Tus tŭ do, bơh bơta jòi kŭp jơh nùs ngan bơh mpồl lơh broă geh gơnoar dê, bal mờ bơta pơnđơl pràn lơh ngan mblàng yal, lòt sền, gròi sền, gàr niam lơngap lơngai, rơndap tap sèng bơh gơnoar atbồ tiah do dê, ring lơngai neh rê wơl wơl tàm kơnhoàl Cư Kuiñ, càr Dăk Lăk.

Tus wơl tàm xã Ea Ktur 3 ngai tơnơ̆ tŭ gơlik geh broă sò tơm mờ phàu, làng bol xã neh neh rê wơl mờ rài kis bè ờs pah ngai. Jat kềng gah gùng tàm tơrbŏ bal mờ Anih tờm xã rê tàm ală thôn, ƀòn, rài kis neh gơ rê wơl bè ờs. Anih ràng tăc phan neh pờ, ală broă lơh lòt rê pơndiang phan bơna neh lơh broă wơl. Nàng gàr geh lơngap lơngai ai làng bol in, càr Dăk Lăk neh lơh ală anih tờm geh ală mpồl lơh broă geh gơnoar ơm gak jơh ngai mang. Ngan bơta do neh cèng wơl nùs nhơm lơngap lơngai, iang nùs ai làng bol in. 

Tàm gơ jàr mờ trồ tiah niam, ồng Ngô Văn Hồng (ơm tàm thôn 22, xã Ea Ning, kơnhoàl Cư Kuiñ) ờ ru ngan mờ broă lơh niam wơl ù nàng rcang tam tờm kơphê. Ală bơnah broă do, hìu bơnhă ồng kờp dŭ lơh bơh bàr pe ngai lài mơya pal ơm ing wơl tài bơh jơh bă ù suơn mìr bơh hìu bơnhă ồng dê ndrờm ơm tàm ù tiah xã Ea Ktur. Tơnơ̆ broă mpồl cau ngui phàu sò tơm tàm Hìu duh broă Ủy ƀan Ñân zân 2 xã Ea Tiêu mờ Ea Ktur, hìu bơnhă ồng pal lời wơl broă lơh broă tàm mìr tài bơh rơngòt. Mơya, tŭ sền gŏ ală bơta pơnđơl pràn lơh ngan bơh ală mpồl lơh broă geh gơnoar mờ bal mờ broă lơh mblàng yal, pơndờm pơnđiang nùs nhơm làng bol bơh gơnoar atbồ tiah do dê, ồng neh iang nùs lòt lơh broă wơl tàm mìr.

Ồng Ngô Văn Hồng đơs: “Tơnơ̆ tŭ broă lơh jàñ bơsak ngan bơh mpồl cau do dê tàm mang ngai 11/06, làng bol rơngòt ngan, kơlôi sơng ngan. Mơya tus tŭ do sền gŏ mpồl lơh broă geh gơnoar jòi kŭp uă ngan, gơnoar atbồ tiah do mblàng yal, yal jơnau yal di tŭ bè broă gơlik geh tàm loa yal tơngĭt jơnau den să tờm añ kung bè làng bol tàm thôn, ƀòn neh iang nùs rlau tai. Mờ bơta bè tŭ do, bol añ gờñ bè ờs wơl nùs nhơm mờ gơ rê wơl mờ rài kis bè ờs”.  

Kung pờ wơl anih ràng tăc phan kă bro phan lơh geh bơh lơh sa suơn sre, măi kòi ai làng bol in tơnơ̆ 2 ngai til kơ̆ mpồng nàng sền gàr hìu bơnhă, bi Nguyễn Thị Anh, ơm tàm  xã Ea Ktur kung ờ hềt jơh sơl bơta rngòt mprơm nùs. Anih ràng tăc phan bi dê ơm tàm gùng lòt tờm, ngài mờ hìu lơh broă xã Ea Ktur dê pơgap 1 kơi sồ. Tàm drim ngai 11/06, tŭ gĭt geh jơnau yal bè broă do, hìu bơnhă bi rơngòt ờ khin pờ mpồng tăc phan. Tus tŭ do, bơh ală gah yal tơngĭt jơnau mpồl bơtiàn dê geh gĭt ală bơta neh geh mpồl lơh broă geh gơnoar gròi sền lơngap lơngai den hìu bơnhă bi Anh pờ mpồng kă bro wơl.

Bi Nguyễn Thị Anh pà gĭt, tơnơ̆ broă gơlik geh, kơnờm gơnoar atbồ, ală mpồl lơh broă geh gơnoar tus sền gàr ai ƀòn lơgar in den să tờm hìu bơnhă bi mờ làng bol gùt dar kung iang nùs pờ mpồng kă bro, lơh sa kă bro, lòt lơh broă tàm mìr wơl. Ngan là, tŭ mpồl lơh broă geh gơnoar jòi kŭp geh bàr pe nă cau, làng bol kung ờ hoan rngòt tai mờ sơlơ kơ̆ nùs pin dờn.

Broă lơh iơh bơsak bơh mpồl sò tơm mờ phàu, pềs tàm hìu lơh broă Ủy ƀan Ñân zân 2 xã Ea Tiêu mờ Ea Ktur dê neh lơh nùs nhơm làng bol tàm kơnhoàl Cư Kuiñ gơ jrañ nùs ngan. Mục sư ồng Smit dê (gam hòi là ồng Y Djan Eban, 73 sơnam, ơm tàm ƀòn Kniết, xã Ea Ktur, kơnhoàl Cư Kuiñ, càr Dăk Lăk), gơ jrañ nùs đơs: “Añ sền do là dùl broă lơh iơh bơsak ngan, bơh dềt tus dờng añ ờ hềt gŏ geh den ngan ngồn là rơngòt uă ngan”.

Nàng ală thôn, ƀòn tàm 2 xã Ea Tiêu mờ Ea Ktur, kơnhoàl Cư Kuiñ, càr Dăk Lăk gờñ rê wơl mờ bơta lơngap lơngai, bè ờs wơl rài kis, ală mpồl lơh broă geh gơnoar bơh càr, gơnoar atbồ kơnhoàl, xã neh ơm gak sùm ngai mang, pơnđơl pràn lơh ngan jòi kŭp, kŭp ală cau lơh roh bơta lơngap lơngai. Bơdìh mờ hơ̆, mờ uă broă lơh mblàng yal, pơndờm pơđiang mpồl bơtiàn làng bol, mìng tơnơ̆ 3 ngai gơlik geh broă do, lơngap lơngai neh rê wơl tàm ală thôn, ƀòn bơh 2 xã dê.

Ồng Nguyễn Kim May, Phó Ƀí thư Đảng ủy, Củ tịc Ủy ƀan Ñân zân xã Ea Ktur, kơnhoàl Cư Kuiñ, càr Dăk Lăk pà gĭt, tŭ do, rài kis mờ nùs nhơm bơh làng bol tàm ù tiah 19 thôn, ƀòn dê neh iang nùs mờ lơh broă wơl bè ờs bơh ngai 12 nhai 6.

Nàng gàr niam ai làng bol in bè ờs wơl nùs nhơm, lơh sa, kă bro tơnơ̆ bơta rềs àr gơlik geh, xã neh mblàng yal, yal tus ală anih lơh broă cíñ trị ală thôn, ƀòn mờ làng bol bè bơta mut lơh bal bơh anih lơh broă geh gơnoar dê lùp sền, lơh tờm tơl ală bơta; pơndờm pơnđiang nùs nhơm làng bol ờ gŏ di rơngòt, gơ plơ̆ nùs mờ neh sồr làng bol tŭ ờ geh broă kwơ màng den ờ gŏ di lik bơdìh tàm trồ mang halà àng drim gờñ; tơnguh uă nùs nhơm rcang sền ngăc tàm làng bol, hòi jà làng bol tŭ geh tềl tơngŏ nisơna tàm ƀòn lơgar den yal mơ ai gơnoar atbồ tiah he dê halà anih lơh broă geh gơnoar in gĭt nàng bơsong di tŭ.

Bơdìh mờ bơta mblàng yal bơh gơnoar atbồ tiah do dê, ală anih pơrjum gah pin dờn jat yàng kung lơh ngan mblàng yal nàng bè ờs wơl nùs nhơm làng bol, dong làng bol gờñ rê wơl mờ rài kis bè ờs.  Mục sư ồng Smit dê pà gĭt, tơngai tus, tàm ală dơ̆ pơrjum, bol añ rơ̆p tơrgùm mblàng yal ai làng bol in pal lơh ngan pơrjum gah pin dờn jat yàng, lơh bè lơi kis niam rài kis lơh àng sơndah yàng mờ kờñ gơboh dà lơgar. Pơnđơl pràn lơh ngan lơh sir kơnòl broă Đảng mờ Dà lơgar dê jàu; lơh jat di jơnau sồr, gùng dà broă lơh bơh ală kấp gơnoar atbồ tiah he dê.