Mpồl Kwang bàng lơh broă neh tus chu ñàng, pơdơng bơkào kah kơlôi tàm Tiah tềl kah yau dà lơgar kwơ màng Mpồl đơng lam tiah Tà Thiết tàm kơnhoàl Lộc Ninh. Tơnơ̆ mờ hơ̆, Mpồl kwang bàng neh tus còp să, pà phan hìu nhă geh sră dong kờl bơh dà lơgar bal mờ kơnòm bơsram geh rài kis gơtìp kal ke tàm kơnhoàl Lộc Ninh.

Mpồl kwang bàng neh jào pà 30 pò phan ai ală hìu nhă geh sră dong kờl bơh dà lơgar, 30 pò phan pà ală kơnòm bơsram geh rài kis gơtìp kal ke geh cồng nha jăk tàm broă bơsram sră, 2 hìu nhă geh sră dong kờl bơh dà lơgar gah kwang àng in. Tàm dơ̆ pà phan, Phó Củ tịc lơgar mò Võ Thị Ánh Xuân neh tam pà ală bơta kal ke mờ jờng rơ ală hìu nhă geh sră dong kờl bơh dà lơgar, hìu nhă geh màng mờ dà lơgar neh lơh ngan sơrlèt mờ kal ke, pơgồp bal tàm broă bơ̆t bơtàu ƀòn lơgar, dà lơgar dê. Mờ pơn dờn pơn-iang ală kơnòm bơsram sơrlèt mờ kal ke, lơh ngan bơsram tàp, bơsram sră jăk geh cồng nha niam. Pơn jăt mờ hơ̆, Phó Củ tịc lơgar mò Võ Thị Ánh Xuân neh tus còp, pơlam kwang bàng, cau ling tàm Pôs ling sền gàr tiah nhàr dà lơgar  Hoàng Diệu, gơwèt kơnhoàl Bù Đốp.