Bơh dùl thôn mờ 100% hìu bơnhă rƀah, tŭ do gơ gơs “anih àng” mờ mờr 80% hìu bơnhă bơh tơl ngui tơl sa rlau hơđang. Bơta tam gơl tàm thôn tiah nhàr lơgar Nậm Sò, xã Bản Phiệt, kơnhoàl Bảo Thắng, càr Lào Cai dê geh bơta tă pơgồp dà kơlhề uă ngan bơh ùr Đảng viên kòn cau Dao là mò Đặng Thị Dẩn dê, mò là dùl nă cau lam lài rồ ù, pờ gùng lik klàs rƀah ai kơnhoàl ù tiah do in. Mò Dẩn sùm đơs: Bơsram mờ lơh jăt Wa Hồ gơ jăt bal mờ kơnòl broă bơtàu tơnguh lơh sa tàm ƀòn lơgar, dong làng bol tơn jơh jơgloh là broă lơh ngan ngồn ngan rlau jơh.

Di tòm 20 nam lài, mò Đặng Thị Dẩn là dùl tàm ală hìu bơnhă bơh sơnrờp lam lài lòt tus kơnhoàl ù tiah Nậm Sò jăt jơnau hòi jà ntrờn làng bol tus tiah nhàr lơgar. Ngai hơ̆, tiah do kung gam sơl là dùl bă ù lời gời ngềt ngơ̆t ngan cau, gùng lòt kal ke ngan, ờ geh ù tam phan. Bơhiàn bơh yau bơngơl gơla tam phan ờ jak chài lơh bơta jơgloh, bơta rƀah gơ ơm sùm tàm tơl hìu bơnhă kòn cau Mông, kòn cau Dao dê. Ờ gŏ ngòt bòl glar kal ke, mờ gơnoar broă là Kwang ătbồ thôn, mò Đặng Thị Dẩn jơh nùs lơh ngan lơh jăt dơ̆ tam gơl bơta yau gơ gơs bơta pa nàng kờñ tam gơl bồ tơngoh kơlôi sơnơng bơh tơl nă làng bol dê. Mò Dẩn kah wơl: Bơh chờm làng bol tàm do cau lơi kung kờñ deh rơ̆ kòn lơm, làng bol đơs là hìu geh uă kòn den hơ̆ sồng niam, mơya tŭ geh mblàng yal mờ gŏ ù tiah ờ huan geh uă den tàng tŭ geh dà lơgar neh pà ù, neh tơl ngui tơl sa đau den làng bol hơ̆ sồng kung mìng deh bơh 1 tus 2 nă kòn lơm. Bè ñô bau den làng bol ờ gŏ sồr kơ̆t bau uă ir tai, tơn bau oh tơhòp kòn in pal tơl 18 sơnam hơ̆ sồng tơn bau mờ lơh jăt niam adat boh lam bơh dà lơgar dê tai.

Tŭ làng bol rơhời sang tĕ adat bơhiàn bơh yau bơngơl gơla ờ gam kwơ tai, sơnđờm “iang nùs ơm kis lơh sa”, mò Dẩn neh lòt tus làm bă tiah cèng ală broă lơh niam, chi tam geh priă jền uă rê tus mờ Nậm Sò. Ùr Đảng viên do neh hòi jà làng bol ai tờm prìt sơkò, tờm chi quế, prìt nàng tam, tơnơ̆ hơ̆ rề ơnàng ròng siam uă phan ròng, ròng tam phan tàm dà. Yal bè cồng nha tơnơ̆ 10 nam kơ̆ nùs ơm kis đềt mềr sùm tàm tiah nhàr lơgar bơtàu tơnguh lơh sa bal mờ bơta dong kờl jơh nùs jơh tồr bơh ùr Kwang ătbồ thôn mò Đặng Thị Dẩn dê, mò Tẩn Thị Tách là làng bol tàm thôn Nậm Sò, xã Bản Phiệt, kơnhoàl Bảo Thắng, càr Lào Cai, đơs: Kal ke den bi Dẩn bơto ai he in lơh sa. Sồr tam chi, tam quế, tam prìt sơkò tăc geh dùl êt priă jền, rơhời hìu bơnhă tơl ngui tơl sa đau dùl êt. Lài do, pa rê tus ndo ơm kis den bòl glar kal ke ngan ờ gŏ geh bơta lơi ờ.      

Tơnơ̆ 20 nam rồ ù, Nậm Sò tŭ do neh tam gơl muh mat pah ngai. Ală hìu bàr pe cờñ ndơ̆p mpồn bơh ngkời ală ntê chi brê hòn dờng niam ngan; ală gùng lòt geh lơh mờ ƀê tô sàng goh, dùl rài kis pa gam mpờl gŏ ngan ngồn tàm thôn tiah nhàr lơgar do geh bơta tă pơgồp ờ dùl êt bơh ală đảng viên lam lài bè mò Dẩn dê.

64 sơnam, mŭt Đảng neh 23 nam do bloh, ală tă pơgồp dà kơlhề bơh ùr Đảng viên kòn cau Dao do dê mò Đặng Thị Dẩn neh bơtơl tai bơta pràn, bơta pin dờn ai làng bol ƀòn lơgar tàm thôn tiah nhàr lơgar in. Dòn mờ iăt jăt Đảng, Wa Hồ, tơl nă làng bol thôn Nậm Sò neh mờ gam lơh ngan bơ̆t bơtàu tiah nhàr lơgar ring lơngai, kơ̆ kơl jăp mờ bơtàu tơnguh. Đảng viên mò Đặng Thị Dẩn, đơs: Bơta lơi he lam lài, he đơs là lơh. Ờ gơtùi lơh geh den bañ đơs. Đơs di den hơ̆ sồng iăt. Làng bol lơh jăt niam là bơta gơn kơnờm ai he in lơh broă ờ gŏ gĭt bòl glar kal ke. Ntàu bơh hơđang ne sền tus hơđơm den hơ̆ sồng gơlơh bè drà dềt tàm tiah thòng jrô do. Làng bol tam klăc bal, añ pơnđơl pràn lơh ngan.

Bơta lơh ngan brồ guh gơ gơs là “anih àng” tàm bơtàu tơnguh lơh sa bơh Nậm Sò dê ngai do là cồng nha bơh ală lơh ngan ờ gŏ ơm rlô, ờ gŏ gĭt bòl glar kal ke, jơh ală tài làng bol bơh ùr đảng viên kòn cau Dao là mò Đặng Thị Dẩn dê.