Tơngai do, bal mờ broă pơgồp bal ală broă dong kờl bơh Dà lơgar, bơh càr nàng tơnguh bơtàu lơh sa mpồl bơtiàn, càr Yên Bái gam tơlik geh uă nghị quyết, broă lơh, kung bè yal mblàng, lam sồr dong kờl làng bol tơnguh uă jơnau git wă, tam gơl broă lơh, lơh jăt niam ală gùng dà, broă lơh adăt boh lam bơh Đảng mờ Dà lơgar, bơh tŭ hơ̆, rài kis làng bol kòn cau kis tàm tiah ngài neh geh uă tam gơl niam.

Giàng Pằng là thôn kal ke ngan, ngài mờ tiah tờm xã Sùng Đô, kơnhoàl Văn Chấn di pơgăp 30 kơi sồ. Geh ơm tàm chàr bơnơm ñhoa, ờ geh ồs đèng ngui, ờ geh điện thoại, gùng lòt gơtìp kal ngan, den tàng làng bol kis tàm do ờ hoan geh tus mờ jơnau tơngih bơh bơdìh, tàm hơ̆ uă ngan là ală jơnau tơngit gơrềng tus mờ broă dong kờl bal mờ adăt boh lam. Den tàng, kwang bàng xã pal sùm tus tàm thôn, tus tơl hìu làng bol nàng yal mblàng ală gùng dà broă lơh bơh Đảng, adăt boh lam bơh Dà lơgar dê, mờ jòi sền nàng git bè ală jơnau kờñ mùl màl bơh làng bol dê, nàng di tŭ geh jơnau dan, jơnau yal mờ gơnoar atbồ nàng geh ală broă dong kờl di pal, dong kờl làng bol tơnguh rài kis.

Tus lồi nam 2022 lài do, tàm tơngu me broă dong kờl bơh Broă lơh jăt jơnau kờñ tơnguh bơtàu lơh sa mpồl bơtiàn tiah làng bol kòn cau mờ tiah kơh bơnơm, làng bol kis tàm thôn Giàng Pằng neh geh dong kờl lơh sơntèk dà ngui sa, măi lơ-òr nàng drơng tàm broă lơh sa. Bi Giàng A Trư, kis tàm thôn Giàng Pằng, xã Sùng Đô chờ hờp yal: “Tŭ do sơntèk dà geh tơl nàng ai hìu nhă in ngui bloh, ờ gơtìp ờ tơl dà bè lài tai. Lài do ờ hềt geh sơntèk dà nàng đơ den mờng gơtìp ờ tơl dà tàm kàl prang do, dà ngui ai hìu nhă in mờng lòt bơ̆ dà bơh tàm croh”.

Ồng Giàng A Lứ, Phó Củ tịc UɃÑZ xã Sùng Đô, kơnhoàl Văn Chấn pà git tai: “Ală broă lơh jăt jơnau kờñ dà lơgar dê geh uă cồng nha ngan, bơdìh mờ sơntèk dà gam dong kờl bè măi lơ-òr tai, ai lài tàm ală hìu rơƀah ờ geh tơl priă in, tàm tơngai lơh broă geh ƀuơn rơlao”.

Yal mblàng, lam sồr làng bol kis tàm tiah kơh bơnơm ñhoa tơmù tàm bơta bao gờñ mờ bao rềp jơi nòi bal là dùl tàm ală tơngu me geh gơnoar atbồ ală tiah tàm tiah kơh bơnơm ñhoa càr Yên Bái geh sền gròi ngan. Mò Sùng Thị Xiá, Phó Củ tịc UɃÑZ xã Suối Bu, kơnhoàl Văn Chấn, càr Yên Bái pà git, do là kơnòl ờ tŭ lơi ƀuơn tài jơnau git wă bơh làng bol dê bè adăt boh lam gam ờ tơl: “Di lah mìng yal mblàng mờ pa nô, áp phíc yồng hờ bơdìh den kung kal ke ngan, den tàng tŭ rơcang gùng dà broă yal mblàng, bol añ pal geh ală cơng tàng loh làng nàng yal mblàng. Tŭ yal mblàng di lah geh ngui dà yoah den làng bol ờ wă den tàng geh yal mblàng mờ dà kòn cau”.

Lŏ Lầu Thị Mỷ, kis tàm thôn Bu Cao, xã Suối Bu pà git, oh ùr lŏ dê nam do mìng rơ̆p 14 sơnam. Rài kis hìu nhă gơtìp kal ke, bèp chơ̆t gờñ, mè gơtìp kòp tê jê să sùm, kung bè git nđờ ùr ơruh kòn cau Mông ndai dê, oh ùr kờñ bao gờñ. Git rài kis hìu nhă, ală cau yal jơnau, yal mblàng jơnau bơh xã Suối Bu neh tus nàng mblàng, pơlam: “Tơnơ̆ mờ tŭ iăt kwang bàng tus tàm hìu nàng yal mblàng bè bơta aniai bơh bao gờñ, geh tŭ là lơh glài mờ priă, hìu nhă añ kung neh sồr oh ùr tus lòt bơsram wơl, hơ bañ lời oh ùr bao lài mờ nam 18 sơnam”.

Lơh jăt broă lơh jăt jơnau kờñ dà lơgar tơnguh bơtàu lơh sa, mpồl bơtiàn tiah làng bol kòn cau mờ tiah kơh bơnơm tơngai bơh nam 2021 tus 2025, càr Yên Bái tŭ do geh 10 rơndăp broă lơh, 14 rơndăp broă lơh dềt mờ 36 tơngu me broă lơh gam geh lơh mờ kờp jơh priă mờr 1 rơbô 200 tơmàn đong. Bơdìh mờ broă bơcri priă lơh git nđờ rơhiang broă lơh bơ̆t bơtàu phan bơna, ală rơndăp broă lơh neh dong kờl măi lơ-òr, sơntìl phan tam, bơto broă lơh, ai broă lơh, pơgồp bal tàm broă lơh pràn broă tơnguh bơtàu lơh sa, tơmù rơƀah mhar, kơl jăp ai tiah làng bol kòn cau in. Lŏ Mùa Thị Máy, kis tàm ƀòn Háng Sung, xã Mồ Dề, kơnhoàl Mù Cang Chải pà git: ală rơndăp broă lơh gam geh lơh ờ mìng cèng geh ală tam gơl tàm broă lơh, tơnguh bơtàu lơh sa hìu nhă mờ gam lơh tam gơl bồ tơngoh kơlôi sơnơng, jơnau git wă bơh làng bol kis tàm tiah kơh bơnơm ñhoa dê: Làng bol, tàm hơ̆ uă ngan là ală oh mi cau ùr tàm ƀòn ròng phan nàng ai geh priă hìu nhă in, pơgồp bal tàm broă tơn jơh jơgloh tơmù rơƀah”.

Ồng Đỗ Quang Vinh, Phó Kwang atbồ Ƀan Zân tộk càr Yên Bái pà git: Tơngai do, Ƀan do kung neh pơgồp bal mờ ală kơnhoàl, thị xã tàm càr nàng bơyai lơh pờ ală ơdŭ bơto “Tơnguh uă bơta pràn mpồl bơtiàn mờ kwang bàng lơh jăt broă lơh tàm ală kấp gơwèt Broă lơh jăt jơnau kờñ dà lơgar tơnguh bơtàu lơh sa mpồl bơtiàn tiah làng bol kòn cau mờ tiah kơh bơnơm” ai ală Ƀí thư Ci ƀộ, ală kwang atbồ thôn ƀòn, ală mpồl lơh broă bal mờ mpồl bơtiàn ƀòn lơgar, nàng kwang bàng tàm ală tiah mờ làng bol in wă, lơh jăt, dờp di broă dong kờl: “Ƀan geh pơgồp bal mờ ală gah lơh broă nàng hòi jà geh ală bơta pràn, pơgồp bal ală broă lơh jăt jơnau kờñ dà lơgar dê nàng lơh bè lơi pleh mờ broă tàm bơrlŭ bal tàm broă lơh jăt. Gơwèt mờ ală tiah, tàm hơ̆ uă ngan là ală tiah geh dờp ală broă dong kờl den tŭ lơh jăt geh pal mùl màl loh làng, ndrờm bal, di cau, di tiah nàng broă lơh do tus mờ làng bol”.

Ai geh broă lơh tus tàm rài kis, tơnguh uă jơnau git wă bơh làng bol dê, ai geh nùs nhơm ring bal uă tàm mpồl bơtiàn, tàm hơ̆ uă ngan là tàm ală mpồl ƀòn tiah làng bol kòn cau, càr Yên Bái gam lơh ngan lơh gơs jơnau kờñ tơnguh bơtàu kơl jăp “tơlir, di pal, geh bơta niam chài mờ gơboh gơbài”.