Tơnơ̆ uă dơ̆ tam gơl, tus tŭ do, bơta pal sền ngăc ngan tàm jơnau rơcăng cih Adat Ù tiah (tam gơl) neh cih loh làng bè broă dong kờl ù tiah ai làng bol jơi bơtiàn dùl êt nă cau in. Jăt mờ hơ̆, cih loh broă dong kờl jàu ù, ai apah ù ơm, ù lơh sa ai làng bol jơi bơtiàn dùl êt nă cau là hìu bơnhă rƀah tàm ƀòn lơgar geh broă lơh sa- mpồl bơtiàn kal ke, kal ke ir nàng kơnhăp rài kis.

Gơ wèt mờ broă dong kờl jàu ù ơm, ù lơh sa, jơnau rơcăng cih Adat Ù tiah (tam gơl) cih loh jàu ù, ai apah ù dơ̆ sơnrờp mờ pơn jăt tai jàu ù, ai apah ù ai làng bol jơi bơtiàn dùl êt nă cau in ờ gam ù halà ờ tơl ù lơh broă sa sươn sre pơndrờm mờ khà ai tơnơ̆ tŭ neh geh jàu ù, ai apah ù. Jơnau rơcăng cih Adat kung tam gơl jơnau cih bè jơnau lơh jăt gơnoar ngui ù geh jơnau sồr. Jăt mờ hơ̆, làng bol jơi bơtiàn dùl êt nă cau geh pà ai cau gơ wèt cau pơdờn in mờ lời pơdờn in; geh lời wơl ai cau tàm hìu bơnhă pơn jăt tai ngui ù lơh sa geh jàu, ai apah. Mơkung bơtơl jơnau cih bè ai wơl ù nàng lơh rơndăp broă lơh ai ù ơm, ù lơh sa ai làng bol jơi bơtiàn dùl êt nă cau in.