Nam 2023, priă bơcri lam lơh Broă lơh jơnau kờñ dà lơgar bơtàu tơnguh tiah làng bol jơi bơtiàn dùl êt nă cau mờ tiah kơh bơnơm tam pà ai càr Quảng Nam in rlau 782 tơmàn đông. Tàm nam 2022 mờ quý 1 nam 2023, broă lam lơh Broă lơh do gam gơtìp kal ke. Jơnau là tài ală anih lơh broă dà lơgar lơyài ai tơlik sră nggal pơlam lơh jat, ală tiah gam kwi kuơ ngan tàm broă lam lơh ală rơndap broă lơh. Jat ồng Nguyễn Công Thành, Phó Kwang atbồ Sở Giáo zụk mờ Đào tạo càr Quảng Nam pà git, uă jơnau cih, jơnau sồr lam lơh broă dong kờl gơ wèt mờ kơnòm bơsram tiah kơh bơnơm tàm ală Rơndap broă lơh dềt bơto bơsram gơ wèt broă lơh jơnau kờñ dà lơgar bơtàu tơnguh lơh sa- mpồl bơtiàn tiah jơi bơtiàn dùl êt nă cau mờ tiah kơh bơnơm bơh càr dê gam uă kòl yan: “Tàm bal dùl hìu bơsram, dùl ơdŭ bơsram, uă kơnòm bơsram nggui bal dùl kơ ƀàng mờ gơp, mơya 1 nă oh den geh dờp broă dong kờl bơh dà lơgar dê, 1 nă oh geh dờp broă dong kờl càr dê den ờ dipal ngan. Bol hi dan pal tam gơl broă lơh dong kờl, nàng lơh bè lơi broă dờp bơta dong kờl pal ring bal”.

Ồng Lê Văn Dũng, Phó Ƀí thư Thường trựk Tỉñ ủy Quảng Nam đơs 2, 3 bơta kal ke tàm ală tiah kơh bơnơm tŭ lam lơh ală rơndap broă lơh dềt bè khà hìu bơnhă rƀah uă ir, rài kis làng bol dê gam uă kal ke den tàng bơta pràn tă priă lam lơh rơndap broă lơh lơyah ngan. Bal mờ hơ̆ pràn jak, bơta chài lơh broă bơh mpồl kwang bàng tàm tiah kơh bơnơm dê ờ hềt lơh jat jơnau sồr tàm tŭ lam lơh ală rơndap broă lơh dềt. Ồng Lê Văn Dũng geh jơnau dan: “Pal lơh ƀuơn sră nggal tàm tŭ lam lơh rơndap broă tài sră nggal tŭ do kal ke ir. Broă lơi gơtùi tam pà kâp ai kâp càr, kâp kơnhoàl, geh tŭ kâp xã in den dà lơgar pal geh gùng dà nàng tam pà kâp”.

Đơs tàm dơ̆ lơh broă, ồng Hầu A Lềnh, Ƀộ trưởng- Củ ñiệm Ủy ƀan Jơi bơtiàn kòn cau cih dờp ală jơnau dan, jơnau sồr bơh càr Quảng Nam dê. Uă kal ke, kòl yan gơlik geh tàm tŭ lam lơh Broă lơh jơnau kờñ dà lơgar bơtàu tơnguh lơh sa- mpồl bơtiàn tiah jơi bơtiàn dùl êt nă cau mờ tiah kơh bơnơm rơp geh Mpồl kwang bàng tơrgùm jơh yal Cíñ phủ in gờñ geh broă lơh tă bơsong. Ồng Hầu A Lềng sồr càr Quảng Nam pal rơcang lài pơgồp bal jơh nùs mờ ală Ƀộ, gah broă lơh dà lơgar tàm tŭ tă bơsong kal ke, bơsong broă lơh: “Broă lơi gơ wèt kơnòl bơh dà lơgar dê den dà lơgar pal lơh, pal tă bơsong. Thủ tướng Cíñ phủ neh jàu ai ală Ƀộ, gah broă lơh in tơrgùm tam gơl, lơh niam wơl. Geh 3 mpồl broă pal lơh: Mpồl dơ̆ dùl là tă bơsong kal ke, mpồl dơ̆ 2 là bơsong ală broă gơ tàm rơndap rơndồ mờ mpồl dơ̆ 3 là bơ tơl ală bơta lơi ờ hềt geh”.