UɃÑZ càr Dăk Lăk pa bơyai lơh Pơrjum sền wơl broă lơh jăt ală broă lơh jơnau kờñ dà lơgar dê tơngai bơh nam 2021 tus 2023, broă lơh, kơnòl tờm tơngai bơh nam 2023 tus 2025 mờ gùng dà broă lơh jăt tàm tơngai bơh nam 2026 tus 2030. Lơh jăt 3 broă lơh jơnau kờñ dà lơgar dê (ƀòn lơgar pa, tơmù rơƀah kơl jăp mờ tơnguh bơtàu lơh sa mpồl bơtiàn tiah làng bol kòn cau mờ tiah kơh bơnơm), càr Dăk Lăk neh geh jào mờr 2 rơbô 320 tơmàn đong. Tàm hơ̆, broă tơnguh bơtàu lơh sa mpồl bơtiàn tiah làng bol kòn cau mờ tiah kơh bơnơm geh bơnah uă, mờ khà priă rơlao 1 rơbô tơmàn đong; Broă tơmù rơƀah kơl jăp neh jào rơlao 382 tơmàn đong; Broă bơ̆t bơtàu ƀòn lơgar pa neh jào rơlao 927 tơmàn đong. Bơdìh mờ priă bơh kes priă dà lơgar, càr Dăk Lăk neh hòi jà, lam sồr tă geh di pơgăp 1 rơbô 542 tơmàn đong tàm 3 nam bơh nam 2021 tus 2023 nàng lơh broă lơh jăt jơnau kờñ dà lơgar dê bơ̆t bơtàu ƀòn lơgar pa.

Ồng Phạm Ngọc Nghị, Củ tịc UɃÑZ càr, Kwang atbồ mpồl Đơng lam ală Broă lơh jơnau kờñ dà lơgar càr Dăk Lăk đơs tờm, tàm tơngai tus, càr geh lơh ngan bơsong ală bơta kal ke, gơkòl, nàng ală broă lơh geh tơnguh cồng nha uă ngan. Tàm hơ̆, broă ù lơh hìu ơm, ù lơh sa tàm tiah làng bol kòn cau geh ai lài bơsong, gàr niam ai làng bol kòn cau in kơl jăp rài kis: “Tŭ do, jăt jơnau yal den geh di pơgăp 23% làng bol kòn cau gam rơƀah tàm khà kờp jơh làng bol kòn cau dê, mơya 65% làng bol kòn cau tàm khà rơƀah càr dê, do là khà kờp gam uă ngan. Rơƀah den gam uă tơngu me mờ lài jơh là làng bol kung gam đơs là ờ tơl ù lơh sa, ù lơh hìu ơm, ờ tơl ală bơta nàng làng bol geh lơh broă nàng geh rài kis lơh broă sa. He gam tơrgùm ai broă lơh gah kòn cau mờ tiah kơh bơnơm den do là broă ai lài bơh Tỉñ ủy, Ủy ƀan dê kung gam là ù lơh sa, ù lơh hìu ơm ai làng bol in. He lơh geh uă broă ndai mờ làng bol kung gam ờ tơl ù lơh sa, ờ tơl ù lơh hìu ơm, ờ tơl ală phan lơh broă nàng lơh sa, nàng geh kis den ờ geh kwơ màng lơi jơh”.

Pa do, tàm ƀòn dờng Pleiku kung geh bơyai lơh pơrjum sền wơl cồng nha lơh jăt Kơrnoăt sồr bơh Ƀan Thường vụ Tỉñ ủy càr Gia Lai bè tơnguh broă đơng lam bơh ală kấp ủy bè bơ̆t bơtàu ƀòn lơgar pa tàm làng bol kòn cau. Jăt jơnau yal, 5 nam do, ală kơnhoàl, thị xã, ƀòn dờng tàm càr neh hòi jà tă geh rơlao 1 rơbô 500 tơmàn đong nàng lơh jăt broă bơ̆t bơtàu ƀòn lơgar pa tàm tiah làng bol kòn cau. Tàm hơ̆, kes priă dà lơgar tă geh mờr 1 rơbô 300 tơmàn đong, priă mpồl lơh sa kă bro dong kờl geh mờr 24 tơmàn đong, priă làng bol tă geh rơlao 153 tơmàn đong, priă càn geh 43 tơmàn 500 tơlăk đong. Tơnơ̆ mờ 5 nam, tŭ do gùt càr neh geh 110 thôn, ƀòn làng bol kòn cau geh khà ƀòn lơgar pa, rài kis làng bol ngai sơlơ geh gơguh.

Mơya, broă lơh jăt 3 broă lơh jăt jơnau kờñ dà lơgar tàm ală càr Tây Nguyên kung gam uă kal ke; geh ờ uă rơndăp broă lơh, tơngu me bơnah broă lơh ờ hềt lơh jăt mờ broă tă, tài ờ hềt geh jơnau bơto sồr tơl bơh Dà lơgar dê. Broă sền wơl, ai gŏ loh làng jơnau kờñ kờp khà tam pà, ai geh khà măt rơndăp broă bơcri priă gam uă bơta kwi kwơ ờ git. Ồng Trương Thế Vinh, kwang bàng lơh broă gah kòn cau tàm kơnhoàl Ia Grai, càr Gia Lai đơs là, kwang bàng lơh broă tàm ală tiah gam mùl màl gơtìp kal ke tŭ lơh jăt broă lơh do. “Geh uă sră nggal bơh càr ờ hềt di tŭ pơn drờm mờ tŭ lơh jăt broă lơh, tàm hơ̆ uă ngan tàm ală xã ờ hềt geh jơnau bơto sồr loh làng. Kwơ màng Rơndăp broă lơh sồ 1 dong kờl lơh hìu ơm, ù lơh hìu ơm, ù lơh sa jăt kơrnoăt sồ 04 bơh Thủ tướng Cíñ phủ den dong kờl ù lơh hìu ơm mờ khà 44 tơlăk đong tàm 1 hìu mờ ù lơh sa 22 tơlăk đong tàm 1 hìu den kal ke nàng lơh jăt. Ù lơh sa ai làng bol in den khà priă kas ngan, mờ khà priă dong kờl bè do mờ priă ai càn bè do den làng bol ờ gơtùi blơi geh bă ù nàng lơh sa, lơh hìu”.

Tàm càr Kon Tum, pa do geh rơlao 1 rơbô nă đoàn viên ơruh pơnu tàm càr Kon Tum neh tus bal Broă lơh tìp bal, cri bơyai mờ Củ tịc UɃÑZ càr mờ tơngu me “Tơnguh gơnoar bơh ơruh pơnu tàm broă lơh jăt ală Broă lơh jăt jơnau kờñ dà lơgar dê tàm ù tiah càr Kon Tum”. Củ tịc UɃÑZ càr Kon Tum ồng Lê Ngọc Tuấn đơs tờm, do là ală tơngu me kwơ màng tàm gùng dà broă lơh ai ơruh pơnu in tàm broă tus bal ală broă lơh tờm, nàng pơgồp bal lơh geh cồng nha kơnòl lơh sa mpồl bơtiàn nam 2023 càr dê. Nàng ơruh pơnu càr Kon Tum tă pơgồp uă rơlao tai tàm broă lơh jăt ală Broă jăt jơnau kờñ dà lơgar dê, Củ tịc UɃÑZ càr Kon Tum ồng Lê Ngọc Tuấn pơlam: “Ƀan Thường vụ Tỉñ đoàn, ală Huyện đoàn, Thàñ đoàn lơh jăt niam ală broă lơh, lơh broă kăc màng gàr niam nùs nhơm ơnàng làm gùt tiah, nùs nhơm gùng dà broă lơh, lơh geh cồng nha, lơh geh bơta kơl jăp, lơh geh bơta bơceh lơh. Tàm hơ̆, tơrgùm tàm broă bè yal mblàng bè bơ̆t bơtàu ƀòn lơgar pa, tơmù hìu ơruh pơnu rơƀah, tus bal lơh niam kơl jăp wơl gùng lòt bè rơƀàng mờ gùng lòt tàm ƀòn. Lơh ală broă lơh pơgồp bal lơh broă bal nàng tơnguh bơtàu lơh sa ơruh pơnu in”.