Thôn Trà Cong, sàh An Hoà (kơnhoàl A Lão lài do) tềng jơng bơnơm Gai. Hờ đang bồ mờ tềng chàr bơnơm, ală plai lŭ dờng dềt rơndăp bal, broă di gơlan gơtìp tơrlah tŭ mìu sơr jŏ ngai. Mò Nguyễn Thị Hoa, cau kis tàm thôn Trà Cong pà git, mò bal mờ uă cau neh sền gŏ uă dơ̆ gơtìp tơrlah, ù bal mờ lŭ bơh đang bồ bơnơm pơrlă tus lơh gùng lòt gơtìp tơrlah, koh gơl. “Di lah bè tơrlah ù geh dùl nai plai lŭ pơrlă tus den gơlơh pơn jăt bal ală plai lŭ ndai. Tŭ hơ̆ den làng bol kis tàm do ờ git ntoăt tàm tiah lơi. Kơh ñhoa den di gơlan lŭ pơrlă tus tàm gùng dờng tơn, ờ gŏ đơs là mìng tàm ƀòn”.

Mò Phạm Thị Lệ Thùy, Phó Củ tịc Anih duh broă Làng bol sàh An Hoà pà git, thôn Trà Cong là dùl tàm 6 thôn di gơlan gơtìp tơrlah ù uă, geh ală tiah gơtìp tơrlah ngòt rơngơ̆t ngan. Sàh neh rơcang lài gùng dà broă ntrờn làng bol tus tàm tiah lơngăp lơngai tŭ geh jơnau yal gơtìp tơrlah ù: “Tàm bơta di lah khăt bè khà jơnau yal lài rềs àr dê, sàh lơh jăt tơl gùng dà broă lơh neh geh kĭ nàng gàr niam tàm bơta lơi den ntrờn làng bol tus tàm tiah lơngăp lơngai ai làng bol in. Hơ̆ là ală hìu bơsram, hìu lơh broă tàm thôn Xuân Phong Nam, thôn Vạn Long, thôn Vạn Khánh”.

Ndrờm bal mờ broă di gơlan gơtìp tơrlah ù, geh ờ uă thôn, ƀòn tàm tiah kơh bơnơm hờ đah măt tơngai lik càr Gia Lai dê gam di gơlan gơtìp dà cò, dà cò tŭ geh mìu sơr. Tàm hơ̆ uă ngan là tàm tiah croh dà Nước Ói, gơwèt thôn 1, sàh An Toàn. Tàm kàl mìu dà tih, dà bơh tàm croh do gơguh tih, hòr jơn tăng; neh geh ờ uă dơ̆ gơtìp rềs àr bè kòn bơnus. Nàng tơmù bơta rềs àr gơwèt mờ kòn bơnus, lài mờ kàl mìu càl dờng, gơnoar atbồ sàh neh tồt jơnau yal lài, ai mpồl ling gàr ƀòn, cau gàr ƀòn ơm sền gàr, lơh ngan bañ ai làng bol tiă gan tŭ dà tih. Bi Đinh Văn Bằng, Atbồ thôn 1, sàh An Toàn pà git: “Sàh geh mpồl gàr ƀòn ơm sền gàr sùm, tàm thôn den geh mpồl sền gàr lơngăp lơngai mờ ờ uă ơruh pơnu tus sền gàr tàm ală croh dà ngòt rơngơ̆t. Mblàng yal làng bol in lơh jăt nền nòn broă rơcang kơrian mờ dà cò, mìu càl dờng, bañ ai tiă gan tŭ dà bơh tàm croh gơguh tih uă”.

Ồng Nguyễn Văn Vân, Phó Củ tịc Anih duh broă Làng bol sàh An Toàn pà git, tài sùm pal rơcang kơrian lài mờ rềs àr bơh trồ tiah, sàh sùm rơcang lài ală mpồl ling, phan lơh broă nàng rơcang gàr, dong klàs cau gơtìp rềs àr tŭ gơtìp geh bơta jal mhar. Bơdìh hơ̆ tai, kấp ủy, gơnoar atbồ sàh An Toàn kung lơh gùng dà broă lơh nàng ntrờn làng bol tŭ geh jơnau yal lài gơtìp rềs àr bơh trồ tiah tàm bơta uă. “Sàh neh lơh gùng dà broă rơcang lài, tŭ geh mìu càl dờng gơtìp là ai mpồl lơh broă tus kơrian. Tŭ geh bơta niam den hơ̆ sồng pơs wàs niam gùng nàng làng bol in ai rơndeh lòt. Tŭ ù lŭ gơdùh tus uă den pal ai măi, bol añ pal ơpah, hòi jà ờ uă mpồl lơh sa kă bro tus ai măi chŏ, wàs dong kờl làng bol, nàng gàr niam màng kis làng bol bal mờ phan bơna tŭ lòt gan tềng gơl gùng do”.

Mùl màl pà gŏ, tàm càr Gia Lai, broă lơh rơcang kơryan rềs àr trồ tiah lơh aniai sùm geh lam lơh jăt bơta krơi is bơh tơl tiah dê. Tàm tiah jăt gah dà dờng Ba, dà dờng Ayun ha là gùt dar tơnao dà Ayun Hạ sền kwơ tàm broă ntrờn làng bol lik bơdìh tiah gơbam dà, bơ̆t kơ̆ bơtơ̆t, sền gròi niam bơtơ̆t dơng dà. Tiah rề dà lềng, tơnao dà, dà dờng den tơrgùm yal lài gờñ, gàr niam gùng lòt tàm dà mờ sền gàr phan kwơ tàm dà. Tàm tŭ hơ̆, ală sàh tiah kơh bơnơm bè An Hoà, An Toàn rơ̆p ai lài broă sền gròi ală tiah di gơlan tơrlah ù mờ rơcang lài gùng dà ntrờn làng bol jal mhar. Rơcang kơrian mờ mìu càl dờng tàm càr Gia Lai tài bè hơ̆ den tàng ờ mìng là rơcang kơrian mờ trồ tiah ờ niam, mờ gam là atbồ rềs àr geh ai bơh tàm ù tiah krơi is tàm tơl tiah dê.