Phan bơna rơhời lơh gơs dong kờl muh măt tiah làng bol kòn cau sơlơ niam mờ ai geh bơta niam nàng làng bol tơnguh bơtàu lơh sa, tơnguh priă geh, kơl jăp rài kis.

Gơl gùng ƀòn geh lơh tàm ƀòn Sóc Bưng, xã Thạnh Phú, kơnhoàl Mỹ Xuyên geh lơh mờ bê tông jòng mờr 500 thơ̆k, ơnàng 3 thơ̆k, geh ai ngui bơh lồi nam 2022 neh ai geh bơta niam nàng git nđờ rơhiang hìu làng bol kòn cau Khmer in lòt rê ƀuơn. Ồng Lý Văn Nâu, kis tàm ƀòn Sóc Bưng chờ hờp đơs: “Tŭ ờ hềt geh lơh gùng do den làng bol lòt rê gơtìp kal ke ngan, đơs bal là gùng ƀơ̆, bŏ uă ờ gơtùi lòt, broă kă bro, cau tus blơi phan geh lơh ờ gơtùi lòt. Tŭ do neh geh gùng, cau blơi phan tus tơn tàm suơn nàng blơi, oh kòn lòt bơsram kung ƀuơn, làng bol, bol añ ưn ngài Đảng, Dà lơgar neh lơh gơs gùng do”.

Ờ mìng geh bơcri priă lơh gùng lòt tàm ƀòn, nam lài, drà xã Thạnh Phú geh lơh pa mờ kờp jơh priă tă lơh rơlao 1 tơmàn đong nàng ala drà lài do neh ờ kơl jăp tai, dong kờl cau tăc phan tàm drà mờ làng bol kă bro phan geh ƀuơn mờ niam rơlao. Ồng Phú Việt Bền, Phó Củ tịc UɃÑZ xã Thạnh Phú yal, xã geh tơlao 57% khà kờp làng bol là kòn cau Khmer, kơnờm mờ broă bơcri priă lơh phan bơna rơhờp geh lơh gơs, rài kis làng bol geh uă tam gơl. “Đơs ngan làng bol kis tàm xã geh dờp broă lơh do chờ hờp ngan. Den gơwèt mờ xã kung yal mblàng lam sồr làng bol lơh ngan tơnguh geh cồng nha, lơh ngan prăp gàr broă lơh geh ngui jŏ jòng. Tàm tơngai tus gơwèt mờ xã kung kơ̆p kờñ geh broă sền gròi pơn jăt tai bơcri priă bơh broă lơh dê, kung dà lơgar he nàng drơng ai làng bol in tàm broă lơh sa, kă bro kung bè tơnguh uă rài kis, nùs nhơm ai làng bol in geh niam rơlao”.

Lồi nam lài, rơlao 200 hìu làng bol kis tàm xã Liêu Tú, kơnhoàl Trần Đề chờ hờp ngan tŭ broă lơh rơbàng Ta Ốc jòng 20 thơ̆k, ơnàng 3,4thơ̆k geh priă tă lơh rơlao 1 tơmàn 300 tơlăk đong geh ai ngui. Ồng Tăng Rô Qui Sa, dùl nă làng bol kis tàm do yal, lài do, rơbàng lài do mìng ơnàng 1 thơ̆k tài làng bol lơh is, tài ờ ơnàng den tàng kơnờm dềt lòt bơsram tàm kàl mìu neh uă dơ̆ gơtìp rềs àr, làng bol pơn diang phan geh bơh lơh sa suơn sre kung kal ke sơl. Bơh tŭ rơbàng Ta Ốc geh lơh gơs, làng bol geh uă bơta ƀuơn nàng tơnguh bơtàu lơh sa. “Tơnơ̆ mờ tŭ dà lơgar bơcri priă lơh rơƀàng ơnàng rơlao 3 thơ̆k do, den làng bol kis tàm do kung chờ hờp ngan, tài kung ƀuơn ngan ai làng bol in tàm broă lòt rê kung bè oh kòn in lòt bơsram. Tàm pơgăp 200 hìu làng bol geh ngui sùm rơbàng do, den tàng làng bol chờ hờp ngan”.

Broă lơh jăt jơnau kờñ dà lơgar tơnguh bơtàu lơh sa mpồl bơtiàn tiah làng bol kòn cau là gùng dà broă lơh di pal ngan bơh Đảng, Dà lơgar dê. Broă lơh do geh pơgồp bal 118 broă lơh mờ 10 rơndăp broă lơh, 14 rơndăp broă lơh dềt, 36 tơngu me bơnah broă lơh, tàm hơ̆ geh uă broă lơh tơrgùm bơcri priă bơ̆t bơtàu phan bơna geh kwơ drơng tàm broă lơh sa mờ rài kis tiah làng bol kòn cau in.

Ồng Trần Khắc Trung, Phó Kwang atbồ Ƀan Zân tộk càr Sóc Trăng pà git, càr geh rơlao 35% là làng bol kòn cau, tàm hơ̆, rơlao 30% là kòn cau Khmer. Broă lơh neh pơgồp bal tàm broă rơhời lơh gơs phan bơna tàm tiah ƀòn lơgar, ai geh bơta ƀuơn làng bol kòn cau kis tàm càr do in tơnguh bơtàu, lơh sa, tơnguh priă lơh geh, tơnguh uă rài kis phan bơna, nùs nhơm ai làng bol kis tàm tiah kòn cau đơs bal mờ làng bol kòn cau Khmer đơs is.

Bơh nam 2021 tus 2023, kờp jơh priă bơcri bơ̆t bơtàu phan bơna geh tam pà ai càr in rơlao 267 tơmàn đong, tàm hơ̆, kes priă Dà lơgar rơlao 236 tơmàn đong. Kờp tus tŭ do, càr neh bơcri priă lơh pa 113 broă lơh, lơh gùng lòt tàm ƀòn, phan bơna tàm drà kă bro, hìu pơrjum mpồl bơtiàn..., lơh niam wơl rơlao 50 broă lơh phan bơna tiah làng bol kòn cau gơtìp kal ke in. Ồng Trần Khắc Trung pà git tai: “Gàr niam broă ngui geh cồng nha priă bơcri bơ̆t bơtàu phan bơna, den càr geh pơn jăt tai tơrgùm bơcri priă jăt broă lơh, broă rơndăp lơh bơcri priă dà lơgar di mơ tơngai bơh nam 2021 tus 2025 neh geh ai, tàm hơ̆ uă ngan là broă tơnguh mờ lơh geh uă cồng nha broă pơgồp bal ală priă bơh broă lơh jăt jơnau kờñ dà lơgar tơnguh bơtàu lơh sa mpồl bơtiàn tiah làng bol kòn cau mờ ală broă lơh jăt jơnau kờñ dà lơgar bè bơ̆t bơtàu ƀòn lơgar pa, tơmù rơƀah kơl jăp, ală broă lơh, rơndăp broă lơh geh gơrềng tus mờ lơh tàm ù tiah càr, tàm hơ̆ uă ngan là broă hòi jà geh cồng nha priă tă bơh mpồl bơtiàn”.

Càr Sóc Trăng ai geh jơnau kờñ tus nam 2025, geh lơh gơs broă bơ̆t bơtàu phan bơna lơh sa mpồl bơtiàn tiah làng bol kòn cau nàng di pal mờ broă kờñ tơnguh bơtàu lơh sa mpồl bơtiàn, tơnguh uă rài kis làng bol kòn cau đơs bal mờ làng bol kòn cau Khmer đơs is.