Drim ngai 02/08, jăt bơta jàu kơnòl bơh Củ tịc lơgar dê, Đại tá ồng Trương Minh Đương, Kwang ătbồ Kwang àng càr Lâm Đồng bal mờ ală kwang bàng Phó Kwang ătbồ Kwang àng càr Lâm Đồng neh jàu Gai lòng Sền gàr Dà lơgar khà Pe ai 3 nă cau ling kảñ sát gùng lòt in, geh: Trung tá ồng Nguyễn Khắc Thường, Thiếu ta ồng Lê Quang Thành mờ Đại úy ồng Lê Ánh Sáng phi să tŭ neh lơh kơnòl broă tàm dơ̆ tơrlah ù tàm kwèl kơh Bảo Lộc.

Jăt mờ hơ̆, kwang đơng lam bồ Kwang àng càr Lâm Đồng neh tus tơn tàm tơl hìu kwang bàng, kwang àng neh phi să dê nàng jàu pà Gai lòng Sền gàr Dà lơgar khà Pe ai hìu bơnhă cau pròc mhàm ală cau chơ̆t màng in. Ală kwang àng geh jàu pà Gai lòng tài bơh neh geh cồng nha jak ngan tàm broă lơh, pơgồp bơnah tàm broă lơh bơ̆t bơtàu củ nghĩa xã hội mờ sền gàr Dà lơgar. Do là bơta kah rơngal, jờng rơ bơh Đảng, Dà lơgar mờ Làng bol dê gơ wèt mờ ală cau neh phi să tài broă lơh bơ̆t bơtàu mờ sền gàr lơngăp lơngai Dà lơgar. Jăt Đại tá ồng Trương Minh Đương, yal: tàm sùm ală tŭ tơngai lơh broă, tam lơh, ală kwang bàng, kwang àng: Nguyễn Khắc Thường, Lê Quang Thành mờ Lê Ánh Sáng neh yờ tơnguh nùs nhơm geh kơnòl, lơh gơs jak jơh ală kơnòl broă geh jàu.