl sa rao.

Jăt ồng Y A Toan Êñuôl, Ƀí thư Huyện ủy kơnhoàl Buôn Đôn yal, nàng dong kờl lơh sa- mpồl bơtiàn tàm kơnhoàl bơtàu tơnguh, bơtàu tơnguh uă rài kis làng bol in, Đảng ƀộ, gơnoar ătbồ kơnhoàl gam sền gròi hòi jà tă pơgồp ală priă jền bơcri nàng bơtàu tơnguh rơndăp tăp sèng phan bơna gùng lòt, bơtơ̆t rbòng dà, ồs đèng, hìu bơsram. Tŭ do, ală gùng lòt tàm kơnhoàl Buôn Đôn sền bal lơh geh jơnau kờñ lòt rê, lơh sa mờ jun pơndiang phan kă bro. Bơta do pơgồp bơnah tàm bơtàu tơnguh bal bơh kơnhoàl dê. Nam 2022, khà gơguh lơh sa bơh kơnhoàl dê geh 8%, tă dia geh mờ sơrlèt broă jàu. Broă lơh bơ̆t bơtàu ƀòn lơgar pa geh sền gròi sồr lơh, jơh gùt kơnhoàl neh lơh geh 90 broă jàu, khà hìu rƀah gơmù gam 34%. Tơngai tus, Đảng ƀộ, Gơnoar ătbồ kơnhoàl tiah nhàr lơgar Buôn Đôn pơn jăt tai ngui niam gơnoar broă đơng lam, sồr lơh tàm bơ̆t bơtàu ală broă pơlam bơtàu tơnguh lơh sa dipal, ngui niam bơta pràn, bơta ƀươn dùl bă tiah nàng bơ̆t bơtàu tiah nhàr lơgar pràn kơldang kơ̆ kơl jăp. Ồng Y A Toan Êñuôl, pà gĭt: Hòi jà làng bol lơh jăt ală jơnau sồr, gùng dà bơh Đảng dê, broă lơh kơrnoăt boh lam bơh Dà lơgar dê. Pơgồp bal mờ ală ƀan, gah lơh broă kung bè mpồl mặt trận mpồl cau nàng lơh pràn bơtàu tơnguh lơh sa- mpồl bơtiàn, sền gàr kơnhăp dà lơgar, lơngăp lơngai tàm ù tiah kơnhoàl dê kung bè là bơh tiah nhàr lơgar dê.

Gơtùi gŏ kơnờm ngui niam gơnoar broă lam bồ bơh Đảng dê mờ hòi jà tă pơgồp geh ală priă jền bơcri lơh, ngui niam bơta pràn tam klăc dờng jơi bơtiàn, kâp ủy,  gơnoar ătbồ mờ làng bol ală jơi bơtiàn kơnhoàl nhàr lơgar Buôn Đôn gam tơrgùm bal pràn, dùl nùs bal sơrlèt gan jơh ală kal ke, bơta lòng, jơh nùs bơ̆t bơtàu tiah nhàr lơgar càr Dăk Lăk ngai sơlơ pas sơm niam bơnĕ.