Git nđờ jơ̆t rơbô nă cau ling khin cha jăk chài chơ̆t màng gam ơm rơlô bĭc tàm 72 ƀlàng tơ̆p ƀồc tàm ù tiah càr Quảng Trị.

Nggùl nhai 7, Quảng Trị trồ tơngai duh bè ồs. Mpồl cau ling yau Trung đoàn Phào dờng 241 geh 160 nă cau tus wơl tàm tiah tam lơh lài do nàng chu ñàng kal kơlôi ală cau ling tàm mpồl in. Tềng jơnang kah kơlôi bơh Trung đoàn dê geh lơh tàm Ƀlàng tơ̆p ƀồc kơnhoàl Hướng Hoá, ală cau ling lài do neh ai 1 phút kun bồ, kah kơlôi ală oh mi, cau ling neh phi să tàm rài tam lơh sền gàr dà lơgar tơrgùm bal. Tàm jơh 400 nă kwang bàng, cau ling gơwèt Trung đoàn Phào dờng 241 chơ̆t phi să tàm tiah tam lơh càr Quảng Trị, tus tŭ do geh uă ƀồc ntìng kung gam tềng gah croh dà, tàm brê dờng. Ồng Nguyễn Hùng Tiến, cau ling yau Trung đoàn 241 pà git: Bơh nam 2013, ală cau ling yau Trung đoàn 241 neh pơgồp bal tàm broă lơh gơs jơnang kah kơlôi tàm Ƀlàng tơ̆p ƀồc cau ling chơ̆t màng kơnhoàl Hướng Hoá mờ pah nam ală cau ling yau bơh mpồl ling do geh tus wơl tàm ù tiah tơ̆p ƀồc do nàng chu ñàng kah kơlôi cau ling tàm mpồl bal: “Bol añ gŏ kơnòl bơh ală cau gam kis tài cau tàm mpồl ling bal bol añ neh chơ̆t phi să den bol añ pal geh ală broă lơh lơi nàng bơsal wơl. Tàm khà oh mi bơh bol añ dê geh uă ngan cau ờ rê mờ hìu nhă, hơ̆ là jơnau moăt ngan. Den tàng, tài bè hơ̆, jơnang kah kơlôi do geh lơh tài bơh dà kơl hề, bơta pràn bal mờ priă jền mờ kwơ màng là nùs nhơm bơh ală cau gam kis dê”.

Nam lơi kung bè hơ̆ sùm, di tàm ngai 27 nhai 7, hìu nhă bi Phạm Việt Phong bơh ƀòn dờng Ninh Bình tus tàm ƀlàng tơ̆p ƀồc Dà lơgar Trường Sơn nàng chu ñàng kah kơlôi wa tờm bi dê là cau ling chơ̆t màng Phạm Văn Trọng. Cau ling chơ̆t màng Phạm Văn Trọng là cau ling bơh Ƀiñ đoàn 559, chơ̆t phi să tàm ù tiah càr Quảng Trị nam 1972, tŭ tờm 22 sơnam. Pah nam, bi Phong bal mờ ală cau tàm hìu nhă tờm tus tàm càr Quảng Trị còp ies, chu ñàng ală cau ling chơ̆t màng in, tơlik nùs nhơm kah ưn ngài gơwèt mờ ală cau ling khin cha jăk chài, cau ling chơ̆t màng: “Cau pròc mhàm añ dê gam ơm tàm ù tiah càr Quảng Trị, añ là cau pròc mhàm sền gròi ƀồc wa. Añ geh rài kis bè ngai do den geh uă ngan cau neh chơ̆t phi să mờ ơm wơl tàm ù tiah càr Quảng trị bè do. Añ tus tàm do gŏ ƀlàng tơ̆p ƀồc do là niam ngan. Lời wa ơm tàm do nàng añ duh khoai bal mờ Dà lơgar”.

Ală ngai do, tàm ală ƀlàng tơ̆p ƀồc cau ling chơ̆t màng càr Quảng Trị, geh uă Mpồl kwang bàng đơng lam Đảng mờ Dà lơgar bal mờ cau pròc mhàm ală hìu nhă cau ling chơ̆t màng tus chu ñàng, tơlik nùs nhơm git ưn ngài uă ngan tus mờ ală cau ling khin cha jăk chài neh chơ̆t phi să tài broă tơnklàs jơi bơtiàn,  dà lơgar tơrgùm bal. Ală goàng bơkào ris niam bal mờ ñàng thồm tơlik nùs nhơm git ưn ngài uă ngan tềng đăp mờ huềng soàn ală cau kòn jăk chài Dà lơgar dê. Ồng Nguyễn Duy Tiến, 82 sơnam, cau ling yau bơh Ƀiñ đoàn 559 tus wơl tàm tiah tam lơh lài do càr Quảng Trị kơ̆p kờñ tìp wơl oh mi tàm mpồl ling bal: “Pah dơ̆ tus wơl tàm tiah tam lơh lài do bè do, den tàm nùs nhơm bol añ ndrờm geh sền wơl jơh. Lài ngan là tìp mờ ală oh mi tàm mpồl ling bal tus tŭ do. Gơwèt mờ ală oh mi neh phi să, bol añ tus ưn ngài oh mi. Nam do, bol añ lơh yàng ưn ngài. Tàm dùl dơ̆ geh tus tiah tam lơh lài do là tàm nùs nhơm bol añ kờñ tìp mờ ală oh”.

Tơn jơh tam lơh, rơlao 53 rơbô nă cau ling chơ̆t màng neh ơm wơl tàm 72 ƀlàng tơ̆p ƀồc dờng dềt tàm ù tiah càr Quảng Trị wăc rơwờl. Kah tus broă lơh dờng màng bơh ală cau ling khin cha jăk chài, Đảng mờ Dà lơgar sùm sền kwơ broă bơcri priă ai geh bă ù, lơh niam wơl ală ƀlàng tơ̆p ƀồc cau ling chơ̆t màng. Tŭ do, ală ƀlàng tơ̆p ƀờc neh lơh gơs broă lơh niam chài nùs nhơm pin dờn, kah tus ală cau ling khin cha jăk chài, geh bơto bơtê bơhiàn ờs mờng niam bơnĕ nàng rơnàng tơnơ̆ do in. Ồng Lê Nguyên Hồng, Kwang atbồ Sở Lao động – Thương ƀin mờ Xã hội càr Quảng Trị pà git: Di tơnkah ngai 27 nhai 07 nam do, càr Quảng Trị wă mờr 15 rơbô nă cau pròc mhàm, cau năc, ală mpồl cau ling yau tus chu ñàng. Kwơ màng bơh nhai 7 nam 2022 tus tŭ do, UɃÑZ càr Quảng Trị neh bơyai lơh wă ală mpồl tus còp, ies Ƀlàng tơ̆p ƀồc cau ling chơ̆t màng dà lơgar Gùng 9 mờ Ƀlàng tơ̆p ƀồc cau ling chơ̆t màng dà lơgar Trường Sơn tàm tŭ trồ mang: “Bol añ drơng wă ală mpồl tus còp, ies mờ trồ mang den bol añ gŏ lài ngan là càr Quảng Trị trồ tiah tơngai duh, lòt tàm trồ mang den hơ̆ sồng mrềt rơlao. Dơ̆ bàr tai, trồ mang den geh đềt mềr rơlao, mŭt tàm ƀlàng tơ̆p ƀồc gơh wăc rơwờl rơlao mờ di lah sền mờ măt den gŏ niam rơlao. Làng bol bal mờ cau ling gùt lơgar tus còp, ies ală ƀlàng tơ̆p ƀồc cau ling chơ̆t màng Trường Sơn mờ Gùng 9 mờ bol añ geh cau sền gàr nàng drơng broă còp, ies bơh ală mpồl cau pròc mhàm cau ling chơ̆t màng in”.

Nhai poh, tơl mpồl cau jòi tus ală Ƀlàng tơ̆p ƀồc cau ling chơ̆t màng Trường Sơn, Ƀlàng tơ̆p ƀồc cau ling chơ̆t màng Gùng 9, ƀòn dờng yau Quảng Trị... chu ñàng thồm, pơrđồng bơkào pơ-àr tàm dà dờng Thạch Hãn nàng tơlik nùs nhơm kah rơngal wơl ală cau ling chơ̆t màng.