Nghị quyết Pơrjum dờng Đảng dơ̆ XIII neh sồr: bơtàu tơnguh dùl ròt bal mờ lơh geh bơta lơh bal đah ală tiah, ală “ù tiah”; mơkung pơlam gùng dà bơtàu tơnguh ală “tiah” jat gùng dà “lơh niam rlau tai mờ ngui niam ngan rlau jơh ală bơta kwơ, bơta pràn bơh tơl “tiah” dê bè bơt bơtàu phan bơna, ală bơta geh is, gơnoar ù tiah lơh sa- cíñ trị, mpồl cau lơh broă mờ sơlơ tơnguh bơta lơh bal “tiah tàm dơlam is” mờ “lơh bal ală tiah” nàng tus bal tàm ală anih lơh bal lơh gơlik phan geh kwơ gùt plai ù, lơh geh ù tiah bơtàu tơnguh pa...

Nàng geh lơh bal tiah den bơta lài ngan là pal geh phan bơna mờ tàm tơrbŏ bal phan bơna. Jat ồng Trần Văn Hảo- Kwang atbồ Sở Kông Thương càr Hải Dương pà gĭt, tàm ală phan bơna kwơ màng, kờñ pal geh den gùng lòt ƀuơn ƀoài, gùng lòt niam đah ală tiah ngan là bơnàng jă nàng tàm tơrbŏ bal tiah mờ lơh bal tiah kung bè lơh geh ală phan bơna kwơ màng ndai. Ồng Trần Văn Hảo, đơs: “Sồr ală Ƀộ, ngàñ Dà lơgar, Ủy ƀan Ñân zân ală càr, ƀòn dờng gờñ tơrgùm lơh mhar lơh ală rơndap broă lơh gùng lòt tàm tơrbŏ bal dùl ròt bal đah ală càr, ƀòn dờng tàm tiah nàng kờñ sơlơ tơnguh lơh bal tiah, sơlơ tơnguh crơng gơs bơtàu tơnguh ală tiah lơh sa mờ măi mok, ală mpồl lơh bal gah broă mờ mpồl lơh sa mờ măi mok, drơng broă; sền gròi bơcri priă lơh pa halà rề ơnàng ală anih tờm Logistics dờng tàm Hải Phòng, Quảng Ninh, Hà Nội, Hải Dương mờ ală càr geh bơta pràn nàng lơh ală anih tờm Logistics ntrờn, nàng kờñ bơtàu tơnguh mờ ngui niam bơta ƀuơn, bơta pràn lơh broă bal, dong kờl bal mờ gơ̆p, lơh geh cồng nha tơrmù priă tă ai ală mpồl lơh sa kă bro bơtàu tơnguh bơta chài tàm pơrlòng nàng lơh geh bơta gơn kơnờm ai bơtàu tơnguh tàm jơh gùt tiah in...”.

Bơh bơta geh ngan bơh Tiah ring dà dờng Hồng- ù tiah kwơ màng ngan bè Cíñ trị, lơh sa, niam chài, mpồl bơtiàn, sền gàr dà lơgar, lơngap lơngai mờ lơh broă mờ lơgar ndai bơh dà lơgar dê. Mờ tiah tờm là càr lơgar Hà Nội- là 1 tàm 2 “tiah lam lài” lơh sa, gơn kơnờm bơtàu tơnguh lam lài bơh gùt lơgar dê, tơngai pa do, kơnờm geh bơta lơh bal, lơh broă bal, tìp mat lơh kwèng lơh sa mờ bàr pe tiah tàm Tiah ring dà dờng Hồng neh geh bơta bơtàu tơnguh nisơna bè phan bơna gùng lòt, Logistics… Bulah bè hơ̆, jat mò Lê Việt Nga- Phó Kwang atbồ Vụ Drà kă bro tàm lơgar, Ƀộ Kông Thương yal, kung gam uă ngan broă mờ gơnoar atbồ ală tiah tàm tiah do kờñ pal lơh bal mờ gơ̆p tàm broă lam lơh jat hơ̆ sồng gơtùi tam gơl muh mat gah kă bro bơh tàm tiah do mờ jơh gùt lơgar dê.

Mò Lê Việt Nga, đơs: “Geh ală gah mờ bol añ sền gŏ là bơta lơh bal tiah den kung gam ờ hềt ngui geh jơh. Pơn yơu bè gơwèt mờ rơndap ù tiah bè anih tờm Logistics den tiah ring dà dờng Hồng geh kờñ ngan rlau jơh tŭ mờ Thủ tướng Cíñ phủ neh ring bal tàm Quyết địñ sồ 1012 nam 2015 ai tiah ring dà dờng Hồng in geh tơn dùl anih tờm Logistics khà 1 ơm tàm tiah đah tô Hà Nội dê; Anih tờm Logistics khà 2 ơm tàm tiah đah Jum Hà Nội; mờ tus nam 2030 gam geh bal ală anih tờm Logistics geh bă ù ơnàng tus 50 lồ geh lơh bal mờ ală anih ơhò ơm- bơh ƀlàng rơndeh par tus anih ơhò ơm tàm dà lềng tàm tiah do dê, mơya tus tŭ do bol he kung gam ờ hềt geh sơl. Den tàng broă lơh gơ hòi gơ jà bơcri priă tàm gah broă do kờñ ngan geh bơta lòt bal lơh bal bơh ală càr, ƀòn dờng dê...”.

Kung bal mờ jơnau đơs do, mơya mò Trần Thị Phương Lan- Kwang atbồ ing Sở Kông thương ƀòn dờng Hà Nội đơs nền gơnoar broă bơh Ƀộ Kông thương dê tàm broă bơtàu tơnguh phan bơna Logistics lơh bal tiah do mờ ală tiah: “Jat añ kơlôi den uă càr tàm tiah geh ală bơta bơtàu tơnguh Logistics tàm gah gùng rơndeh lòt, gùng rơndeh par, gùng dà lềng, gùng dà dờng... den tàng añ kờñ ngan là gah do den Ƀộ Kông thương rơ̆p lơh gơnoar broă tờm nàng pơlam gùng dà, đơng pơlam ai ală càr in, mờ bol añ sơñio loh ală tiah nàng bơtàu tơnguh ai gơ in ờ gơtìp tàm rơndap rơndồl, mờ lơh jat geh cồng nha, ngui geh jơh ală gơl gùng mờ bol he geh bơta kwơ, bơta pràn tàm tiah do dê...”.

Broă lơh chồl pràn lơh bal, lơh broă bal đah ală càr, ƀòn dờng tàm tiah do nàng bơt bơtàu ală phan bơna kờñ pal geh bè gùng lòt, pơndiang phan, Logistics, ală broă lơh kă bro... rơ̆p lơh geh bơta ƀuơn ƀoài ai broă jun pơndiang, lòt rê, tàm pà phan bơna. Ồng Triệu Đăng Khoa- Kwang atbồ Hợp ták xã Trạm bạc Đồng Xâm (gơwèt Mpồl ƀòn lơh broă Trạm bạc Đồng Xâm, kơnhoàl Kiến Xương, càr Thái Bình) đơs là: “Tŭ lơh geh bơta lơh bal den kung ƀuơn ƀoài ngan sơl ai phan bơna bơh ƀòn lơh broă Trạm bạc Đồng Xâm in tài bơh tơl nă cau ndrờm geh gĭt tus, den jơh ală broă kă bro rề ơnàng den phan bơna Trạm bạc Đồng Xâm ngan ngồn rơ̆p geh gĭt tus uă tiah rlau tai...”

Jat Kwang bàng jak chài lơh sa, Phó Giáo sư- Tiến sĩ ồngTrần Đình Thiên đơs, tơnơ̆ tŭ neh geh ală phan bơna lơh bal, nàng geh bơta lơh bal ngan ngồn den kờñ ngan geh bơta lơh broă bal bơh ală mpồl lơh sa kă bro tàm ală tiah tàm tiah do mờ ală tiah dê...“Bơta sơn rờp tơnơ̆ tàm tơrbŏ tiah là pal lơh tus bơyai lơh dùl rơndap tap sèng lơh sa, lơh bè lơi mờ ală mpồl lơh broă, ală càr gơtùi lơh geh bal mờ gơ̆p. Broă sơn rờp là bơta rơndap broă lơh tàm rơndap ù tiah gơwèt mờ tiah dê là pal lơh gơlik geh ală mpồl bơtàu tơnguh gah broă, mờ bè hơ̆ den hơ̆ sồng gơtùi lơh bal geh. Rơndap tap sèng is lơh sa gơ sồr ală mpồl lơh sa kă bro bơcri priă tàm hơ̆ là pal lơh bal. Dơ̆ 2 là bè bơta kơrnoat boh lam, den ală jơnau đơs bơh lài do bol he geh tiah den hơ̆ là ù tiah lơm gời, ai tiah nàng lơh broă bal bơtàu tơnguh là bơnah kơrnoat boh lam bol he ờ hềt geh. Pal geh ală rơndap broă lơh lơh bal tiah pal gàr niam là ală rơndap broă lơh hơ̆ là gơ tàm tơrbŏ bal wơl mờ gơ̆p nàng ờ gơtìp gơ kòl... bè tŭ do đah 2 càr geh tŭ mìng ngài pơgap dùl nơm gạch lơm mờ ờ gơtùi lơh bè lơi nàng tàm tơrbŏ bal ờ...”

 Loh làng, bơta dờng màng ngan rlau jơh hơ̆ ngan là bơt bơtàu, lơh sir kơrnoat boh lam mờ sùm lơh pa tiah bơcri priă bơh tơl càr, ƀòn dờng dê tus tiah mờ ală tiah lơh bal dê, bơh hơ̆ hơ̆ sồng lơh geh ală bơta nàng gơ hòi gơ jà bơcri priă bơtàu tơnguh phan bơna tiah pa, lơh uă mờ bơta kwơ bè jơnau đơs bơh mò Nguyễn Thị Bích Ngọc- Thứ trưởng Ƀộ Kế hoạc mờ Đầu tư dê, đơs: “Cíñ phủ pah nam kung neh ai lơh jat Nghị quyết bơh Cíñ phủ dê bè lơh niam wơl tiah bơcri priă lơh sa kă bro. Den tàng bè hơ̆, bol añ kung sồr ală tiah tàm tiah do pal tơrgùm lam lơh jat dùl bă geh cồng nha ală Nghị quyết do nàng lơh niam wơl sră nggal, lơh geh ală bơta ƀuơn ƀoài ngan nàng gơ hòi gơ jà bơcri priă tàm bơtàu tơnguh phan bơna. Ală càr, ƀòn dờng tàm tiah do den pal rcang lài lơh bal, sùm bơyai lơh ală dơ̆ pơrjum gơ hòi gơ jà bơcri priă jat tiah mờ lơh, ai lơh jat ală rơndap broă lơh gơ hòi gơ jà bơcri priă jat broă PPP tơngai bơh nam 2021-2030 gơ jat bal ală mpồl broă, broă lơh dong kờl nàng gơ hòi gơ jà bơcri priă bơh cau dùl nă să dê, bơh hơ̆ dong mpồl lơh sa kă bro gĭt wă loh mờ lơh geh bơta pin dờn tŭ tus bal bơcri priă bơtàu tơnguh rơndap tap sèng phan bơna...”.