Dờp sră tềm pềr priă geh 5 tơlăk đong geh Tỉñ đoàn càr Dăk Lăk pơgồp bal mờ ală cau geh nùs nhơm niam jào pà, mò Võ Thị Thuận, ơruh pơnu lơh broă lam lài lài do kis tàm thôn Tân Hoà, xã Tân Lập, kơnhoàl Krông Buk ngoh rơngăc ngan. Tàm sơnam rơlao 70, ngai pah ngai mò kung gam lòt khòm khàr đù tăc nàng geh priă tàm rài kis. Kis tàm hìu nùs nhơm cau ling bal lơh gơs, mò yal: “Tàm xã pơgồp bal mờ ơruh pơnu lơh geh dùl nơm hìu nùs nhơm, tơl nă cau tă ờ uă priă nàng lơh gơs hìu do, tŭ hơ̆ jơh di pơgăp 80 tơlăk đong. Dơ̆ do den ală cau gam pà dùl pang sră tềm pềr priă do”.

Gam gơwèt mờ ồng Trần Văn Hùng, cau ling yau kis tàm thôn 15, xã Tân Hoà, kơnhoàl Buôn Đôn chờ hờp ngan là ală ngai đoàn viên ơruh pơnu tàm xã tus ha là tus bal dong kờl jì ñhơ̆t tàm suơn. Boh bơr mờ ală ơruh pơnu, ồng kah tus mờ ală nam nhai lài do bal mờ ală cau tàm mpồl ơruh pơnu lơh broă lam lài lài do tus tam lơh tài bơta krơi is khăt gơboh dà lơgar dê. Kơnờm mờ broă dong kờl bơh ơruh pơnu mờ ală hìu nhă bè ồng neh pơn dờm bè nùs nhơm bal mờ phan bơna. “Bol añ mìng lơh suơn, mìr den ală oh mi đoàn viên ơruh pơnu dong kờl ngai lơh broă, tam jà bal tus lơh nàng dong kờl bơh 1 tus 2 ƀùi, tơl ƀùi kung geh rơlao jơ̆t nă đoàn viên, dong kờl hìu nhă. Geh bal tŭ bol añ gơtìp kòp tê jê să, rềs àr ha là tŭ pơrjum di ngai tơn kah den đoàn viên ơruh pơnu kung tus mờ geh ală pò phan pơn dờm di tŭ”.

Càr Dăk Lăk tŭ do geh mờr 60 rơbô pang sră cau geh sră dong kờl bơh dà lơgar, tàm hơ̆ geh mờr 45 rơbô pang sră cau geh màng mờ dà lơgar, cau pròc mhàm cau geh màng mờ dà lơgar mờ rơlao 14 rơbô pang sră cau ndai bè ơruh pơnu lơh broă lam lài lài do. Pah nhai, càr Dăk Lăk tă priă dong kờl rơlao 10 rơbô nă cau, mờ khà rơlao 21 tơmàn đong.

Di tơnkah 76 nam Ngai cau ling sồt să, Cau ling chơ̆t màng, càr Dăk Lăk neh tus còp, pà phan ai ală cau geh sră dong kờl bơh dà lơgar, cau geh màng mờ dà lơgar kờp jơh khà priă tă rơlao 15 tơmàn đong; bơyai lơh ai 55 nă cau geh màng mờ dà lơgar geh pơnrơ jăk càr dê lòt nhơl sền tàm ală càr tiah Tàm gùl lơgar mờ Đah tô dà lơgar; ai 240 nă cau geh màng mờ dà lơgar lòt tơn pràn să jan tơrgùm bal tàm Anih tờm Tơn pràn să jan cau geh màng mờ dà lơgar Tiah tàm gùl lơgar.

Tơlik bơta niam “Hùc dà kah tô dà”, tơngai do, ơruh pơnu càr Dăk Lăk neh geh uă broă lơh mùl màl wèt tus ală hìu nhă cau geh sră dong kờl bơh dà lơgar, cau ling sồt să, cau ling chơ̆t màng tàm càr dê. Hơ̆ là ală broă lơh nùs nhơm dong kờl is, dong kờl tàm rài kis, lơh sa, lam sồr geh uă priă nàng lơh geh git nđờ rơhiang nơm hìu nùs nhơm cau tàm mpồl bal, jào pà git nđờ rơbô pò phan, pang sră tềm pềr priă nàng pơgồp bal tàm broă dong kờl ală hìu nhă gơmù bơta kal ke. Mìng is 6 nhai bồ nam do, gùt càr neh bơyai lơh geh mờr 300 broă lơh kis git jơnau git adăt, hùc dà kah tô dà, mờ ală broă lơh rê hờ tiah lài do, bơto bơtê bơhiàn niam kăc màng ai ơruh pơnu, kơnòm pa tào mờ kơnòm dềt in.

Kwơ màng tàm nhai 7 pah nam, tàm ală tiah geh uă broă lơh dờp bal dơ̆ lik lơh broă “Kis git jơnau git adăt”, “Hùc dà kah tô dà” geh Tỉñ đoàn lam lơh. Lŏ Phan Thị Trinh, Phó Ƀí thư Tỉñ đoàn càr Dăk Lăk pà git. “Ală mpồl đoàn lơh jăt ală broă lơh kis git jơnau git adăt, hùc dà kah tô dà nàng bơto bơtê đoàn viên, ơruh pơnu kơnòm pa tào mờ kơnòm dềt bè bơhiàn kăc màng, pơnyờ să jơi bơtiàn, kơnòl bơh ơruh pơnu tŭ do dê. Ală mpồl đoàn den kung bơyai lơh ală broă lơh còp mờ pà phan ală hìu nhă geh sră dong kờl bơh dà lơgar, cau geh màng mờ dà lơgar, cau mè Việt Nam khin cha jăk chài, geh ală broă lơh, lơh niam wơl tàm ală jơnang kah kơlôi ală cau ling chơ̆t màng, bơyai lơh chu ñàng kah ưn ngài ală cau ling chơ̆t màng tàm mang ngai 26 nhai 7 jơh tàm gùt càr”.

Jăt Sở Lao động – Thương ƀiñ mờ Xã hội càr Dăk Lăk yal, tơngai tus, gah lơh broă do geh pơn jăt tai lơh pràn rơlao tai broă yal mblàng nàng rơnàng kơnòm să in wă bè bơhiàn tam lơh bơh ală cau ling chơ̆t màng, ală dơ̆ phi să dờng màng bơh rơnàng ồng pàng dê. Bơh tŭ hơ̆, tơnguh ală bơhiàn ờs mờng niam bơnĕ bơh jơi bơtiàn dê, mờ lơh niam rơlao tai broă “Kis git jơnau git adăt”. Bơdìh hơ̆ tai là lơh di tŭ, lơh geh cồng nha ală broă dong kờl bơh Dà lơgar, ai geh bơta ƀuơn nàng cau geh màng mờ dà lơgar bal mờ hìu nhă gơtuh rài kis, pơn jăt tai ai tơngŏ mờ tơnguh sùm bơhiàn ờs mờng kăc màng bơh hìu nhă, jơi nòi dê. Lơh niam broă do là wèt tus jơnau kờñ drơng gàr ai hìu nhă cau geh sră dong kờl bơh dà lơgar, cau geh màng mờ dà lơgar geh rài kis ndrờm bal ha là uă rơlao mờ rài kis làng bol tàm ƀòn ơm kis bal.