Nam 1971, ồng Phạm Đức Thăng, ơm tàm quận Thanh Xuân, ƀòn dờng Hà Nội lòt ling, mut tàm tiah tam lơh tiah đah jum mat tơngai lik dà lơgar. Tơnơ̆ lơh jơh kơnòl broă, ồng rê wơl mờ geh bau. 3 nă kòn dơ̆ dùl dơ̆ geh deh, kòn tơnhua tŭ deh neh gơtìp kòp kơn jơ̆. Ờ git să tờm he bơtờp sơnơm khi Dioxin, ùr bơklau ồng deh tai kòn dơ̆ 2 mờ kung gơbàn kòp ờ ngac ngar bồ tơngoh mờ klwăt, tĭ. Ờ roh bơta gơn kơnờm gơtùi deh dùl nă kòn pràn kơldang, ùr bơklau ồng deh tai kòn dơ̆ 3. Bơtuah neh tus mờ ồng mò tŭ sau dơ̆ 3 tŭ do neh mut đại họk mờ kung gam pràn kơldang bè ờs mơya ồng Thăng kung gam kơlôi rơcang mờ rơngòt ngan: “Cau lơh mè, lơh bèp ờ geh cau lơi kờñ bè hơ̆, mơya kòn neh gơbàn bè do den he pal ròng, pal gròi sền khi. Bòl glar ngan, mơya neh 44 nam do ròng kòn, neh kwèng mờ bơta glar bòl. Ùr bơklau añ rơngòt ngan, ngan là rơnàng dơ̆ 3, dilah kòn añ là rơnàng dơ̆ 2 deh rơnàng dơ̆ 3 den ờ hềt git bè lơi, den tàng añ rơngòt ngan rlau jơh là rơnàng dơ̆ 3”.

Jat khà kờp bơh ală cau kơlôi sơnơng jak chài lơgar Mỹ dê yal tàm nam 2003: geh 4 tơlak 800 rbô nă cau Việt Nam gơtìp sơnơm khih Dioxin lơh aniai, rlau 3 tơlak nă cau là cau gơtìp aniai tơn. Jat khà kờp ờ hềt tơl, tŭ do, gùt lơgar geh rlau 150 rbô nă cau gơtìp sơnơm khih Dioxin lơh aniai là rơnàng dơ̆ 2; rlau 35 rbô nă cau gơtìp aniai là rơnàng dơ̆ 3; rlau 2 rbô nă cau rơnàng dơ̆ 4 gotìp gơ rềng tài bơh sơnơm khih Dioxin lơh aniai bơh rài dơ̆ 1. Uă hìu bơnhă cau gơtìp sơnơm khih Dioxin lơh aniai tàm lơgar he geh tus 4, 5 nă cau gơtìp aniai halà uă rlau; uă cau gơtìp aniai ờ gơtùi lơh broă, jòi broă lơh nàng kis, geh tŭ ờ gơtùi git ală broă lơh să tờm he dê tơn. Rài kis phan bơna, nùs nhơm bơh jơh ală cau gơtìp sơnơm khih Dioxin lơh aniai dê gam uă kal ke, siơ̆u siar. Nàng at tê bal tơrmù ƀà bơta jê sồt bơh ală cau gơtìp sơnơm khih Dioxin lơh aniai mờ hìu bơnhă cau gơtìp sơnơm khih Dioxin lơh aniai dê in, pah nam, Dà lơgar neh lời ai bơnah priă rlau 10 rbô tơmàn đông nàng dong kờl pah nhai, gròi sền, sền gàr pràn kơldang să jan, lơh pràn wơl să jan ai cau gơtìp aniai in, dong kờl ală tiah uă kal ke tài gơ rềng kơn jơ̆ kơn jut bơh sơnơm khih Dioxin lơh aniai; Ai tơlik uă gùng dà, broă dong kờl gơ wèt mờ cau geh màng mờ dà lơgar, tàm hơ̆ geh cau tus bal tam lơh mờ kòn tờm khi dê gơtìp sơnơm khih Dioxin lơh aniai bơh Mỹ ngui tàm rài tam lơh tàm lơgar Việt Nam.

Trung tướng, Phó Giáo sư- Tiến sỹ ồng Đặng Nam Điền, Phó Củ tịc Mpồl cau gơtìp sơnơm khih Dioxin lơh aniai Việt Nam pà git, tàm 20 nam do, Mpồl cau gơtìp sơnơm khih Dioxin lơh aniai Việt Nam neh hòi jà tă pơgồp geh rlau 3 rbô tơmàn đông gròi sền ai ală cau gơtìp sơnơm khih Dioxin lơh aniai mờ hìu bơnhă khi dê in. Bulah bè hơ̆, kung gam uă bơta kơlôi rơcang gơ wèt mờ cau gơtìp sơnơm khih Dioxin lơh aniai: “Geh dùl khà uă ngan kòn mờ sau cau gơtìp sơnơm khih Dioxin lơh aniai dê tŭ do gơtìp kòp jroă mơya ờ geh cau ròng, ờ geh anih kơldìng. Ală anih tờm kung gam pal gròi sền, ròng siam, dong kờl mơya bè jŏ jòng den pal geh broă dong kờl mùl màl nàng lơh bè lơi ring bal bơh dà lơgar tus kâp hơ đơm nàng gròi sền ai ală cau do in tŭ mờ mè bèp chơt den ờ geh cau ròng, ờ geh anih kơldìng”.

Bal mờ broă lơh tơrmù ƀà bơta jê sồt ai ală cau gơtìp sơnơm khih Dioxin lơh aniai in, Đảng mờ Dà lơgar rơhời bơsong jơnau gơ lời wơl bơh rềs àr do dê gơ wèt mờ ù tiah, tiah ơm kis. Jơh nùs jòi wơl bơta kuơ dipal ai ală cau gơtìp aniai in, hòi jà bơta lơh broă bal bơh dunia dê nàng bơsong wơl rềs àr sơnơm khih Dioxin lơh aniai. Bol he git là, bulah uă cau tàm khà khi sơrlèt gan bơta jê sồt, pơn jat tai tă pơgồp bơta pràn he dê ai bơta bơtàu tơnguh lơh sa- mpồl bơtiàn in, mơya kung gam uă cau tàm khà khi kờñ geh bơta sền gròi, dong kờl bơh Đảng, dà lơgar dê; bơta tam pà bal bè phan bơna, nùs nhơm bơh tơl nă cau dê tàm mpồl bơtiàn nàng bơnah lơi gơtùi tơrmù ƀà bơta jê sồt geh sơnđan sơnơm khih Dioxin.