Jơnau Bác Hồ bơto: pal gĭt sền gàr srơh tàm pơrlòng sùm, sùm sùm, neh geh mpồl ling sền gàr tiah nhàr lơgar bơsram lơh jat jơh nùs ngan mờ sền hơ̆ là “jơnau sơñio gùng lòt” lơh broă. Jơnau tàm Pôs đồng ling sền gàr tiah nhàr lơgar Huổi Luông, lơh pôs đồng tàm ù tiah xã Huổi Luông, kơnhoàl Phong Thổ, càr Lai Châu là cơng tàng niam ngan ai broă bơsram mờ lơh jat bồ tơngoh, nùs nhơm, broă lơh mờ rài kis Hồ Chí Minh dê gam geh bơyai lơh duh hồl ngan tàm jơh gùt ling klàng, geh ngan mờ ngan ngồn.

Oh Giàng Mý Só là dùl tàm ală kơnòm bơsram geh rài kis kal ke, nđàc sơngĭt ngan geh Mpồl ling sền gàr tiah nhàr lơgar Huổi Luông, kơnhoàl Phong Thổ, càr Lai Châu dờp lơh kòn ròng mờ dong kờl pah nhai 500 rơbô đông. Ngoh rơngăc yal oh Só pà gĭt: Nam do oh bơsram ơdŭ 5 rao, dilah ờ geh ală wa mpồl ling sền gàr tiah nhàr lơgar dờp ròng oh den oh ờ geh tŭ tus hìu bơsram, tus tàm ơdŭ nàng bơsram akhar tai. Oh Giàng Mý Só, đơs: “Rài kis hìu bơnhă sau dê kal ke ngan, ờ geh phe sa; geh ală wa mpồl ling dong kờl lòt bơsram, dong kờl pah nhai 500 rơbô đông, sau neh ngui priă do nàng blơi sră măy, sră cih, phan ngui bơsram sră mờ tềm pềr nàng blơi phe tai. Ală wa mpồl ling dong kờl, oh rơ̆p pơnđơl pràn lơh ngan bơsram sră, lòt bơsram tơl làm”.

Thiếu tá Nguyễn Hữu Kiểm, Cíñ trị viên Pôs đồng ling sền gàr tiah nhàr lơgar Huổi Luông pà gĭt: sền gĭt broă lơh “dong kờl oh lòt bơsram” mờ “Kòn ròng pôs đồng ling sền gàr tiah nhàr lơgar” là dùl tàm ală broă lơh bềng nùs nhơm kờñ gơboh kòn bơnus. Den tàng, bơh tŭ lam lơh mpồl ling neh mblàng yal, hòi jà kwang bàng, cau ling tă pơgồp bal priă jền mờ hòi jà dong kờl bơh ală mpồl cau, cau dùl nă să is nàng dờp ròng siam mờ dong kờl ală sau. 

Bal mờ dong kờl mờ priă, mpồl ling gam sùm ai kwang bàng dong kờl hìu bơnhă tơnhào phan lơh geh bơh suơn sre, sih tam phan. Mơkung rcang lài pơgồp bal mờ gơnoar atbồ ală tiah kờp sền ală hìu bơnhă kơnòm bơsram tàm ù tiah dê geh rài kis kal ke, hìu bơnhă rƀah mơya ờ geh dờp ròng siam, dong kờl nàng hòi jà tă pơgồp bơh cau geh nùs nhơm niam mờ broă pà phan ngui kwơ màng, pà priă bơsram di ngai sơnđờm mut bơsram, ngai Dunia kơnòm dềt 01/06, halà àng ndar me trung thu... Do kung là dùl tàm ală broă lơh geh ngan mờ Pôs đồng ling sền gàr tiah nhàr lơgar Huổi Luông gam lơh jat jơnau đơs pơndŭt sồ 01 bơh Ƀộ Cíñ trị dê bè pơn jat tai lơh jat Cỉ thị sồ 05 bè lơh pràn bơsram sră mờ lơh jat bồ tơngoh, nùs nhơm, broă lơh mờ rài kis Hồ Chí Minh dê.

Thiếu tá Nguyễn Hữu Kiểm pà gĭt: “Pa do ngan rlau jơh mpồl ling neh lơh broă lơh mpung gle tiah nhàr lơgar mờ neh geh 82 hìu bơnhă geh lam lơh bơh Hồ Thầu mờ rlau 3 kơi sồ gùng tiah nhàr lơgar mờ ală broă lơh geh ngan là bol añ neh jàu ai ală mpồl mờ tơl nă đảng viên in pah ngai, pah poh tus tơl hìu bơnhă nàng mblàng yal, hòi jà mờ gĭt nùs nhơm, bơta kơ̆p kờñ bơh làng bol dê, mơkung bơto pơlam làng bol lơh jat broă lơh tờm sơntìl pa bơtàu tơnguh lơh sa hìu bơnhă”.

Mờ kơnòl broă atbồ, sền gàr rlau 13 kơi sồ gùng tiah nhàr lơgar mờ 15 jrong sơn tơ̆p, tàm hơ̆ geh 21 ƀòn, nàng broă bơsram mờ lơh jat jơnau sồr Bác Hồ dê geh lơh jat ngan ngồn mờ geh cồng nha, Đảng ủy, Mpồl đơng lam Pôs đồng ling sền gàr tiah nhàr lơgar Huổi Luông neh lơh ngan ngồn broă bơsram mờ lơh jat krơh niam Bác Hồ dê mờ ală broă lơh geh ngan mờ lam lơh tus jơh gùt mpồl kwang bàng, đảng viên, cau ling nàng dan cih mat tus bal bơh 1 tus 2 tơngume broă lơh. Đại úy ồng Tẩn Lở Tông, Pôs đồng ling sền gàr tiah nhàr lơgar Huổi Luông, kơnhoàl Phong Thổ, càr Lai Châu, đơs: “Să tờm añ tơnơ̆ tŭ geh mblàng, bơsram, lơh jat krơh niam, nùs nhơm, broă lơh mờ rài kis Hồ Chí Minh, tàm broă lơh atbồ, sền gàr tiah nhàr lơgar añ neh dan mờ Đảng ủy, Mpồl đơng lam mpồl ling lơh niam broă lơh lòt sền, gròi sền gùng tiah nhàr lơgar, jrong sơn tơ̆p nhàr lơgar. Añ neh lòt mblàng yal, hòi jà làng bol bè broă lơh sền gàr tiah nhàr lơgar. Bơh hơ̆ làng bol neh tơnguh bơta gĭt wă mờ lơh jat niam”.  

Ală nam do, Pôs đồng ling sền gàr tiah nhàr lơgar Huổi Luông kung sùm rcang lài pơgồp bal mờ gơnoar atbồ ală tiah tàm broă lơh mblàng yal ai làng bol in tơnguh uă bơta gĭt wă bơt bơtàu mờ sền gàr tiah nhàr lơgar; dong kờl uă hìu bơnhă kal ke bơtàu tơnguh lơh sa, dong kờl kơnòm bơsram geh rài kis kal ke uă geh lòt bơsram.

Bơh broă bơsram mờ lơh jat jơnau sồr bơh Bác Hồ dê tàm Pôs đồng ling sền gàr tiah nhàr lơgar Huổi Luông neh cèng tus bơta pin dờn kờñ gơboh ai làng bol ală jơi bơtiàn kòn cau tiah nhàr lơgar dê, sơlơ lơh niam rlau tai rùp hin niam bơnĕ ngan bơh ală cau ling griăt tơlir dê, pơgồp bơnah bơt bơtàu mpồl ling cíñ quy, kơ̆ kơljap, pràn kơl dang tơl làm, lơh sir niam ngan kơnòl broă sền gàr gơnoar tờm, lơngap lơngai tiah nhàr lơgar bơh Dà lơgar dê.