Bàr hìu bơnhă geh dong kờl lơh hìu bơta nđàc dơ̆ do tàm hơ̆ geh hìu bơnhă mò Lê Thị Hồng- ơm tàm Tổ dân phố 8, thị trấn Krông Năng, kơnhoàl Krông Năng; mờ mò Nguyễn Thị Thạo– ơm tàm thôn 9, xã Ea Kly, kơnhoàl Krông Pách. Jơh bàr hìu bơnhă ndrờm gơwèt hìu bơnhă rƀah, geh rài kis ơm dùl nă să. Tàm hơ̆, mò Nguyễn Thị Thạo geh bau là cau ling chơ̆t màng.

Bal mờ broă dong kờl tơl hìu bơnhă 60 tơlak đong nàng lơh hìu ơm, gah Ồs đèng gam dong kờl broă mut lơh, crăp ală gùng che ồs đèng tàm hìu nàng gàr niam lơngap lơngai tàm tŭ ngui. Tàm dơ̆ tàm jàu hìu, Gah Ồs đèng Dăk Lăk neh pà tivi nàng ală hìu bơnhă in geh phan ngui tàm hìu bơnhă pa. Geh gĭt tơnơ̆ dơ̆ do, Kông ty Ồs đèng Dăk Lăk gam pơn jat tai pơgồp bal mờ ală mpồl lơh broă, ală tiah lam lơh 3 nơm hìu ndai tai nàng jàu pà ai ală hìu bơnhă geh rài kis kal ke in.