Ờ mìng tơnguh uă bè khà cau mŭt đảng mờ bơta jak đảng viên pa tơmŭt đảng là cau jơi bơtiàn dùl êt nă cau kung ngai sơlơ geh tơnguh tai, pơgồp bơnah lơh jăt geh cồng nha broă lơh bơtàu tơnguh lơh sa- mpồl bơtiàn.

Sơnah ƀòn Vĩnh Phước là dùl tàm ală sơnah ƀòn ơm rềp kềng gah dà lềng bơh thị xã Vĩnh Châu dê. Uă nam do, Đảng ƀộ sơnah ƀòn Vĩnh Phước sùm sền gròi ngan broă lơh tơmŭt đảng ai uă cau in, tàm hơ̆ geh tơmŭt đảng ai cau jơi bơtiàn dùl êt nă cau in.

Phó Ƀí thư Đảng ủy sơnah ƀòn Vĩnh Phước ồng Nguyễn Thanh Tùng, pà gĭt: Pah nam, jăt tàm bơnàng jă, broă rơndăp lơh, kơrnoăt jàu khà kung bè ală sră nggal sồr lơh bơh Thị ủy dê bè broă lơh tơmŭt đảng ai uă làng bol in, Đảng ủy sơnah ƀòn neh tơrgùm lam lơh uă broă lơh nàng tơnguh uă khà đảng viên, cồng nha tơmŭt đảng ai làng bol in; tàm hơ̆, lơh ai lơh jăt ală sră nggal sồr lơh, kơrnoăt jàu khà tơmŭt đảng loh làng ai Ci ƀộ gơwèt bal in bơh bồ nam tơn; mơkung lơh niam broă lơh lơh geh mpồl cau rơcăng tơmŭt đảng. Ồng Nguyễn Thanh Tùng, đơs: Cau bol añ sền gròi uă tus đoàn viên, cau tàm mpồl, hơ̆ sồng làng bol pơnrơ jak, kwơmàng là sền gròi tus làng bol jơi bơtiàn dùl êt nă cau tàm sơnah ƀòn. Cồng nha kờp sền bơtơl rơcăng lài. Bè rơcăng lài bơh nam 2022 dê hơ̆ den kờp jơh là 27 nă làng bol, ai lòt bơsram ală jơnau gĭt wă bè Đảng ală dơ̆ geh 21 nă. Cồng nha là bol añ tơmŭt đang ai 17 tàm 16 nă cau pơndrờm mờ khà hơđang jàu, lơh geh 106%, tàm hơ̆, đảng viên là jơi bơtiàn dùl êt nă cau geh 9 nă, geh tus rlau 52%.

Ală rơnàng đảng viên pa tàm sơnah ƀòn Vĩnh Phước ndrờm geh bơto pơlam, dờng pràn bơh ƀòn lơgar. Bơh ală srơh bơh ală mpồl đoàn, mpồl ơruh pơnu, uă cau pơnrơ jak neh geh yal tơngĭt mờ geh tơmŭt tàm Đảng. Bi Ngô Thị Thảo Trang là Ƀí thư Ci đoàn ƀòn Xẻo Me, sơnah ƀòn Vĩnh Phước, thị xã Vĩnh Châu. Bi Trang là ùr ătbồ ơruh pơnu sùm rơcăng lài lòt rềp mờ ƀòn lơgar, jòi uă broă lơh bơtòm tơrgùm ơruh pơnu, pơlam lam lơh broă lơh. Bi sùm sền gròi lơh sùm mờ tơnguh uă cồng nha pơrjum tàm ci đoàn, di tŭ iăt kơno jơnau kơlôi sơnơng, bơta kơ̆p kờñ bơh đoàn viên, ơruh pơnu dê. Bơh hơ̆, bi neh bal mờ ƀòn lơgar bơyai lơh uă broă lơh geh kwơ ngan mờ geh cồng nha tàm ală gah broă, bè: Srơh Ơruh pơnu lơh broă dong kờl is, pà mhàm, kah rơngal dà kơlhề, lam lài bơtàu tơnguh lơh sa...Bơh 02 nam lơh broă mờ bơsram tàp, bi Trang geh rơcăng tơmŭt đảng. Bi Ngô Thị Thảo Trang, chờ hờp đơs: Tŭ do, den oh neh jơh bơsram ơdŭ gĭt wă bè Đảng, tàm tơngai tus den oh rơ̆p sơlơ tơnguh uă tai bơta gĭt wă, lùp bơsram, sơlơ bơtơl tai ală bơta chài bè broă lơh ờs mờng cíñ trị nàng lơh sir niam să jan rlau mờ lơh gơs jak rlau kơnòl broă geh jàu nàng geh ñă ntàu tàm mpồl cau bơh Đảng dê.  

Thị xã Vĩnh Châu là tiah geh gal làng bol jơi bơtiàn dùl êt nă cau bơh càr Sóc Trăng dê, bè: jơi bơtiàn Khmer geh rlau 52%, jơi bơtiàn Lo geh rlau 17% khà kờp làng bol bơh jơh gùt thị xã dê, Đảng ƀộ thị xã Vĩnh Châu sùm sền gròi sơlơ tơnguh tai broă lơh tơmŭt Đảng tiah làng bol jơi bơtiàn dùl êt nă cau in mờ sền do là kơnòm broă sùm, kwơmàng. Đảng ƀộ thị xã Vĩnh Châu tŭ do geh 42 đảng ƀộ, ci ƀộ gơwèt bal, tàm hơ̆ geh 10 Đảng ƀộ xã, sơnah ƀòn, 5 Đảng ƀộ gah sơnah lơh broă, mờ 27 Ci ƀộ gah sơnah lơh broă; geh 207 Ci ƀộ gơwèt Đảng ƀộ kơnă hơđơm. Jăt mờ hơ̆, thị xã geh rlau 4 rbô 200 nă đảng viên, tàm hơ̆ geh rlau 1 rbô 700 nă đảng viên là làng bol jơi bơtiàn dùl êt nă cau. Jăt Phó Ƀí thư Duh broă sùm Thị ủy Vĩnh Châu, mò Phan Thị Xinh Hưởng yal, Đảng viên là làng bol jơi bơtiàn dùl êt nă cau là mpồl cau pơgồp bơnah uă ngan tàm bơta bơtàu tơnguh bal bơh thị xã dê, khi là cau geh bơngă pin dờn mờ là cau lam lài lơh krơh tàm broă lơh jăt ală srơh lơh broă kăc màng tàm ƀòn lơgar, ngan là tàm bơ̆t bơtàu ƀòn lơgar pa. Phó Ƀí thư Duh broă sùm Thị ủy Vĩnh Châu, mò Phan Thị Xinh Hưởng, đơs: Tơngai tus, Mpồl lơh broă sùm Thị ủy Vĩnh Châu kung gĭt nền lơh geh mpồl cau nàng tơmŭt đảng tàm tiah jơi bơtiàn dùl êt nă cau là dùl kơnòl broă geh sền gròi mờ sồr lơh sùm. Nam 2023, Mpồl lơh broă sùm Thị ủy Vĩnh Châu neh lam lơh bàr pe broă lơh nàng tơmŭt đảng tàm tiah jơi bơtiàn dùl êt nă cau.

Mờ ală broă lơh ngăc ngar, bơceh lơh, broă lơh tơmŭt Đảng là cau jơi bơtiàn dùl êt nă cau tàm thị xã Vĩnh Châu neh cèng wơl ală cồng nha niam ngan. Bơta hơ̆ geh tơngŏ loh làng bơh broă lơh ngan ngồn tàm rài kis, ală anih lơh broă cíñ trị, ală mpồl đảng pràn kơldang kơ̆ kơl jăp, tơngŏ loh gơnoar broă lam bồ làng bol tàm bơtàu tơnguh lơh sa, niam chài, mpồl bơtiàn sền gàr niam dà lơgar, lơngăp lơngai...tàm tiah he dê.