Lŏ Cil Sa La Môn, kòn cau K’ Ho, tàm sàh Dam Rông 4, càr Lâm Đồng pơnyờ să geh mŭt tàm mpồl Đảng tŭ gam là cau bơsram dờng nam lồi dŭt tàm Hìu bơsram Đại họk Dà Làc dê. Nam 2015, tơnơ̆ mờ tŭ neh jơh bơsram, lŏ rê lơh broă tàm sàh Dà Long lài do, tŭ do gơwèt sàh Dam Rông 4. Tàm 10 nam tus bal broă đoàn mờ Mpồl cau ùr sàh, lŏ Cil Sa La Môn neh geh uă broă bơceh lơh, pơgồp bal tàm broă bơtàu tơnguh lơh sa mpồl bơtiàn đơs bal, bơta gơguh jăk oh mi cau ùr đơs is. Mpồl cau ùr sàh neh lơh geh uă broă lơh bè “Mpồl pơgồp bal cau ùr tam tờm jơu ròng tu”, hòi jà rơlao 25 nă cau tàm mpồl cau ùr tus bal. Tơl dơ̆ ròng geh di pơgăp bơh 6 tus 8 tơlăk đong. Mpồl neh dong kờl 7 hìu tàm mpồl lik klàs rơƀah kơnờm bơh broă tam tờm jơu ròng tu. Lŏ Cil Sa La Môn pà git: “Să tờm añ kờñ lơh geh uă jơnau git wă bơh să tờm añ dê tus mờ ală bơyô, làng bol jơi bơtiàn ờ gal cau añ dê. Bơh broă lơh bơh să tờm nàng làng bol, tàm hơ̆ uă ngan là làng bol jơi bơtiàn ờ gal cau in wă loh rơlao bè gùng dà broă lơh niam bơnĕ bơh Đảng mờ Dà lơgar dê là kơ̆p kờñ tơnguh uă rài kis lơh sa mpồl bơtiàn ai tiah làng bol jơi bơtiàn ờ gal cau in”.

Gam gơwèt mờ lŏ Cil Pam K’ Quyên, kòn cau K’ Ho, deh nam 1989, tàm sàh Lạc Dương, càr Lâm Đồng, tơnơ̆ mờ tŭ jơh bơsram tàm Hìu bơsram Đại họk Yersin Dà Làc, nam 2013, lŏ rê tàm ƀòn mờ tus bal lơh broă tàm ƀòn. Bơh tŭ hơ̆ tus tŭ do, lŏ neh sơrlèt mờ uă gơnoar broă bè lơh Kwang atbồ thôn Dà Blah, sàh Dà Nhim (lài do), hơ̆ sồng Ƀí thư Đoàn sàh, Củ tịc Mpồl Làng bol lơh broă sa sàh, Củ tịc Anih duh broă Mặt trận Dà lơgar Viêt Nam sàh Dà Nhim mờ kung là Bí thư Ci ƀộ thôn Dà Blah. Tàm tơngai lơh broă, lŏ Cil Pam K’ Quyên neh tus bal mblàng yal, bơto pơlam ală gùng dà broă lơh bơh Đảng, adăt boh lam bơh Dà lơgar dê tus mờ ală làng bol. Lŏ neh rơcang pơgồp bal mờ kra ƀòn, cau geh bơngă pin dờn, cau kơ đơng yàng pơlam làng bol tă geh rơlao 3 rơbô 370 ngai lơh broă, ai mờr 5 sào ù nàng lơh gùng lòt tàm ƀòn. Mặt trận Dà lơgar Việt Nam sàh kung neh lam lơh 10 nơm hìu Tam klăc dong kờl ală hìu nhă gơtìp kal ke in. Bơh cồng nha tàm broă hòi jà, ai tơngŏ gơnoar bơh cau ùr dê tàm hìu nhă mờ mpồl bơtiàn, lŏ Cil Pam K’ Quyên pà git: “Gơwèt mờ làng bol jơi bơtiàn ờ gal cau jăt bơhiàn cau klao rê bao mờ cau ùr bè bol añ, den să tờm añ kung bè ală oh mi cau ùr tàm thôn, tàm sàh kơ̆p kờñ geh pơgồp bal bơta pràn dềt rơhền bơh să tờm dê ai mpồl bơtiàn in. Mờ mùl màl ngan hơ̆ là lơh niam gơnoar cau ùr tàm hìu nhă, tơnơ̆ mờ hơ̆ lơh niam broă mpồl bơtiàn… Tài mìng geh bè hơ̆ den he hơ̆ sồng lơh geh uă jơnau brồ guh sơrlèt mờ kal ke nàng lơh pas ai làng bol tàm ƀòn in, tàm hơ̆ uă ngan là cau ùr tus bal bơtàu tơnguh lơh sa hìu nhă, bơh tŭ hơ̆ pơgồp bal tàm broă bơtàu tơnguh lơh sa bal ƀòn lơgar dê”.

Càr Lâm Đồng tŭ do geh rơlao 500 rơbô nă cau tàm mpồl cau ùr. 5 nam do, ală kấp mpồl cau ùr neh đong kờl bal 5 rơbô hìu cau ùr lik klàs rơƀah, dong kờl lơh pa 17 mpồl lơh broă bal geh cau ùr atbồ. Rơlao 1 rơbô 200 broă lơh, bơnah broă bơh cau ùr dê geh lơh; lơh geh cồng nha Rơndăp broă 8 mờ git nđờ rơhiang broă lơh, lơh pràn bơta ndrờm bal cau klao mờ cau ùr mờ tơnguh uă bơngă cau ùr tiah làng bol jơi bơtiàn ờ gal cau. Mò Cil Bri, Phó Kwang lam bồ Sờh Jơi bơtiàn mờ Jăt yàng càr Lâm Đồng pà git, khà cau ùr tus bal kấp ủy tơngai lơh broă pa do geh 13,5%; cau ùr là cau ala măt Mpồl duh broă Làng bol càr geh mờr 28%; uă oh mi cau ùr at kơnòl broă kwơ màng tàm broă đơng lam bồ sờh, gah lơh broă tàm càr. Bơta do ai tơngŏ bơta pràn, bồ tơngoh kơ̆ dơn mờ bơngă ngai sơlơ geh ai tơngŏ bơh cau ùr càr Lâm Đồng dê. “Tơngai pa do, tàm tiah làng bol jơi bơtiàn ờ gal cau tàm càr Lâm Đồng geh broă tam gơl loh làng tàm rài kis, pơgồp bal tàm broă bơtàu tơnguh lơh sa mpồl bơtiàn, sền gàr bơta lơngăp lơngai tàm hìu nhă mờ gàr niam lơngăp lơngai tàm ƀòn lơgar là kơnờm dùl bơnah broă pơgồp bal uă ngan bơh ală oh mi cau ùr dê, tàm hơ̆ geh broă pơgồp bal niam bơh ală cau ùr đảng viên là cau jơi bơtiàn ờ gal cau tàm tiah ngài. Ală oh mi cau ùr do sùm lam lài tàm broă bơ̆t bơtàu nùs nhơm gơboh gơbài tàm hìu nhă, lơh gơs niam broă mpồl bơtiàn, ƀòn lơgar… Bŭ lah ală oh mi cau ùr ờ tŭ lơi kung tìp geh bơta ƀuơn tàm broă lơh mpồl bơtiàn, mơya jơh ală broă mờ ală oh mi cau ùr jơi bơtiàn ờ gal cau neh pơgồp bal ai ƀòn lơgar càr Lâm Đồng in là pal geh dờp ngan”.