Mhar tê prăp tơl pơ àr cả ram pa pồt tàm tùh mrềt lŭ, bi Ngô Thị Thu, ơm tàm sơnah ƀòn Quy Nhơn pà gĭt, tùh mrềt do là phan pà mờ Pôs đồng ling sền gàr tiah nhàr lơgar Mpồng nhàr lơgar anih ơhò ơm Quy Nhơn dong kờl bi pơgap mờ do 1 nam. Pah mang bi gơtùi gơ jal lơh tai, prap cả ram tàm gah lơh lŭ nàng ngai tơnơ̆ cèng lòt tăc. Bi Thu pà gĭt, hìu bơnhă bi dê kal ke ngan, bơklau gơtìp rềs àr gùng lòt, bĭc lơng jơh să jan tàm jơnơng sùm rlau 20 nam do. Geh priă lơh geh bơh broă tăc cả ram, neh dong bi rcang ngui tàm rài kis, blơi sơnơm tơm ba ai bơklau mờ ròng 2 nă kòn in bơsram:“Lài do lòt lơh pồt cả ram ơpah, añ geh đơs mờ ală bi tàm mpồl cau ùr. Ală bi cau ling sền gàr tiah nhàr lơgar gĭt den pà añ in dùl nơm tùh mrềt, añ pồt tai nàng ơn tàm tùh mrềt nàng lòt tăc tai. Añ kung gŏ geh priă jền đau sơl, nàng ròng 2 nă kòn mờ bơklau. Añ prap gàr, gàr niam sàng goh phan ngui sa. Ală bi cau ling sền gàr tiah nhàr lơgar kung hòi điện thọai lùp còp. Añ lơh ngan nàng brồ guh”.

Lơh jat broă lơh “pah poh dong dùl hìu bơnhă rƀah”, bơh nam 2023 tus tŭ do, Mpồl ling sền gàr tiah nhàr lơgar càr Gia Lai neh dong kờl 750 hìu bơnhă rƀah, hìu bơnhă pa lik klàs rƀah mờ hìu bơnhă cíñ sác; hòi jà tă pơgồp rlau 810 tơlak đong, 1 tấn 7 tạ phe, 47 phan ngui drơng broă lơh sa bal mờ mờr 3 rơbô ngai lơh broă dong làng bol lơh niam wơl mờ lơh kơnhăp hìu đam. Nam 2024, broă lơh geh Mpồl Hòi jà, bơto bơtê Dà lơgar jờng rơ là dùl tàm 7 broă lơh “Hòi jà làng bol chài” pơn rơ ngan gùt lơgar dê.

Trung tá ồng Nguyễn Tùng Giang, Cíñ trị viên Pôs đồng ling sền gàr tiah nhàr lơgar Mpồng tiah nhàr lơgar anih ơhò ơm Quy Nhơn, pà gĭt: tàm tŭ lam lơh  broă lơh, mpồl ling sùm pơgồp bal niam mờ gơnoar atbồ ală tiah dê mờ ală mpồl cau bal nàng lòt sền nền nòn, rơ wah broă lơh dong kờl di pal mờ tơl rài kis dê. Ală hìu bơnhă gam geh pràn kơl dang lơh broă geh pà phan bơna măi mok halà broă lơh sa nàng bơtàu tơnguh lơh sa, brồ guh lik klàs rƀah. Gơwèt mờ ală hìu bơnhă cíñ sác, cau kra dồ nă să, kwang bàng, cau ling dong kờl lơh niam wơl tơn hìu đam, lơh niam wơl phan ngui tàm hìu bơnhă. Broă lơh do ờ mìng cèng wơl cồng nha ngan ngồn lơm mờ gam dong mpồl ling rềp làng bol rlau tai, đềt mềr rlau tai mờ tiah do. Trung tá ồng Nguyễn Tùng Giang, pà gĭt:“Nùs nhơm bơh pôs đồng dê là pal ngan ngồn, jat tàm ală bơta gĭt bơh tàm ƀòn lơgar bơh jơnau yal bơh mpồl lơh broă, cau ùr, mpồl cau lơh broă sa dê... nàng jòi geh broă lơh di pal nàng dong kờl. Oh mi tus tơl nơm hìu lùp nền nòn là hìu bơnhă hơ̆ kờñ geh ală bơta lơi, dilah sơr lèt gan uă ir mờ bơta bơh mpồl ling dê den pơgồp bal mờ ală gah broă jòi gùng dong kờl. Tŭ do ală broă lơh drơng rài kis neh lam lơh ndrờm geh cồng nha lơm".

Ai tàm tiah kơh bơnơm tiah đah mat tơngai mut càr Gia Lai, lồi nhai 10 nam 2025, Mpồl Lơh sa- Sền gàr Dà lơgar 75 (Ling mpồl 15) neh jàu pà 51 nơm kơnrồ dra ai ală hìu bơnhă rƀah mờ hìu bơnhă pa lik klàs rƀah gơwèt 10 thôn, ƀòn bơh 2 sàh Ia Krêl mờ Đức Cơ, mờ kờp jơh priă tă lơh rlau 1 tơmàn đong. Dùl tŭ bal, Ling mpồl gam tàm jàu broă lơh “Sơrmañ àng ƀòn lơgar”- ală gùng sòl àng mờ năng lượng mat tơngai jòng 5,2 kơi sồ, crăp tàm 2 ƀòn Nẻh mờ Al Gôn, kờp priă rlau 427 tơlak đong. Broă lơh dong sòl àng jơh gùt gơl gùng lòt gan tiah làng bol ơm kis, hìu bơsram, hìu pơrjum mpồl bơtiàn mờ hìu pơrjum. Ồng Phùng Văn Cường, Phó Củ tịc Anih duh broă Làng bol sàh Ia Krêl, pà gĭt:“Do là broă lơh geh kwơ uă ngan, nùs nhơm niam dong kờl bal gơwèt mờ làng bol ală ƀòn tàm sàh Ia Krêl, lơh geh ai làng bol in lòt rê ƀuơn ngan, tơrmù rềs àr gùng lòt rê mờ geh broă lơh tơrmù rƀah kơnhăp jŏ. Bulah Ling mpồl 15 gam uă kal ke mơya kung gam tềm pềr nàng dong kấp ủy tiah do in lơh tus geh broă lơh bơt bơtàu ƀòn lơgar pa”.

Đại tá ồng Khuất Bá Cao, Ƀí thư Đảng ủy, Phó Tư lệnh Ling mpồl 15, pà gĭt: mờ gùng dà broă lơh “dong kờl broă lơh sa, sòl àng bơta pin dờn” mìng is nam 2024, Ling mpồl neh lơh sir 23 broă lơh bơt bơtàu mờ mờr 45 kơi sồ gùng ồs đèng, 1 rơbô 500 jrong ƀong đèng, kờp jơh priă tă lơh 4 tơmàn đong; nam 2025 kờp dŭ lam lơh tai 13 broă lơh bơt bơtàu, kờp priă rlau 3 tơmàn đong. Bal mờ hơ̆, mpồl ling neh dong kờl tơn jơh rlau 350 nơm hìu lơh ing, bơt lơh hìu “Tam klăc dờng”, “hìu bơta nđàc” bơyai lơh kham sơm kòp ntrờn làm bă tiah, lơh gùng lòt, lơh hìu rông drơng mpồl bơtiàn. Đại tá ồng Khuất Bá Cao, đơs loh:“Tàm tơngai tus, Đảng ủy Ƀộ Tư lệñ Ling mpồl 15 rơ̆p sồr ală mpồl ling gơwèt mpồl sơlơ tơnguh tai pơgồp bal mờ kấp ủy, gơnoar atbồ ală tiah, lam lơh uă broă lơh geh kwơ rlau tai, lơh tus geh ală broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm, tàm sơm bat tê bal bơt bơtàu ală ƀòn lơgar àng, tơlir, sàng goh niam, niam jak, hời rơ hời bơtàu tơnguh rài kis phan bơna”.

Ală broă lơh “Hòi jà làng bol chài” bơh mpồl ling klàng tàm Gia Lai dê ờ mìng niam bè broă lơh, kwơ tàm nùs nhơm lơm mờ gam ngui niam bơta kwơ lơh broă sa, dong làng bol tơrmù ƀà kal ke, nàng brồ guh tàm rài kis. Ală broă lơh barah barài bềng bơta kwơ hơ̆ neh dong lơh kơ̆ rlau tai bơta tam klăc bal ling klàng làng bol, bơt bơtàu bơta pin dờn mờ lơh geh bơta pràn tam klăc tàm tiah do dê.