5 nam do, srơh tàm pơrlòng kờñ gơboh dà lơgar tàm càr Gia Lai neh lơh geh uă cồng nha niam: gơguh lơh sa kờp bal geh mờr 7% dùl nam; sền gàr dà lơgar – lơngăp lơngai geh gàr kơ̆, anih bơcri priă, kă bro pơn jat tai geh tam gơl niam. Tàm pơrjum dờng, ală cau pơn rơ jak neh tam pà bal mờng chài, broă lơh bơceh lơh, tàm hơ̆ pơn rơ ngan bè: Mpồl ling sền gàr tiah nhàr lơgar mờ broă lơh “Dong oh tus hìu bơsram, dong kờl hìu bơnhă rƀah tàm tiah nhàr lơgar”; jơnau bơceh lơh ngui bơta chài măi mok pa tàm kham sơm kòp tàm Hìu sơnơm mat Gia Lai; jơnau yal bơh bi H’Uyên Niê dê tàm sàh Ia Ly mờ broă lơh lòt nhơl mpồl bơtiàn pơgồp bal mờ sền gàr broă tàñ ồi kòn cau, ai geh broă lơh làng bol jơi bơtiàn dồ êt nă cau in…

Tàm tơngai bơh nam 2025 tus nam 2030, srơh tàm pơrlòng kờñ gơboh dà lơgar bơh càr Gia Lai dê rơp tơrgùm tàm 4 mpồl kơnòl broă tờm. Hơ̆ là: Pơn jat tai bơt bơtàu Đảng mờ anih lơh broă cíñ trị dipal, lơh broă geh cồng nha; lơh pràn bơtàu tơnguh lơh sa tơlir, broă lơh sa suơn sre ngui măi mok pa, lơh mờ măi mok lơh gơlik phan mờ năng lượng lơh geh wơl; bơtàu tơnguh niam chài – mpồl bơtiàn, tơnguh niam rài kis làng bol; mờ kung gàr kơ̆ lơngăp lơngai dà lơgar mờ rề ơnàng lơh broă bal lơh broă mờ lơgar ndai, is ồn mờ ală càr đah jum lơgar Lào mờ tiah đah tô mat tơngai lik lơgar Campuchia.