Jơnau yal bơh Tập đoàn Điện lựk Việt Nam (EVN), tập đoàn do neh geh kơrnoăt sồ 377 bè broă tơnguh khà priă tăc ồs đèng. Jăt mờ hơ̆, bơh ngai 04 nhai 5 nam 2023, priă tăc ồs đèng ndrờm bal là 1 rơbô 920 đong tàm 1 kWh ồs đèng, ờ hềt kờp tă dia gơguh khà priă. Khà priă tơnguh do gơguh 3% pơn drờm mờ khà priă ồs đèng tŭ do.

Lài mờ hơ̆, ngai 31 nhai 3 lài do, Ƀộ Kông thương neh yal cồng nha sền priă tă lơh sa kă bro nam 2022 là 2 rơbô 32 đong tàm 1 kWh ồs đèng, gơguh rơlao 9% pơn drờm mờ nam lài. Ƀộ Kông thương neh geh sră nggal bơto sồr Tập đoàn Điện lựk Việt Nam lơh jăt broă tơnguh khà priă tăc di jăt mờ jơnau đơng lam bơh Thường trựk Cíñ phủ, nàng gàr niam broă lơh khà priă ồs đèng ờ gơguh nggùl gơl, geh tơngai, ring niam cíñ trị mờ lơngăp lơngai mpồl bơtiàn, di pal mờ bơta kwơ đah mpồl lơh sa kă bro mờ làng bol dê.