Mpồl dong kờl bơsram Việt Nam mờ 23 tơlak nă kwang bàng, cau tàm mpồl gam pơrjum tàm pơgap 140 rơbô ci hội mờ 125 rơbô mpồl dong kờl bơsram. Tơngai pa do, ală kấp Mpồl sùm là mpồl geh gơnoar broă tờm tàm broă hòi jà jơh gùt làng bol tus bal tơl broă lơh bơsram sră, bơsram tus jơh rài kis. Pal sền gròi ngan là, nam 2022, Kes priă dong kờl bơsram sră, dong kờl cau jak chài lơgar Việt Nam neh lơh niam wơl cơldŭ bơsram gơbàn ờ niam, jàu priă bơsram ai kơnòm bơsram rƀah, kơnòm bơsram, cau bơsram dờng geh cồng nha bơsram jak mờ cau dờng sơnam bơsram is mờ kờp jơh khà priă rlau 12 tơmàn đong.

Đơs tàm dơ̆ lơh broă Phó Thủ tướng ồng Trần Hồng Hà kơ̆p kờñ Mpồl dong kờl bơsram lơgar Việt Nam mờ nùs nhơm jơh nùs mờ nùs nhơm tă pơgồp dà kơl hề pơn jat tai geh ală bơta tă pơgồp ai broă lơh bơto bơtê, bơtàu tơnguh mpồl cau jak chài. Lơh jat niam gơnoar broă là cau tờm bơt bơtàu mpồl bơtiàn bơsram sră, bơtàu tơnguh ală broă lơh bơsram sră: hìu bơnhă bơsram sră, jơi nòi bơsram sră, mpồl bơtiàn bơsram sră mờ mpồl lơh broă bơsram sră.