Sơnah ƀòn Tiến Thành, càr Lâm Đồng pơgồp bal mờ ală cau, ală mpồl dong kờl mờ cau geh nùs nhơm niam bơyai lơh broă lơh “Mang chờ àng kơnhai ndar me” ai ală oh dềt geh rài kis kal ke tàm sơnah ƀòn in. Tàm broă lơh, ală oh dềt neh geh sền tamya đăng grài mut lơh chờ, sền ală jơnau đơs crih tamya bơh ală kơnòm bơsram dê lơh mờ iat jơnau yal yau bè wa Cuội – bi Hằng Nga.

Di dơ̆ do, ala mat đơng lam sơnah ƀòn Tiến Thành mờ ală mpồl dong kờl neh pà rlau 1 rơbô 550 bơnah phan, kờp priă rlau 125 tơlak đong ai ală oh dềt geh rài kis kal ke chờ hờp sa tềp Trung thu. Tàm hìu bơsram kâp 1 Phan Thanh 2 (anih sồ 2) sàh Hồng Thái, càr Lâm Đồng, ala mat Mũi Né Bay Resort kung neh jàu 100 bơnah phan sa tềp Trung thu mờ 20 sră kham sơm kòp ờ sa priă ai ală kơnòm bơsram jơi bơtiàn dồ êt nă cau geh rài kis kal ke in. Ală bơnah phan pà do là bơta pơn jờng di tŭ, pơn jờng nùs nhơm bơsram sră bơh ală oh dê tàm nam bơsram pa.

Tỉñ đoàn càr, Sờh Lơh sơnơm càr Quảng Ngãi bal mờ bàr pe mpồl lơh broă pa pơgồp bal bơyai lơh broă lơh “Chờ hờp sa tềp Trung thu nam 2025" tàm Ƀlàng dờng ngai 16 nhai 3, sơnah ƀòn Kon Tum. Rlau 130 nă kơnòm dềt bơh sơnah ƀòn Kon Tum mờ Anih tờm lơh broă ơruh pơnu kơnòm pa tàu mờ kơnòm dềt Diên Hồng tus bal bơyai lơh, cèng tus uă dơ̆ bơyai lơh đơs crih tam ya duh hồl, cèng bềng nùs nhơm sa tềp Trung thu.

Ală jơnau đơs crih jờng rơ Wa Hồ, nùs nhơm hìu bơnhă bal mờ ală gùng tam ya xoang cèng bềng bơhiàn niam chài ƀòn lơgar lơh geh nùs nhơm chờ hờp, hô hơng. Bơhiàn tam ya đăng grài, rò đèng gŭ mờ is ồn là lơh lèo “Yal yau àng nhai ndar me” là bơta tờm, gơ hòi gơ jà bơta hô hơng, brơn brài bơh kơnòm dềt mờ làng bol tàm tiah anih tờm đah mat tơngai mut càr dê. Mờ tơngume “Đèng gŭ sòl àng bơta kơ̆p kờñ”, broă lơh neh hòi jà rlau 800 tơlak đong bơh ală anih lơh broă, mpồl lơh broă, mpồl lơh sa kă bro jàu 1 rơbô 800 bơnah phan pà Trung thu mờ 300 bơnah priă bơsram pà kơnòm dềt sơr lèt gan kal ke, bơsram jak tàm ù tiah càr dê.